લાલો બની સૌથી વધુ કમાણી કરનાર ગુજરાતી ફિલ્મ, રેકોર્ડ બ્રેક કમાણી કરીને રચ્યો ઈતિહાસ

Lalo Movie Revenue: 10 ઓક્ટોબર 2025ના રોજ લાલો: કૃષ્ણ સદા સહાયતે નામની એક ગુજરાતી ફિલ્મ રિલિઝ થઈ છે. ગુજરાતી ફિલ્મો આવે અને જાય, બસ એવી જ રીતે લાલો ફિલ્મ આવી. પરંતુ આ ફિલ્મ બસ એમ જ જાય એમ નહોતી. રિલિઝ થયા બાદ ફિલ્મની શરૂઆત 3 અઠવાડિયા ખુબ ધીમી રહી, પરંતુ જાણે ખરેખર કૃષ્ણએ સહાય કરી હોય એમ આ આ ફિલ્મે જે રફ્તાર પકડી કે ગુજરાત ફિલ્મ ઈતિહાસના રેકોર્ડ તોડી નાંખ્યા છે. 

ગુજરાતી ફિલ્મ લાલો: કૃષ્ણ સદા સહાયતે આજે ગુજરાતી ઈતિહાસમાં સૌથી વધુ કમાણી કરનારી ફિલ્મ બની ગઈ છે. 3 ફેબ્રુઆરી 2019માં રિલિઝ થનારી ચાલ જીવી લઈએ ફિલ્મની 5 વર્ષની કમાણીને માત્ર 5 અઠવાડિયામાં જ લાલો ફિલ્મએ પાછળ છોડી દીધી છે. ગુજરાતી બોક્સ ઓફિસ પર લાલો ફિલ્મની 52 કરોડની કમાણી કરી લીધી છે.

ગુજરાતી બોક્સ ઓફિસ પર લાલો ફિલ્મની કમાણી
પહેલા અઠવાડિયામાં - માત્ર 35 લાખની કમાણી કરી 
બીજા અઠવાડિયામાં - 65 લાખની કમાણી કરી
ત્રીજા અઠવાડિયામાં - 1 કરોડથી વધુની કમાણી કરી
ચોથા અઠવાડિયામાં - 10 કરોડની કમાણી કરી 

જ્યારે પાંચમા અઠવાડિયામાં વધુ એક રેકોર્ડ તોડીને લાલો ફિલ્મએ 40 કરોડની કમાણી કરી લીધી છે.

એટલે કે ફિલ્મના 3 અઠવાડિયામાં ભલે ધીમી શરૂઆત હોય, પરંતુ ચોથા અઠવાડિયા બાદ ફિલ્મને ભગવાન શ્રીકૃષ્ણના આશિર્વાદ મળ્યાં હોય એમ કરોડોની કમાણી કરીને પાંચ અઠવાડિયામાં 52 કરોડથી પણ વધુની કમાણી કરીને લાલો: કૃષ્ણ સદા સહાયતે ફિલ્મ ગુજરાતની સૌથી વધુ કમાણી કરનારી ફિલ્મ બની ગઈ છે. 

લાલો: કૃષ્ણ સદા સહાયતે ફિલ્મ બનાવવા માટે ફિલ્મ નિર્માતાઓએ મરણમુડી ભેગી કરીને ફિલ્મ બનાવી હોવાની વાત છે. ત્યારે ફિલ્મ નિર્માતાઓએ સપને પણ નહીં વિચાર્યું હોય કે 1 કરોડ જેટલા બજેટની આ ગુજરાતી ફિલ્મ પાંચ અઠવાડિયામાં જ 50 કરોડની કમાણીનો આંકડો વટાવી જશે. ભલે લાલો ફિલ્મને સરકારે ટેક્સ ફ્રી ન કરી હોય, પરંતુ ઓછા બજેટવાળી ફિલ્મની વ્હારે આવીને શ્રી કૃષ્ણએ ચરિતાર્થ કર્યું છે કે - કૃષ્ણ... સદા સહાયતે....