ઈરાન ઈઝરાયલ યુદ્ધ વચ્ચે ભારતનો મોટો દાવ, હવે આ દેશમાંથી મંગાવી રહ્યું છે ક્રૂડ ઓઈલ

Crude Oil: ઈરાન પર ઈઝરાયલના હુમલા પછી બજારની અસ્થિરતા વચ્ચે ભારતે જૂન મહિનામાં રશિયા પાસેથી ક્રૂડ ઓઈલની ખરીદીમાં વધારો કર્યો છે. જૂન મહિનામાં રશિયા પાસેથી ભારતની તેલ ખરીદી પશ્ચિમ એશિયાઈ સપ્લાયર્સ સાઉદી અરેબિયા અને ઈરાકથી આયાત કરાયેલા જથ્થા કરતાં વધી ગઈ છે. યુએસ સેનાએ રવિવારે સવારે ઈરાનમાં ત્રણ સ્થળો પર હુમલો કર્યો. તે આ યુદ્ધમાં સીધા ઈઝરાયલમાં જોડાઈ ગયું છે. ઈઝરાયલે સૌપ્રથમ 13 જૂને ઈરાની પરમાણુ સ્થળો પર હુમલો કર્યો હતો.

શું છે ડિટેલ

ગ્લોબલ બિઝનેસ એનાલિસ્ટ કંપની કેપ્લરના પ્રારંભિક ડેટા દર્શાવે છે કે ભારતીય રિફાઇનરીઓ જૂન મહિનામાં રશિયા પાસેથી દરરોજ 20 થી 22 લાખ બેરલ ક્રૂડ ઓઇલ ખરીદી રહી છે. આ બે વર્ષમાં સૌથી વધુ આંકડો છે. આ સાથે, તે ઇરાક, સાઉદી અરેબિયા, સંયુક્ત આરબ અમીરાત (UAE) અને કુવૈત પાસેથી ખરીદેલા કુલ જથ્થા કરતાં વધુ છે. મે મહિનામાં રશિયાથી ભારતની તેલ આયાત 19.6 લાખ બેરલ પ્રતિ દિવસ (bpd) હતી. જૂનમાં અમેરિકાથી પણ આયાત વધીને 4,39,000 bpd થઈ ગઈ. ગયા મહિને આ આંકડો 2,80,000 bpd હતો. કેપ્લરના મતે, પશ્ચિમ એશિયામાંથી આયાત માટેનો સંપૂર્ણ મહિનાનો અંદાજ લગભગ 20 લાખ બેરલ પ્રતિ દિવસ છે, જે ગયા મહિનાની ખરીદી કરતા ઓછો છે.

વિશ્વનો ત્રીજો સૌથી મોટો તેલ આયાતકાર

વિશ્વનો ત્રીજો સૌથી મોટો તેલ આયાતકાર અને ગ્રાહક ભારત, વિદેશોમાંથી લગભગ 51 લાખ બેરલ ક્રૂડ ઓઇલ ખરીદે છે, જેને રિફાઇનરીઓમાં પેટ્રોલ અને ડીઝલ જેવા ઇંધણમાં રૂપાંતરિત કરવામાં આવે છે. ભારત પરંપરાગત રીતે પશ્ચિમ એશિયામાંથી ક્રૂડ ઓઇલ ખરીદતું આવ્યું છે. ફેબ્રુઆરી 2022 માં યુક્રેન પર રશિયાના હુમલા પછી ભારતે રશિયા પાસેથી મોટા પ્રમાણમાં ક્રૂડ ઓઇલ આયાત કરવાનું શરૂ કર્યું. જો કે તેના કારણે ભારતમાં પેટ્રોલ અને ડિઝલના ભાવમાં ફેરફાર થવાના હાલ કોઈ સંકેત દેખાઈ રહ્યા નથી, પણ જો ઈઝરાયેલ અને ઈરાનનું યુદ્ધ લાંબા સમય ચાલ્યું તો ભાવમાં વધારો આવી શકે છે. 

આનું મુખ્ય કારણ એ હતું કે પશ્ચિમી પ્રતિબંધો અને કેટલાક યુરોપિયન દેશો દ્વારા ખરીદી કરવાનું ટાળવાના કારણે રશિયન તેલ અન્ય આંતરરાષ્ટ્રીય બેન્ચમાર્ક કરતાં ઘણું સસ્તું ભાવે ઉપલબ્ધ હતું. આને કારણે, ભારતની રશિયન તેલ આયાતમાં નાટ્યાત્મક વધારો જોવા મળ્યો. એક સમયે રશિયાથી ભારતની ક્રૂડ ઓઇલ આયાત એક ટકાથી ઓછી હતી. પરંતુ રશિયાના યુક્રેન પર હુમલા પછી, તે ટૂંકા સમયમાં વધીને 40-44 ટકા થઈ ગઈ હતી.