भारतात सुरु असलेल्या वर्ल्ड कप 2023 मध्ये तरुण खेळाडूंनी आपल्या खेळाने स्पर्धेवर छाप सोडली आहे.
या तरुणांचा खेळ पाहून यंदाच्या इंडियन प्रिमिअर लिगच्या पर्वामध्ये या खेळाडूंना करारबद्ध करुन घेण्यासाठी आयपीएल संघ मालकांमध्ये रस्सीखेच पाहायला मिळेल.
या तरुण खेळाडूंपैकी काही खेळाडूंना आपल्या संघातून खेळवण्यासाठी संघमालक वाटेल तेवढी रक्कम मोजण्यासाठी तयार असतील अशी शक्यता आहेत. असेच 6 खेळाडू कोणते ते पाहूयात...
न्यूझीलंडचा सलामीवर 23 वर्षीय रचिन रविंद्र यंदाच्या आयपीएलमधील हॉट फेव्हरेट असेल यात शंका नाही.
न्यूझीलंडकडून खेळताना यंदाच्या पर्वात 3 शतकं रचिनने लगावली आहेत. त्याला आयपीएलचे संघमालक कोट्यवधी रुपये मोजून संघात घेतील.
यंदाच्या वर्ल्ड कपमध्ये नेदरलॅण्डच्या यशामागे असलेल्या प्रमुख खेळाडूंपैकी एक म्हणजे 23 वर्षीय बास डी लीडे.
बास डी लीडे हा एक अष्टपैलू खेळाडू आहे. तो फलंदाजी आणि गोलंदाजीमध्येही फारच उत्तम आहे. त्याला आयपीएलमध्ये चांगली बोली मिळू शकते.
दुनिथ वेललेज या 20 वर्षीय श्रीलंकन फिरकीपटूने जगभरातील क्रिकेट चाहत्यांचं यंदाच्या वर्ल्ड कप 2023 मध्ये लक्ष वेधून घेतलं आहे.
विराट, रोहित, शुभमन या तिघांना अवघ्या 13 चेंडूंमध्ये एकामागोमाग एक तंबूत परत पाठवणाऱ्या दुनिथला आयपीएलमध्ये उत्तम बोली मिळेल.
जेराल्ड कोएत्झी या दक्षिण आफ्रिकेच्या वेगवान गोलंदाजाने आपल्या प्रभावी कामगिरीची छाप सोडली असून पहिल्या 5 सामन्यात 12 विकेट्स घेतल्यात.
वेगवान गोलंदाजीबरोबर तळाशी परिस्थितीनुसार फलंदाजी करण्यातही 23 वर्षीय जेराल्ड कोएत्झी पटाईत आहे.
अफगाणिस्तानचा 21 वर्षीय सलामीवीर इब्राहिम जार्दानला यंदाच्या आयपीएलमध्ये उत्तम बोली मिळू शकते.
इब्राहिम जार्दान हा स्फोटक सलामीवर असून तो यंदाच्या आयपीएलमध्ये एखाद्या संघातून खेळताना दिसल्यास आश्चर्य वाटण्याचं कारण नाही.
नेदरलॅण्डमधील भारतीय वंशाचा फिरकीपटू आर्यन दत्तच्या फिरकीच्या जादूनेही अनेकांना त्याची दखल घेण्यास भाग पाडलं आहे.
यंदाच्या आयपीएलमध्ये आर्यनवर चांगली बोली संघमालकांकडून लावली जाण्याची शक्यता आहे.