 "ગુજરાતમાં 2200 કરોડનો સટ્ટો કેવી રીતે રમાતો, માસ્ટરમાઈન્ડ હર્ષિત જૈનની ધરપકડથી ખૂલશે મોટા ભેદ")
)
Ahmedabad News ઉદય રંજન/અમદાવાદ : ગુજરાતના સૌથી મોટા ક્રિકેટસટ્ટાનો મુખ્ય ખેલાડી દુબઈથી ઝડપાયો છે. SMCના DIG નિર્લિપ્ત રાયની ટીમે હર્ષિત જૈનની ધરપકડ કરી છે. ત્યારે 2200 કરોડના સટ્ટાકાંડમાં નવા ઘટસ્ફોટ થશે.
ગુજરાતના બહુચર્તિત 2200 કરોડના સટ્ટા કેસમાં હર્ષિત જૈનની દુબઈથી ધરપકડ કરાઈ છે. એસએમસી દ્વારા હર્ષિત જૈન સામે લુકઆઉટ નોટિસ જાહેર કરી હતી. હર્ષિતના પકડાયા બાદ હવે સકંજો સૌરભ અને અમિત મજેઠિયા સુધી પહોંચશે. આ સહિત અન્ય બુકીઓને પણ પકડવામાં આવશે
ગુજરાત પોલીસના SMC ના DIG નિર્લિપ્ત રાયે માહિતી આપતા જણાવ્યું કે, અમદાવાદ શહેર PCB દ્વારા વર્ષ 2023 માં રેડ કરાઈ હતી. સુમેલ બિઝનેસ પાર્ક નામની માધુપુરા વિસ્તારની ઓફિસમાં હર્ષિત જૈનની ઓફિસમાં રેડ કરાઈ હતી. 436 ચેકબુક, 438 બેન્ક કાર્ડ, મોબાઈલના અલગ અલગ સિમ કાર્ડ અને 7 પાન કાર્ડ સહિતનો મુદ્દામાલ પકડાયો હતો. અહીં સટ્ટા બેટિંગ અને ડબ્બા ટ્રેડિંગ ચાલતું હોવાની ફરિયાદ નોંધાઇ હતી. 16 એપ્રિલ 2023 ના રોજ પોલીસ ફરિયાદ દાખલ થઈ હતી.
SMC ને તપાસ સોંપાયા બાદ 13 ટીમ બનાવવામાં આવી હતી. શેરબજારના ID અને ક્રિકેટ બેટિંગના ID ની ઉલટતપાસ કરાઈ હતી. 400 જેટલા લોકોના નિવેદન નોંધવામાં આવ્યા હતા. આ બાદ આ કેસમાં 36 જેટલા આરોપીઓની હાલ સુધી અટકાયત કરી દેવામાં આવી છે. દિપક ઠક્કર નામના મુખ્ય આરોપીને દુબઇથી પકડી પાડવામાં આવ્યા છે. આ તપાસમાં સામે આવ્યું કે, સુમેલ બિઝનેસ પાર્કમાં 128 નંબરની દુકાનમાં પણ આરોપી હર્ષિત જૈન પ્રવૃતિઓ કરતો હતો. અલગ અલગ વ્યક્તિઓના નામે ખોટા ભાડા કરાર બનાવી ગુમસ્તાધારાના લાયસન્સ મેળવતા હતા. લાયસન્સ મળ્યા બાદ ખોટા દસ્તાવેજ બનાવતા. જુદી જુદી કંપનીઓના સીમકાર્ડ આ દસ્તાવેજના આધારે ખરીદી કરતા હતા. સીમકાર્ડની મદદથી વ્હોટ્સએપમાં તમામ પ્રવૃત્તિ કરતા અને બાદમાં સીમકાર્ડ તોડી પાડતા.
તેમણે આગળ જણાવ્યુ કે, સીમકાર્ડમાંથી સટ્ટા બજારની કામગીરી ચાલતી હતી અને બેંકમાં નાણાં જમા કરવામાં આવતા. અલગ અલગ એપ્લિકેશન પણ સટ્ટા બેટિંગમાં ઉપયોગમાં લેવામાં આવી હતી તે પણ પુરાવામાં સામેલ કરાયા છે. અલગ અલગ ખોટી કંપનીઓ બનાવી તેના ખાતામાં નાણાં જમા કરાવવામાં આવ્યા હતા તેની પણ તપાસ કરાઈ રહી છે. આરોપી હર્ષિત અંગે અમને ખબર પડી હતી કે, તે ભારત છોડી દુબઇ ભાગી ગયા છે. તેથી તેની વિરુદ્ધ લુક આઉટ નોટિસ જાહેર કરી હતી. રેડ કોર્નર નોટિસ કેન્દ્ર સરકાર દ્વારા બહાર પાડવામાં આવી હતી. દુબઈ ખાતે પ્રત્યારોપણની દરખાસ્ત મોકલવામાં આવી હતી. હાલ આરોપી હર્ષિતની અમદાવાદ એરપોર્ટ ઉપરથી ધરપકડ કરવામાં આવી છે.
કુલ 2200 કરોડ જેટલું કૌભાંડ હતું, જેમાં 481 ખાતામાંથી 9.62 કરોડ જેટલી રકમ ધરાવતા ખાતા ફ્રીઝ કરવામાં આવ્યા છે. સમગ્ર કૌભાંડમાં 8 આરોપીઓ સામે લુક આઉટ નોટિસ જાહેર કરવામાં આવી હતી. અમિત મજેઠીયા અને સૌરભ ચંદવાકર મુખ્ય આરોપીઓ છે, જેની હજી શોધખોળ કરાઈ રહી છે.
હવે હર્ષિત જૈન દુબઇ કઈ રીતે ફરાર થયો તે અંગે પૂછપરછ કરાશે. બેન્ક એકાઉન્ટ મળી આવ્યા હતા અને ખોટી કંપનીના સહી સિક્કા મળી આવ્યા તે ક્યાંથી લાવવામાં આવ્યા તે મામલે હર્ષિતની પૂછપરછ કરવામાં આવશે. આરોપીના રિમાન્ડમાં પૂછપરછ કરવામાં આવશે કે જે નાણાં મેળવવામાં આવતા હતા તેનો દેશ વિરોધી પ્રવૃત્તિમાં ઉપયોગ થતો હતો કે કેમ તે પણ જાણવા મળશે.
