जगातील सर्वात उंच विमानतळ चीनमध्ये सुरू!

www.24taas.com, झी मीडिया, बिजिंग
चीननं जगातील सर्वात उंच सिव्हिलियन एअरपोर्ट नुकतंच सुरू केलंय. यामुळे चीनला पश्चिम क्षेत्रात फक्त पर्यटनालाच वाव मिळणार नाही तर राजनैतिक पकडही घट्ट होईल, असा अंदाज वर्तवला जातोय.
उंच ठिकाणी हवेचा जोर कमी असल्यानं नेहमीपेक्षा जास्त लांबीच्या ‘रन वे’ची आवश्यकता असते. ‘डाओचेंग याडिंग’वर ४२०० मीटर उंचीवर बनलेल्या या एअरपोर्टचा ‘रन वे’ न्यूयॉर्कच्या जॉन एफ. कॅनेडी (जगातील सर्वात मोठं विमानतळ) विमानतळापेक्षा केवळ २४२ मीटर छोटं आहे. हा रन वे ४.२ किलोमीटर लांबीचा आहे.
या विमानतळाची उंची अधिक असल्यानं प्रवाशांना डोकं दुखणं, उलट्यांचा त्रास होणं किंवा ऑल्टिट्यूड सिकनेस जाणवल्याचं सांगण्यात येतंय.