डार्क चॉकलेट खा, आजार टाळा!

मुलं चॉकलेट खातात म्हणून बहुतेक पालक त्यांच्या मुलांना दटावतात पण, पालकांनो तुम्हीही असं करत असाल तर आजपासून मुलांना ओरडणं सोडून द्या आणि मुलांसोबत तुम्हीही निश्चिंतपणे चॉकलेट खा...

शुभांगी पालवे | Updated: May 9, 2013, 12:51 PM IST

www.24taas.com, झी मीडिया, मुंबई
मुलं चॉकलेट खातात म्हणून बहुतेक पालक त्यांच्या मुलांना दटावतात पण, पालकांनो तुम्हीही असं करत असाल तर आजपासून मुलांना ओरडणं सोडून द्या आणि मुलांसोबत तुम्हीही निश्चिंतपणे चॉकलेट खा... कारण नुकत्याच झालेल्या संशोधनातून ‘डार्क चॉकलेट’ आपल्या शरीराला अत्यंत फायदेशीर असतं, असं सिद्ध झालंय. म्हणूनच आम्ही घेऊन आलोय तुमच्यासाठी डार्क चॉकलेटचे काही महत्त्वाचे फायदे...
डार्क चॉकलेट तुमच्या ह्रद्याचा जवळचा मित्र
आठवड्यातून दोन ते तीन वेळा थोड्या प्रमाणात डार्क चॉकलेट खाल्यानं रक्तदाब कमी होण्यास मदत होते. तसेच डार्क चॉकलेटमुळे रक्त प्रवाह सुरळीत होतो. डार्क चॉकलेटमुळे रक्तातील गुठळ्यांची समस्याही दूर होते. तसेच धमनी काठिण्यापासूनही आपले शरीर सुरक्षित राहते.
डार्क चॉकलेट मेंदूसाठी महत्त्वाचे
डार्क चॉकलेट मेंदू तसेच ह्रद्यातील रक्तप्रवाह वाढवते. त्यामुळे शरीराला ह्रद्य आणि मेंदू यांतील समतोल राखण्यास मदत होते. ह्रद्यविकाराच्या झटक्याची क्षमताही कमी होते. डार्क चॉकलेटमधील काही रासायनिक घटकांमुळे आपला मूड ताजातवाना राहण्यासाठी मदत होते.
रक्तातील साखरेच्या प्रमाणात समतोल
रक्तवाहिन्यांना निरोगी ठेऊन त्यातील रक्त प्रवाह सुरळीत राहिल्यानं रक्तातील साखरेचे प्रमाणाची पातळी योग्य राहते. डार्क चॉकलेटमधील फ्लॅओनॉईडस् शरीरातील इन्सुलिनची पातळी योग्य ठेवते.
डार्क चॉकलेटमध्ये अँन्टी ऑक्सिडसचा साठा
डार्क चॉकलेटमध्ये अँन्टीऑक्सिडस मोठ्या प्रमाणात असतं. त्यातीन रॅडीक्लस चेहऱ्यावरील सुरकुत्या येण्यास प्रबंध करते. तसेच डार्क चॉकलेटचा अत्यंत महत्त्वाचा फायदा म्हणजे कर्करोग होण्यापासून आपल्या शरीराचा बचाव करते.
डार्क चॉकलेटमधील थेओब्रोमाईनचे फायदे
थेओब्रोमाईन हा चॉकलेटमधील एक महत्त्वाचा रासायनिक घटक आहे. कोकोच्या बियांपासून हा रासायनिक घटक मिळतो. हा रासायनिक घटक दातांना किडण्यापासून बचाव करते. तसेच थेओब्रोमाईन हे कफ आणि सर्दीसाठीही गुणकारी असते.

डार्क चॉकलेट हे जीवनसत्व आणि खनिजांमध्ये अग्रेसर
डार्क चॉकलेटमध्ये सगळ्या प्रकारची जीवनसत्व असून खनिजांचाही अफाट साठा आहे जेणेकरून तुमचे आरोग्य सुदृढ राहते. डार्क चॉकलेटमध्ये पोटॅशिअम, कॉपर, मॅगनीज आणि लोह यांचा मोठा साठा असतो.