सलमान खान हा सध्या बॉक्स ऑफिसचा राजा मानला जातोय. मिडास राजाप्रमाणे सलमान ज्या गोष्टीला स्पर्श करतो, ती गोष्ट सोन्याची होऊन जात आहे. त्याच्या जाहिराती, बिग- बॉस, दस का दमसारखे शो आणि सिनेमा सगळ्या माध्यमांमध्ये तो लोकप्रिय होतोय. सलमानच्या सिनेमांना अर्थ असो वा नसो, त्याच्या चाहत्यांना फक्त सलमान खान हवा असतो. त्याच्यावर काळवीट शिकारीचा गुन्हा दाखल होवो, त्याच्या कारमुळे अपघात होऊन गरीबांचा मृत्यू होवो.. सलमानच्या लोकप्रियतेवर त्याचा काडीचाही परिणाम होत नाही. त्याची प्रेमप्रकरणं गाजली. त्याची मैत्री, त्याची दुश्मनी.. सगळ्यालाच लोकप्रियता मिळते. 20 वर्षांहून अधिक काळ तो सिनेमांत काम करतोय. त्याने आत्तापर्यंत 80 सिनेमे केले आहेत.