ഭോപ്പാല്‍ കൂട്ടബലാത്സംഗം: റിപ്പോര്‍ട്ട് സമര്‍പ്പിക്കാന്‍ ഹൈക്കോടതി ഉത്തരവിട്ടു

19 കാരി കൂട്ട ബലാത്സംഗത്തിനിരയായ കേസില്‍ രണ്ടാഴ്ചയ്ക്കം റിപ്പോര്‍ട്ട് സമര്‍പ്പിക്കാന്‍ ജബല്‍പൂര്‍ ഹൈക്കോടതി ഉത്തരവിട്ടു. മധ്യപ്രദേശ് സര്‍ക്കാരിനോട് ഈ കേസില്‍ ഇതുവരെ കൈക്കൊണ്ട നടപടികള്‍ വിശദീകരിക്കാനാണ് ഉത്തരവിലൂടെ ഹൈക്കോടതി ആവശ്യപ്പെട്ടിരിക്കുന്നത്. 

Updated: Nov 13, 2017, 04:57 PM IST
ഭോപ്പാല്‍ കൂട്ടബലാത്സംഗം: റിപ്പോര്‍ട്ട് സമര്‍പ്പിക്കാന്‍ ഹൈക്കോടതി ഉത്തരവിട്ടു

ഭോപ്പാല്‍: 19 കാരി കൂട്ട ബലാത്സംഗത്തിനിരയായ കേസില്‍ രണ്ടാഴ്ചയ്ക്കം റിപ്പോര്‍ട്ട് സമര്‍പ്പിക്കാന്‍ ജബല്‍പൂര്‍ ഹൈക്കോടതി ഉത്തരവിട്ടു. മധ്യപ്രദേശ് സര്‍ക്കാരിനോട് ഈ കേസില്‍ ഇതുവരെ കൈക്കൊണ്ട നടപടികള്‍ വിശദീകരിക്കാനാണ് ഉത്തരവിലൂടെ ഹൈക്കോടതി ആവശ്യപ്പെട്ടിരിക്കുന്നത്. 

റിപ്പോര്‍ട്ട് സമര്‍പ്പിക്കാന്‍ രണ്ടാഴ്ച്ചത്തെ സമയവും ഹൈക്കോടതി അനുവദിച്ചിട്ടുണ്ട്. കൂടാതെ ഈ കേസില്‍ ഡോക്ടര്‍മാരുടെയും പോലീസിന്‍റെയും പങ്ക് വിശദീകരിക്കാനും കോടതി ആവശ്യപ്പെട്ടിട്ടുണ്ട്. 

മധ്യപ്രദേശിലെ സുൽത്താനിയ വനിതാ ആസ്പത്രിയിലെ രണ്ട് ഡോക്ടർമാര്‍, ബലാത്സംഗത്തിന് ഇരയായ 19 വയസുകാരിയായ പെണ്‍കുട്ടി സമ്മതത്തോടെയാണ് കുറ്റവാളികളുമായി ലൈംഗികബന്ധത്തിൽ ഏർപ്പെട്ടത് എന്ന് പറഞ്ഞിരുന്നു. അതേത്തുടര്‍ന്ന് നവംബർ 11 ന് ഈ രണ്ടു ഡോക്ടർമാരെ സസ്പെൻഡ് ചെയ്തിരുന്നു.
 
കൂടാതെ, പൊതു ആരോഗ്യ കുടുംബക്ഷേമ കമ്മീഷണർ മെഡിക്കല്‍ റിപ്പോര്‍ട്ടില്‍ ഗുരുതരമായ പിഴവ് വന്നിട്ടുണ്ട് എന്ന് ആരോപിച്ചിരുന്നു. 

ഈ മാസം ആദ്യ വാരമാണ് കേസിനാസ്പദമായ സംഭവം നടന്നത്. ഐഎഎസ് പരീക്ഷയ്ക്കുള്ള തയ്യാറെടുപ്പ് നടത്തുകയായിരുന്നു പെണ്‍കുട്ടി, കോച്ചിംഗ് ക്ലാസ്സില്‍നിന്നും മടങ്ങി വരുമ്പോളാണ് തട്ടിക്കൊണ്ടുപോയതും പീഡനത്തിനിരയാക്കിയതും. ഹബീബ്ഗംജ് റെയിൽവേ സ്റ്റേഷന് സമീപമാണ് സംഭവം നടന്നത്. ഈ കേസില്‍ പ്രതികളായ നാലു പേരെയും പൊലീസ് അറസ്റ്റ് ചെയ്തിരുന്നു. പിടിക്കപ്പെട്ട പ്രതികള്‍ ഗോളു ബിഹാരി, അമര്‍ ചന്തു, രാജേഷ്‌, രമേശ്‌ എന്നിവരാണ്‌. 
 
ആക്രമിക്കപ്പെട്ട പെണ്‍കുട്ടിയുടെ അമ്മ പോലീസ് കോണ്‍സ്റ്റബിള്‍ ആണ്. പിതാവ് റെയില്‍വേ സുരക്ഷ സേനയിലും ജോലി ചെയ്യുന്നു. 

ഈ കേസിന്‍റെ പ്രാധാന്യം പരിഗണിച്ച് അതിവേഗ കോടതിയില്‍ വിചാരണ നടത്തുമെന്ന് മുഖ്യമന്ത്രി പറഞ്ഞിരുന്നു.

By continuing to use the site, you agree to the use of cookies. You can find out more by clicking this link

Close