મુકેશ અંબાણીના પુત્રના લગ્ન ચર્ચામાં!, કંકોત્રીની કિંમત જાણીને આંખો પહોળી થઈ જશે!

નવી દિલ્હી: ક્રિકેટર વિરાટ કોહલી અને અભિનેત્રી અનુષ્કા શર્માના ઈટલીમાં થયેલા લગ્નની ચારેબાજુ ચર્ચા છે. દરેક જણ બસ આ લવબર્ડ્સના ડેસ્ટિનેશન વેડિંગની વાતો કરી રહ્યું છે. પરંતુ આ બધા વચ્ચે એશિયાના સૌથી અમીર ગણાતા બિઝનેસમેન મુકેશ અંબાણીના મોટા પુત્ર આકાશ અંબાણીના લગ્ન અને તેમના  લગ્નની કંકોત્રી ચર્ચાનો વિષય બની ગયા છે. સોશિયલ મીડિયા પર વાઈરલ થઈ રહેલા આ વીડિયો અને તસવીરમાં દેખાતા કાર્ડને આકાશ અંબાણીનું વેડિંગ કાર્ડ દર્શાવવામાં આવી રહ્યું છે. જો કે લગ્ન ક્યારે થશે તે અંગે જુદી જુદી અટકળો થઈ રહી છે. સોશિયલ મીડિયામાં આ પ્રકારની અટકળો થઈ રહી છે. જો કે ઝી ન્યૂઝ તેની કોઈ પુષ્ટિ કરતું નથી. 

સોશિયલ મીડિયા પર વાઈરલ થઈ રહેલી તસવીરો અને વીડિયો મુજબ રિલાયન્સ ઈન્ડસ્ટ્રીઝના માલિક મુકેશ અંબાણીના પુત્ર આકાશ અંબાણીના લગ્નની કંકોત્રીઓ છપાઈ ગઈ છે. આ કાર્ડની કિંમત દોઢ લાખ રૂપિયા કહેવાય છે. જેને મોતી અને સોનાથી સજાવવામાં આવી છે. આ કાર્ડ કોઈને મોકલાશે તો કુલ ખર્ચો 75 લાખનો આવશે જેમાં કોઈ એક સામાન્ય વ્યક્તિ બંગલો સુદ્ધા ખરીદી શકે છે. 

આકાશ અંબાણીના લગ્નની કંકોત્રી ભલે જાહેર થઈ ગઈ હોવાનો દાવો કરવામાં આવી રહ્યો છે પરંતુ આ લગ્ન ક્યારે છે તેને લઈને હજુ અટકળો જ છે. મીડિયામાં ચાલી રહેલા અહેવાલો મુજબ આકાશ અંબાણીના લગ્ન આ ડિસેમ્બરમાં છે, તો  કેટલાકનું કહેવું છે કે આ લગ્ન વર્ષ 2018ની ગ્રીષ્મ ઋતુમાં થશે. 

જો કે એક વાત તો નક્કી છે કે જો ખરેખર આકાશ અંબાણીના લગ્ન થઈ રહ્યાં હશે તો આ ઈવેન્ટ ખરેખર ખુબ જ લક્ઝુરિયસ હશે જેમાં ખર્ચ થતી રકમની કોઈ ગણતરી હશે નહીં. અત્રે જણાવવાનું કે નીતા અને મુકેશ અંબાણીના પુત્ર હોવાની સાથે સાથે આકાશ અંબાણી રિલાયન્સ જિયો ટેલિકોમમાં ચીફ ઓફ સ્ટ્રેટેજી છે. આ વર્ષે ઓગસ્ટમાં થયેલા એક સર્વેમાં આ કંપનીની નેટ વર્થ 2.2 લાખ કરોડ બતાવવામાં આવી હતી.