मुंबईसह उपनगरात जोरदार पाऊस

www.24taas.com, झी मीडिया,मुंबई
आठवड्याभराची विश्रांती घेऊन वीकेंडला हजेरी लावलेल्या पावसाचा जोर संडेलाही कायम आहे. शनिवारपासून मुंबईत पावसाची रिपरिप सुरु आहे. तर ठाण्यातही मुसळधार पाऊस सुरु आहे. संततधार पावसामुळं सखल भागात पाणी साचलंय.
नवी मुंबईत रात्रभर पावसाचा जोर आहे. तर मुंबईत सकाळी पावसाचा जोर दिसून आला. हिंदमाता येथे पाणी साचलंय. मात्र असं असलं तरी या पावसाचा रेल्वे आणि ट्रॅफिकवर परिणाम झालेला दिसून आलेला नाही. त्यातच मध्य आणि हार्बर मार्गावर मेगाब्लॉक असल्याने प्रवाशांना १०.३० नंतर प्रवासात अडचण निर्माण होण्याची शक्यता लक्षात घेऊन मुख्यमार्गावरून हार्बरच्या गाड्या धावणार आहेत. तर पनवेल ते अंधेरी रेल्वे बंद राहणार आहे.
वीकेंडला राज्यभर वरुणराजाचं दमदार कमबॅक झाल्याचं दिसून आलं. मुंबईसह कोकण, विदर्भ, खान्देशात पावसाची जोरदार हजेरी लागली. संततधार पावसामुळं पेरणीच्या कामांना वेग आला आहे. धरण क्षेत्रात दमदार पाऊस पडत आहेत. त्यामुळे धरणातील पाणी पातळीत वाढ दिसून येत आहे.
राज्यातही सिंधुदुर्ग जिल्ह्यात जोरदार वादळी वा-यामुळे मोठे नुकसान झालंय. संततधारमुळे नद्यांच्या पातळीत वाढ झाली आहे. मुंबई- गोवा महामार्गावरची वाहतूक रस्त्यावर झाडे पडल्याने विस्कळीत झाली होती. सार्वजनिक बांधकामाच्या कामगारांनी झाडे बाजूला करून वाहतूक पूर्ववत सुरु केली आहे.
बुलडाणा जिल्ह्यात पावसानं दोन जणांचा बळी घेतला. गणेशपूर गावाजवळून वाहणाऱ्या नदीला पूर आल्याने ३० वर्षीय परशुराम लथाळे हे वाहून गेले आहे. तर दुस-या घटनेत जळगाव जामोद शहराजवळ एक झाड पडून पिंपळगावचे महावितरणाचे कनिष्ट अभियंता प्रल्हाद कतोरे यांचा जागीच मृत्यू झाला.
रायगड जिल्ह्यात संततधार पावसामुळे धरणातील पाणीपातळीत वाढ झालीये. बळीराजा सुखावला असून पेरण्यांच्या कामांना आता वेग आलाय.