 "દિવાળી પહેલા GST સ્લેબમાં થશે મોટો ફેરફાર? ફેસ્ટિવ સિઝનમાં કઈ-કઈ વસ્તુ થવાની છે સસ્તી")
GST Slab Change: કેન્દ્ર સરકાર સામાન્ય માણસને રાહત આપવા માટે GST સ્લેબમાં બદલાવ કરવાની તૈયારી કરી રહ્યું છે. GSTમાં બદલાવથી રોજિંદા ઉપયોગના ઘણા કન્ઝ્યુમર પ્રોડક્ટની કિંમતમાં ઘટાડો થઈ શકે છે. નાણા મંત્રાલય છેલ્લા છ મહિનાથી નવી સિસ્ટમ પર કામ કરી રહ્યું છે. અધિકારીઓનું કહેવું છે કે, જો GST કાઉન્સિલ દ્વારા તેને મંજૂરી આપવામાં આવે છે, તો નવા દરો દિવાળી પહેલા સપ્ટેમ્બર અથવા ઓક્ટોબરની આસપાસ લાગુ થઈ શકે છે.
આ વસ્તુઓ થઈ શકે છે સસ્તી
પ્રધાનમંત્રી મોદી (Narendra Modi)એ લાલ કિલ્લા પરથી સ્વતંત્રતા દિવસના ભાષણ દરમિયાન આનો સંકેત આપ્યો હતો. તેમણે સંકેત આપ્યો હતો કે, સરકાર જે પગલું ભરવા જઈ રહી છે તે 'દિવાળી ભેટ' હશે. સરકારી સૂત્રોએ જણાવ્યું કે, GSTને તર્કસંગત બનાવવા માટે તે જ દિવસે કામ શરૂ થઈ ગયું હતું, જે દિવસે 1 ફેબ્રુઆરી 2025ના રોજ કેન્દ્રીય બજેટ રજૂ કરવામાં આવ્યું હતું. ડ્રાફ્ટ પ્લાન અનુસાર રોજિંદા ઉપયોગમાં લેવાતી બધી વસ્તુઓ ટૂંક સમયમાં સસ્તી થઈ શકે છે.
કઈ વસ્તુઓ સસ્તી થવાની છે ઉમ્મીદ?
GST સ્લેબમાં ફેરફારને કારણે જે વસ્તુઓ સસ્તી થવાની ધારણા છે, તેમાં ઘી, માખણ, પેક્ડ ફૂડ, ફ્રુટ જ્યૂસ અને પેક્ડ નારિયેળ પાણી જેવી આવશ્યક વસ્તુઓનો સમાવેશ થાય છે. એવી વસ્તુઓ જેના પર હાલમાં 12%ના ટેક્સ લાગે છે, તેને 5% GST સ્લેબમાં લાવવાની યોજના છે. તેવી જ રીતે 1000 રૂપિયાથી ઓછી કિંમતના જૂતા અને કપડાંને પણ 5% GSTના દાયરામાં લાવી શકાય છે. સૂત્રોના જણાવ્યા અનુસાર રોજિંદા જીવનમાં વપરાતી વસ્તુઓને 5% GSTના દાયરામાં લાવવામાં આવશે.
કાર, બાઇક, ટીવી અને સિમેન્ટના પણ ઘટશે ભાવ
આ બદલાવના અમલીકરણથી મધ્યમ વર્ગના પરિવારોને તાત્કાલિક રાહત મળી શકે છે. ચર્ચા ચાલી રહી છે કે, નાની કારો અને 250 CCથી ઓછી ક્ષમતા ટુ-વ્હીલર પર GST 28%થી ઘટાડીને 18% કરવામાં આવી શકે છે. AC, ડીશવોશર, 32 ઇંચ સુધીના ટીવી અને સિમેન્ટ પર પણ GST ઘટાડાથી ફાયદો મળવાની અપેક્ષા છે. સિમેન્ટ પર લાગતો 28% GST સ્લેબ 18% સુધી ઘટાડી શકાય છે. આનાથી ઘર બનાવવાની કિંમતમાં ઘટાડો થશે. રોઇટર્સના મતે, આરોગ્ય અને જીવન વીમા પોલિસી પર GST પ્રીમિયમ પણ 18%થી ઘટાડીને 5% અથવા શૂન્ય થઈ શકે છે. જો આને મંજૂરી મળી જાય, તો દિવાળી પહેલા ઓક્ટોબરમાં ટેક્સ ઘટાડાની જાહેરાત થવાની શક્યતા છે.
સિમ્પલ ટેક્સ સ્ટ્રક્ચર પર વિચાક
હાલમાં GSTના દરો 0%, 5%, 12%, 18% અને 28%ના પાંચ મુખ્ય સ્લેબમાં આવે છે. કેટલીક ચીજો પર કમ્પનસેશન સેસ પણ લાગે છે. GST ફિટમેન્ટ કમિટી દ્વારા તૈયાર કરાયેલા પ્રસ્તાવ અનુસાર તેને ફક્ત બે મુખ્ય દરો 5% અને 18% સુધી સરળ બનાવવામાં આવશે. કમ્પનસેશન સેસ ધીમે-ધીમે ખતમ કરવામાં આવશે અને તેની જગ્યાએ ચોક્કસ ચીજો ખાસ કરીને તમાકુ અને પાન મસાલા જેવા 'સિન ગુડ્સ' પર 40%ના એક સમાન દર લાગુ કરવામાં આવશે.
અધિકારીઓ અનુસાર 12% કેટેગરીવાળા 99% ઉત્પાદનો 5% સ્લેબમાં જઈ શકે છે. તેવી જ રીતે 28% પર ટેક્સ લાદવામાં આવતા લગભગ 90% માલને 18%માં શિક્ટ કરવામાં આવી શકે છે. આ બદલાવથી ટેક્સ સિસ્ટમને સમજવામાં સરળતા રહેશે અને ગ્રાહકો માટે કિંમતોમાં પણ ઘટાડો થશે.
)