ICICI બેંકના ગ્રાહકો માટે ખુશખબર, બેંકે ઘટાડી મિનિમમ બેલેન્સની લિમિટ, જાણો હવે બેંકમાં કેટલા પૈસા રાખવા પડશે

ICICI Bank બેંકના ગ્રાહકોને મોટા ખુશખબર મળ્યા છે. હાલમાં જ નવા ગ્રાહકો માટે વધારવામાં આવેલી મિનિમમ બેલેન્સની લિમિટ બેંકે હવે ઘટાડી દીધી છે. બેંક તરફથી જાણકારી આપતા જણાવવામાં આવ્યું છે કે હવે સેવિંગ્સ એકાઉન્ટમાં મિનિમમ એકાઉન્ટ બેલેન્સ (MAB)ના નિયમમાં ફરીથી ફેરફાર કરાયો છે અને ગ્રાહકોને રાહત આપતા મેટ્રો અને અર્બન વિસ્તારોમાં આ લિમિટ ઘટાડીને 50,000 રૂપિયાથી ફક્ત 15,000 રૂપિયા કરવામાં આવી છે. 

જૂની લિમિટથી હજુ વધારે
એક બાજુ જ્યાં મેટ્રો અને અર્બન એરિયામાં સવિંગ એકાઉન્ટમાં મિનિમમ મંથલી એવરેજ બેલેન્સ (MAB)ની લિમિટને બદલી છે તો બીજી બાજુ હવે સેમી અર્બન ક્ષેત્રો માટે તેને 25,000 રૂપિયાથી ઘટાડીને 7,500 રૂપિયા અને રૂરલ એરિયામાં 10,000 રૂપિયાથી ઘટાડીને 2,500 રૂપિયા કરી છે. જો કે બેંકે સ્પષ્ટ કર્યું છે કે જો ગ્રાહક એકાઉન્ટમાં નિર્ધારિત લિમિટ કરતા ઓછું બેંક બેલેન્સ રાખશે તો પછી તેમણે પેનલ્ટી ભરવી પડશે. 

અત્રે જણાવવાનું કે આઈસીઆઈસીઆઈ બેંકે હાલમાં જ પોતાના નિયમોમાં ફેરફાર ક રતા સેવિંગ એકાઉન્ટમાં મિનિમમ બેલેન્સ કે મિનિમમ એવરેજ અમાઉન્ટ બેલેન્સની મર્યાદામાં જોરદાર વધારો કર્યો હતો અને પહેલાની સરખામણીમાં 5 ગણો વધારો કર્યો હતો. જે મુજબ એક ઓગસ્ટથી મહાનગરોમાં ખુલનારા નવા બચત  ખાતાઓ માટે મિનિમમ મંથલી અમાઉન્ટની લિમિટને 10,000 રૂપિયાથી વધારીને 50,000 રૂપિયા કરી હતી. ત્યારબાદ બેંકના આ નિર્ણયનો ગ્રાહકોએ ભારે વિરોધ કર્યો અને હવે આ નિયમ પર બેંકે યુટર્ન માર્યો છે. 

શું થયું હતું સંશોધન
બેંકે પોતાના મેટ્રો અને અર્બન ગ્રાહકો માટે મિનિમમ એવરેજ બેલેન્સને 10,000 રૂપિયાથી વધારીને 50,000 રૂપિયા કર્યું હતું. જ્યારે અર્ધ શહેરી વિસ્તારોમાં તે 5,000 રૂપિયાથી વધારીને 25,000 રૂપિયા કર્યું અને ગ્રામીણ વિસ્તારો માટે 2500થી વધારીને 10,000 રૂપિયા કર્યું હતું. આ નિર્ણય 1 ઓગસ્ટથી ખોલવામાં આવનારા ખાતાઓ પર લાગૂ થવાનો હતો. 

શું છે નવું રિવિઝન
ભલે બેંકે મિનિમમ બેલેન્સમાં રિવિઝન કર્યું પરંતુ મિનિમમ બેલેન્સની રકમમાં ગત લિમિટની સરખામણીએ હજુ પણ વધારો છે. મેટ્રો અને અર્બન વિસ્તારોમાં 50,000 રૂપિયાથી ઘટાડીને 15,000 રૂપિયા, અર્ધ શહેરી વિસ્તારોમાં 25,000 રૂપિયાથી ઘટાડીને 7,500 રૂપિયા અને ગ્રામીણ વિસ્તારોમાં 10,000 રૂપિયાથી ઘટાડીને 2500 રૂપિયા કર્યું છે. 

બેલેન્સ ઘટ્યું તો પેનલ્ટી
બેંક દ્વારા વધારવામાં આવેલી MAB લિમિટને ઘટાડવાનો નિર્ણય આમ તો રાહતભર્યો છે. પરંતુ નવી લિમિટ સાથે પણ પેનલ્ટીનો જૂનો નિયમ જ લાગૂ રહેશે. એટલે કે  જો કોઈ ગ્રાહક ખાતામાં જરૂરી મિનિમમ બેલેન્સ જાળવી રાખવામાં નિષ્ફળ જાય તો પછી જેટલું ઓછું બેલેન્સ હશે તેના 6 ટકા અથવા 500 રૂપિયા જે પણ ઓછું હશે તે લાગશે. જો કે આ ચાર્જમાંથી ફેમિલી બેંકિંગ એકાઉન્ટ હોલ્ડર અને પેન્શનર્સના એકાઉન્ટે છૂટ અપાયેલી છે.