 "ગુજરાતની આંગણવાડી બહેનોને અશ્લીલ ફોન કરનારો ઝડપાયો, પંજાબનો યુવક નીકળ્યો")
)
Bharuch News ભરત ચુડાસમા/ભરૂચ : ભરૂચ જિલ્લામાં આંગણવાડી બહેનોને ન્યૂડ વીડિયો કોલ કરી અશ્લીલ હરકતો કરી હેરાનગતિ કરનાર ઝડપાયો છે. પંજાબના ફિરોઝપુરના એક ગામમાંથી ગુર્જિતસિંગ મેહરસિંગ રાયસીંગ નામના ઇસમને ભરૂચ પોલીસે ઝડપી પાડ્યો. 100થી વધુ આંગણવાડી બહેનોને અજાણ્યા નંબર પરથી નશાની હાલતમાં રોજ રાત્રે અભદ્ર ન્યૂડ વીડિયો કોલ કરી અશ્લીલ હરકતો કરતો હતો. પોલીસે પંજાબ જઈને આરોપીને ઝડપી પાડ્યો હતો અને હાલ કોર્ટમાં રિમાન્ડ માટેની કાર્યવાહી શરૂ કરી છે.
ભરૂચ જિલ્લા આંગણવાડી સંગઠન દ્વારા ત્રણ દિવસ અગાઉ જિલ્લા સાયબર ક્રાઈમ પોલીસ સ્ટેશનમાં ફરિયાદ નોંધાવવામાં આવી હતી કે, કોઈ અજાણ્યો વ્યક્તિ સવારે, બપોરે અને રાત્રે અલગ-અલગ સમયે મહિલાઓને ન્યૂડ વીડિયો કોલ કરી રહ્યો છે.આ કારણે મહિલાઓમાં ડર અને માનસિક તણાવ ફેલાયો હતો તેમજ કેટલાક પરિવારજનોમાં કંકાસની પરિસ્થિતિ ઊભી થઈ હતી.
જેથી સાયબર પોલીસ મથકના પોલીસ ઇન્સ્પેક્ટર વી.આર.ભરવાડની આગેવાની હેઠળની ટીમે તકેદારીપૂર્વક તપાસ હાથ ધરી.કોલ કરનાર નંબર ટ્રેસ કરતાં જાણવા મળ્યું કે તે પંજાબના ફિરોઝપુર જિલ્લાના ચક મેઘા ગામનો રહેવાસી ગુરજીતસિંહ મહેરસિંહ રાયશીખ (ઉંમર 29) નો હતો. આરોપી નશાની હાલતમાં મહિલાઓના મોબાઇલ નંબરની યાદી મેળવી હતી. તે અલગ-અલગ નંબર પર ન્યૂડ વીડિયો કોલ કરતો હતો.
સાયબર પોલીસ ટીમે ફિરોઝપુર જઈને ગુરજીતસિંહને ઝડપી પાડ્યો હતો. તેની કબૂલાત મુજબ તે લાંબા સમયથી આંગણવાડી બહેનોને કોલ કરી રહ્યો હતો. હાલમાં આરોપીની ભરૂચમાં ઓળખ પરેડ કરાવી કોર્ટમાં રિમાન્ડ માટે કાર્યવાહી શરૂ કરવામાં આવી છે.
પહેલીવાર આરોપીએ જે મહિલાને ફોન કર્યો ત્યારબાદ આરોપીને ખબર પડી હતી કે, આ સિરીઝમાં નંબરો છે એટલે તેણે પછી સિરીઝમાં વારાફરતી બધી મહિલાઓને કોલ કરવાની શરૂઆત કરી હતી. આંગણવાડી સંગઠનનાં પ્રમુખ રાગિણી પરમાર દ્વારા બહેનોને સાથે રાખી સાઇબર ક્રાઇમમાં ફરિયાદ નોંધવામાં આવી હતી.
આ ઘટનાને લઈ ભરૂચ જિલ્લા આંગણવાડી સંગઠન પ્રમુખ રાગિની પરમાર સહિત મહિલાઓએ પોલીસની ઝડપી કામગીરી બદલ આભાર વ્યક્ત કર્યો છે.
