പ്രളയക്കെടുതി: 1,85,538 പേര്‍ക്ക് സാമൂഹ്യ, മനഃശാസ്ത്ര ഇടപെടലുകളിലൂടെ സാന്ത്വനമേകി

10 ജില്ലകളിലായി 349 പരിശീലന പരിപാടികള്‍ വഴി ആശാവര്‍ക്കര്‍മാര്‍ ഉള്‍പ്പെടെ 16,671 പേര്‍ക്ക് മാനസികാരോഗ്യ ദുരന്തനിവാരണ പരിശീലനം നല്‍കിയാണ് ഇത് സാധ്യമാക്കിയതെന്നും മന്ത്രി അറിയിച്ചു.  

Updated: Sep 16, 2018, 05:38 PM IST
പ്രളയക്കെടുതി: 1,85,538 പേര്‍ക്ക് സാമൂഹ്യ, മനഃശാസ്ത്ര ഇടപെടലുകളിലൂടെ സാന്ത്വനമേകി

തിരുവനന്തപുരം: പ്രളയാനന്തരമുണ്ടായ വിവിധ തരത്തിലുള്ള മാനസിക സംഘര്‍ഷങ്ങള്‍ ലഘൂകരിക്കുന്നതിന്‍റെ ഭാഗമായി സെപ്റ്റംബര്‍ 14 വരെയുള്ള കണക്കനുസരിച്ച് 1,85,538 പേര്‍ക്ക് സാമൂഹ്യ, മനഃശാസ്ത്ര ഇടപെടലുകളിലൂടെ സാന്ത്വനമേകാന്‍ കഴിഞ്ഞിട്ടുണ്ടെന്ന് മന്ത്രി കെ.കെ. ശൈലജ. 

10 ജില്ലകളിലായി 349 പരിശീലന പരിപാടികള്‍ വഴി ആശാവര്‍ക്കര്‍മാര്‍ ഉള്‍പ്പെടെ 16,671 പേര്‍ക്ക് മാനസികാരോഗ്യ ദുരന്തനിവാരണ പരിശീലനം നല്‍കിയാണ് ഇത് സാധ്യമാക്കിയതെന്നും മന്ത്രി അറിയിച്ചു.

പരിശീലനം ലഭിച്ചവര്‍ 661 ക്യാമ്പ് സന്ദര്‍ശനങ്ങളും 1,00,187 ഭവന സന്ദര്‍ശനങ്ങളും നടത്തി. ഇതിനു പുറമേ കൂടുതല്‍ ഇടപെടലുകള്‍ ആവശ്യമുള്ള 1525 പേര്‍ക്ക് മാനസികാരോഗ്യ ചികിത്സയും നല്‍കിയിട്ടുണ്ട്. ഇതിനായി 10 ജില്ലകളിലായി 120 ടീമുകള്‍ പ്രവര്‍ത്തിച്ച് വരുന്നു. 

ആശാ പ്രവര്‍ത്തകര്‍ പരിശീലനം പൂര്‍ത്തിയാകുന്ന മുറയ്ക്ക് കൂടുതല്‍ ഭവന സന്ദര്‍ശനങ്ങള്‍ നടത്താനും അതുവഴി എല്ലാവര്‍ക്കും മാനസികാരോഗ്യ സേവനം ഉറപ്പുവരുത്തുവാനും കഴിയുമെന്നും മന്ത്രി പറഞ്ഞു. സംസ്ഥാനത്തുണ്ടായ ദുരന്തങ്ങളുടെ പശ്ചാത്തലത്തില്‍ ആരോഗ്യവകുപ്പ് ആഗസ്റ്റ് 18നാണ് എല്ലാ ജില്ലകളിലും മാനസികാരോഗ്യ ദുരന്ത നിവാരണ സംഘങ്ങള്‍ രൂപീകരിച്ചത്. 

മാനസികാരോഗ്യ സേവനം ആവശ്യമുള്ളവരെ കണ്ടെത്താന്‍ ഇന്റര്‍വന്‍ഷന്‍ ടീമുകളെ ചുമതലപ്പെടുത്തി. ദുരന്തത്തില്‍പ്പെട്ട മറ്റുള്ളവര്‍ക്ക് ആശ്വാസം പകരുവാനും അവരുടെ പ്രശ്നങ്ങള്‍ കേള്‍ക്കുവാനും ഈ ടീമുകള്‍ ശ്രദ്ധിക്കുകയുണ്ടായി. ഇതില്‍തന്നെ കുട്ടികളുടെയും പ്രായമായവരുടെയും പ്രശ്നങ്ങള്‍ക്ക് പ്രത്യേക പരിഗണന നല്‍കി വരുന്നു.  ഇതിനോടൊപ്പം വനിതാ ശിശു വികസന വകുപ്പ് കണ്ടെത്തി നിംഹാന്‍സ് പരിശീലനം നല്‍കിയ കൗണ്‍സിലര്‍മാരെക്കൂടി ക്യാമ്പുകളും ഭവനങ്ങളും സന്ദര്‍ശിക്കുന്ന ടീമുകളില്‍ ഉള്‍പ്പെടുത്തി.

രണ്ടാം ഘട്ടത്തില്‍ പ്രവര്‍ത്തനങ്ങളെ വിപുലീകരിക്കുവാനും ഒരു സ്ഥിരം സംവിധാനം ആക്കുവാനുമാണ് ആശാവര്‍ക്കര്‍മാരെക്കൂടി ഉള്‍പ്പെടുത്തിയത്. ഇതിന്‍റെ ഭാഗമായി ദുരന്തം ബാധിച്ച എല്ലാ പഞ്ചായത്തുകളിലെയും ആശവര്‍ക്കര്‍മാര്‍ക്ക് പരിശീലനം നല്‍കി. 

ഇതിനോടൊപ്പം ദുരന്തം ബാധിച്ച ജനങ്ങളുമായി ഇടപഴകുന്ന ആരോഗ്യ വകുപ്പിലെ ഡോക്ടര്‍മാര്‍, നഴ്സുമാര്‍, ആരോഗ്യ പ്രവര്‍ത്തകര്‍, റവന്യൂ ഉദ്യോഗസ്ഥര്‍, തദ്ദേശ സ്വയംഭരണ വകുപ്പ് ജീവനക്കാര്‍, മെമ്പര്‍മാര്‍ എന്നിവര്‍ക്ക് ജനങ്ങളുമായി ഇടപഴകുവാനും അവര്‍ പറയുന്നത് കേള്‍ക്കുവാനും അവര്‍ക്ക് ആശ്വാസം നല്‍കുവാനുള്ള പരിശീലനവും നല്‍കി വരുന്നു.

By continuing to use the site, you agree to the use of cookies. You can find out more by clicking this link

Close