પોલીસની સજાગતાએ અમદાવાદમાં થતી ચોરીની મોટી ઘટના અટકી! આંતરરાજ્ય ગેંગને ક્રાઇમ બ્રાન્ચે ઝડપી

ઉદય રંજન/અમદાવાદ: શહેરમાં આંગડિયા પેઢી અથવા તો સોના ચાંદીના વેપારી સાથે બનનારી લૂંટની ઘટના પોલીસની સજાગતાએ અટકાવી છે. અમદાવાદ ક્રાઈમ બ્રાન્ચે હથિયારો સાથે પંજાબથી અમદાવાદમાં લૂંટના ઇરાદે આવેલી આંતરરાજ્ય ગેંગને અમદાવાદ ક્રાઇમ બ્રાન્ચે ઝડપી પાડી છે. 

અમદાવાદ ક્રાઈમ બ્રાન્ચ ની કસ્ટડીમાં દેખાતા આરોપીઓના નામ ગગનદીપસિંઘ રંધાવા, રનજોધસિંઘ બદેસા, મનપ્રિતસિંઘ બટ્ટી અને પ્રભુ જ્યોતસિંગ બટ્ટી છે. આ આરોપીઓ મૂળ પંજાબ રાજ્યના અમૃતસર જિલ્લાના રહેવાસી છે. આરોપીઓને અમદાવાદના સરખેજમાં શાંતિપુરા તરફથી મોહમ્મદપુરા ગામ જતા રોડ પરથી ક્રાઈમ બ્રાન્ચે પકડી પાડ્યા છે. તેઓની પાસેથી બે પિસ્તોલ અને પાંચ જીવતા કારતુસ, છરો અને 4 મોબાઈલ ફોન મળી આવ્યા હતા.

આરોપીઓમાં ગગનદીપસિંઘ રંધાવા માસ્ટર માઈન્ડ છે, તે અને રણજોધસિંગ બદેસા એક વર્ષ પહેલા અમદાવાદમાં ક્રેન ચલાવવાનું કામ કરતા હતા. જોકે બાદમાં તેઓ પંજાબ ગયા અને પંજાબથી પોતાના સાગરીતોને લઈને અમદાવાદમાં આંગડિયા પેઢી અથવા તો સોની વેપારીને હથિયાર બતાવી લૂંટ કરવાના ઇરાદે પરત આવ્યા હતા. ગગનદીપસિંઘ અગાઉ ચાણક્યપુરી વિસ્તારમાં રહેતો હતો અને અમદાવાદના અલગ અલગ વિસ્તારોથી વાકેફ હતો. 

આરોપીની હથિયાર બાબતે પૂછપરછ કરતા સામે આવ્યું કે પંજાબના હેપ્પી બુટ્ટર નામના વ્યક્તિ પાસેથી 30 હજાર રૂપિયામાં બે પિસ્તોલ અને પાંચ કારતુસ લાવ્યા હોવાની તેઓએ કબુલાત કરી છે. ઝડપાયેલો આરોપી ગગનદીપસિંઘ રંધાવા અગાઉ પંજાબ રાજ્યમાં ખૂનની કોશિશ, મારા મારી, ચોરી, NDPS અને ફોન સ્નેચિંગ સહિતના સાત જેટલા ગુનાઓમાં પકડાઈ ચૂક્યો હોવાથી હકીકત ધ્યાને આવી છે. આરોપીની વધુ તપાસ માટે આરોપીઓના ચાર દિવસના રિમાન્ડ ક્રાઈમ બ્રાન્ચે મેળવ્યા છે.