2018ലെ മിസ് യൂണിവേഴ്സ് കിരീടം സ്വന്തമാക്കി ഫിലിപ്പീൻ സുന്ദരി കട്രിയോണ എലീസ ഗ്രേ.
വിവിധ രാജ്യങ്ങളില്‍ നിന്നായി പങ്കെടുത്ത 93 മൽസരാർഥികളെ പിന്നിലാക്കിയാണ് ഗ്രേ കിരീടം സ്വന്തമാക്കിയത്.
മെഡിക്കൽ വിദ്യാർഥിനിയായ ദക്ഷിണാഫ്രിക്കയുടെ ടാമറിൻ ഗ്രീന്‍ ഒന്നാം റണ്ണറപ്പ് ആയപ്പോള്‍ നിയമവിദ്യാർഥിനിയായ വെനസ്വേലയുടെ സ്തെഫാനി ഗുട്ടെറെസ് രണ്ടാം റണ്ണറപ്പായി.
അതേസമയം, ഇന്ത്യയുടെ നേഹാൽ ചുഡാസാമയ്ക്ക് അവസാന 20ൽ സ്ഥാനം പിടിക്കാനായില്ല. 2000ൽ കിരീടം ചൂടിയ ലാറാ ദത്തയ്ക്കു ശേഷം മറ്റൊരു ഇന്ത്യക്കാരിക്ക് ഇതുവരെ കിരീടം ചൂടാനായിട്ടില്ല.
ചരിത്രം സൃഷ്ടിച്ചാണ് സ്പെയിനിന്‍റെ ആംഗല പോൺസ് എന്ന ട്രാൻജൻഡർ വനിത ഈ വര്‍ഷത്തെ മൽസരത്തിൽ പങ്കെടുത്തത്. 2017ലെ മിസ് യൂണിവേഴ്സ് സൗന്ദര്യ മത്സരത്തില്‍ ഡെമി ലെ നെല്‍ പീറ്റേഴ്‌സായിരുന്നു പട്ടം സ്വന്തമാക്കിയിരുന്നത്.
