మార్చి 15 నుంచి ఒంటిపూట బడులు

వేసవిని దృష్టిలో ఉంచుకొని తెలంగాణ రాష్ట్ర ప్రభుత్వం మార్చి 15 నుంచి ఒంటిపూట బడులను నడపాలని నిర్ణయించింది.

Updated: Mar 13, 2018, 01:01 PM IST
మార్చి 15 నుంచి ఒంటిపూట బడులు

వేసవిని దృష్టిలో ఉంచుకొని తెలంగాణ రాష్ట్ర ప్రభుత్వం మార్చి 15 నుంచి ఒంటిపూట బడులను నడపాలని నిర్ణయించింది. మార్చి 15 నుండి తెలంగాణలోని అన్ని పాఠశాలలు ఉదయం 8 గంటల నుండి మధ్యాహ్నం  12.30 వరకు తరగతులను నిర్వహించాలని పాఠశాల విద్యాశాఖ డైరక్టర్ కిషన్ ఉత్తర్వుల్లో పేర్కొన్నారు.  2017-18 విద్యా సంవత్సరం చివరి రోజు వరకు ఈ ఆదేశాలు అమలులో ఉంటాయని తెలిపింది.

"మార్చి 15 నుంచి 2017-18 విద్యా సంవత్సరం చివరి పనిదినం వరకు వేసవి దృష్ట్యా ఒంటిపూట బడులను నిర్వహించాలి. ప్రాథమిక, ప్రాథమికోన్నత, ఉన్నత పాఠశాలలు ఉదయం 8 గంటల నుండి మధ్యాహ్నం 12.30 వరకు తరగతులను నిర్వహించాలి. ప్రభుత్వ, ఎయిడెడ్, ప్రవేట్ యాజమాన్యాల కింద నడిచే అన్ని పాఠశాలలకు ఇది వర్తిస్తుంది" అని ఉత్తర్వుల్లో పేర్కొన్నారు. తెలంగాణలో ఎండలు ఎక్కువగా ఉండటం చేత ఈ నిర్ణయం తీసుకున్నామని తెలిపారు. తెలంగాణలోని ప్రాంతీయ జాయింట్ డైరెక్టర్లకు, జిల్లా విద్యా శాఖ అధికారులకు  ఉత్తర్వులను జారీచేసి అవసరమైన చర్య తీసుకోవాలని ఆదేశించారు.

పదో తరగతి పరీక్ష కేంద్రాలుగా కొనసాగుతున్న పాఠశాలలను మధ్యాహ్నం ఒంటి గంట నుంచి సాయంత్రం 5 గంటల వరకు నిర్వహించాలని ఆదేశించారు. ఇక ఉన్నత పాఠశాలల్లో ఐచ్ఛిక సెలవుల విధానాన్ని మార్చుతూ గతంలో ఇచ్చిన ఉత్తర్వులను సవరించారు. ఐచ్ఛిక సెలవులను ఉపాధ్యాయులు వ్యక్తిగతంగా కాకుండా పాఠశాల పరంగా తీసుకోవాలని పేర్కొన్నారు.

By continuing to use the site, you agree to the use of cookies. You can find out more by clicking this link

Close