ప్రభుత్వ రంగాలతో పాటు ప్రైవేటు రంగాల్లో పనిచేసే ఉద్యోగులకు పన్ను రహిత గ్రాట్యుటీని పెంచాలని భావించింది భారత సర్కారు. తాజాగా పన్ను రహిత గ్రాట్యుటీ పరిమితిని రూ.10 లక్షల రూపాయల నుండి రూ.20 లక్షలకు పెంచిన క్రమంలో ఈ బిల్లుకు పార్లమెంటు ఆమోదం తెలపడం విశేషం. గ్రాట్యుటీ చట్టం 1972 ప్రకారం ఫ్యాక్టరీలు, ఆయిల్ కంపెనీలు, మైనింగ్ సంస్థలు, పోర్టులు, రైల్వేలు.. ఇలాంటి సంస్థల్లో కనీసం అయిదు సంవత్సరాలు పనిచేసిన వారికి కూడా ఈ బిల్లు వర్తిస్తుంది.
సెంట్రల్ సివిల్ సర్వీస్ క్రిందకు రాకుండా ఉండి.. ప్రభుత్వ రంగ, ప్రభుత్వ అనుబంధ సంస్థలతో పాటు ప్రైవేటు సంస్థల్లో పనిచేస్తున్న వారికి కూడా ఈ యాక్ట్ వర్తిస్తుంది. తాజా బిల్లుకు చట్ట సవరణ అవసరం లేదు. అలాగే ఈ గ్రాట్యుటీ పరిమితిని పెంచే అవకాశం కూడా కేంద్ర ప్రభుత్వానికి ఉంటుంది. ఈ బిల్లును గత వారమే లోక్ సభలో ఆమోదించగా.. ఈ రోజు రాజ్యసభలోనూ ఆమోదించారు.
మొన్నటి వరకు వివిధ కారణాల వల్ల సభ వాయిదా పడుతూ రావడంతో ఈ బిల్లు ఆమోదం పొందుతుందా? లేదా? అని చాలామంది సందేహపడ్డారు. కానీ ఎట్టకేలకు బిల్లు ఆమోదం పొందడంతో వేతనజీవులకు కొంతలో కొంత ఊరట లభించినట్లైంది. ఈ బిల్లును ఈ రోజు కార్మిక మంత్రి సంతోష్‌ కుమార్‌ మూజువాణి ఓటు ద్వారా ఆమోదింపజేయడం విశేషం. 7వ వేతన సంఘం అమలయ్యాక.. కేంద్ర ప్రభుత్వ ఉద్యోగులకు గ్రాట్యుటీ రూ.20 లక్షలకు పెరిగింది
