अखिलेश सरकारचा 'सैफई महोत्सवा'त ३०० कोटींचा चुराडा

www.24taas.com, झी मीडिया,लखनऊ
उत्तर प्रदेशचे मुख्यमंत्री अखिलेश यादव यांनी आपला आजचा कार्यक्रम अचानक बदलून देढ इश्किया या आज प्रदर्शीत होणा-या हिंदी चित्रपटाच्या प्रीमियर शोला दांडी मारली. मुजफ्फरनगर आणि शामली येथील छावणीतील दंगलग्रस्तांच्या मूलभूत गरजाही मदतकार्यातून भगवल्या जात नाहीत तर दुसरीकडे उत्तर प्रदेश सरकारनं सैफई महोत्सवात तब्बल ३०० कोटींचा चुराडा केल्यानं अखीलेश यादव सरकार वादाच्या भोव-यात सापडलंय.
अशात देढ इश्कीया या चित्रपटासाठी करांमध्ये एक कोटी रुपयांची सवलत देण्याचं उत्तर प्रदेश सरकारनं जाहीर केलंय. इतकच नही तर राज्यात या चित्रपटासाठी २५ टक्के करमणूक करही माफ करण्याचा विचार राज्य सरकार करतंय.
एकीकडे भाकरीच्या एका तुकड्यासाठी तडफडणारे. थंडीत कुडकुडत जीव सोडणारे दंगलग्रस्त तर दुसरीकडे सैफईत झालेला नेते मंडळींचा फिल्मी मसाला. असं काहीसं चित्र काल उत्तरप्रदेशात पाहायला मिळालं. दरम्यान, टीकेची झोड उठली असताना माफी मागायचं सोडून मुख्यमंत्री अखिलेश यादव महोदय मीडियावरच घसरले.
या महोत्सवात सकाळी आठ वाजल्यापासूनच मोठ-मोठ्या राजकीय हस्तींनी हजेरी लावली.. त्यांच्या दिमतीला वेटर्सचा मोठा फौजफाटाच तैनात करण्यात आला होता. ज्या वेळी ही नेते मंडळी नृत्यांच्या तालावर चहा-कॉफीची मजा घेत होते तेव्हा मुजफ्फरनगरच्या कॅम्पमधील कुटुंबं भाकरीच्या एका तुडक्यासाठी तडफडत होतं. दंगल पीडितांना पाच लाखांची मदत देण्यात आल्याचा दावा सरकार करीत होतं. मात्र गारठून मारणा-या थंडीत केवळ झोपडीत राहाणा-या या दंगलग्रस्तांची परिस्थितीच सारं काही सांगून जात होती.
जनता थंडीत गारठून मरत असताना मुख्यंमंत्री महोदय मात्र सैफई महोत्सवात दंग झाले होते.दरम्यान हे प्रकरण मीडियाने लाऊन धरल्यानंतर खुलाशात माफी मागायचं सोडून मुख्यमंत्री अखिलेश यादव मीडियावरच घसरले.