ભાજપના ધારાસભ્ય અને પાટીદાર નેતા હાર્દિક પટેલ શું ફરી જેલમાં જશે? કોર્ટે ઇશ્યુ કર્યુ ધરપકડ વોરંટ

warrant issued against mla hardik patel: અમદાવાદ ગ્રામ્ય કોર્ટે ભાજપના ધારાસભ્ય હાર્દિક પટેલ વિરુદ્ધ ધરપકડ વોરંટ (એરેસ્ટ વોરંટ) બહાર પાડ્યું છે. આ વોરંટ 2018ના પાટીદાર અનામત આંદોલન (PAAS) સાથે જોડાયેલા એક કેસમાં કોર્ટમાં વારંવાર ગેરહાજર રહેવા બદલ ઇશ્યૂ કરવામાં આવ્યું છે. તમને જણાવી દઈએ કે ગ્રામ્ય કોર્ટે અગાઉ ઘણી વખત હાર્દિક પટેલને સમન્સ પાઠવ્યા હતા, પરંતુ તેઓ સતત ગેરહાજર રહ્યા હતા. 9 સપ્ટેમ્બર, 2025ના રોજ પણ હાર્દિક કોર્ટમાં હાજર ન રહ્યા, જેના પગલે કોર્ટ દ્વારા ધરપકડ વોરંટ બહાર પાડવામાં આવ્યું છે.

શું છે સમગ્ર મામલો?
વર્ષ 2018માં હાર્દિક પટેલે પાટીદાર અનામત આંદોલન દરમિયાન અમદાવાદના નિકોલ વિસ્તારમાં પ્રતીક ઉપવાસ કર્યા હતા. આ ઉપવાસને કારણે નિકોલ પોલીસ સ્ટેશનમાં તેમની સામે ગુનો નોંધવામાં આવ્યો હતો. આ કેસમાં હાર્દિક પટેલ, ગીતા પટેલ, કિરણ પટેલ અને આશિષ પટેલ સહિતના અન્ય લોકો પણ આરોપી તરીકે સામેલ છે.

કેસની સુનાવણી દરમિયાન, કોર્ટ દ્વારા વારંવાર સમન્સ મોકલવા છતાં હાર્દિક પટેલ કોર્ટમાં હાજર રહ્યા નહોતા. કાયદાકીય પ્રક્રિયા મુજબ, જ્યારે કોઈ આરોપી નિયત તારીખે કોર્ટમાં હાજર ન રહે, ત્યારે કોર્ટ ધરપકડ વોરંટ બહાર પાડી શકે છે.

અમદાવાદ ગ્રામ્ય કોર્ટે આ જ કારણસર હાર્દિક પટેલ સામે ધરપકડ વોરંટ ઇશ્યૂ કર્યું છે. આ વોરંટનો અર્થ એ છે કે પોલીસ હવે હાર્દિક પટેલની ધરપકડ કરીને તેમને કોર્ટ સમક્ષ રજૂ કરી શકે છે. ભાજપના ધારાસભ્ય બન્યા બાદ પણ હાર્દિક પટેલને આ જૂના કેસમાં કાયદાકીય મુશ્કેલીઓનો સામનો કરવો પડી રહ્યો છે. આ મામલે હવે પછીના કાનૂની પગલાં શું હશે તે જોવું રહ્યું.

આ આરોપીઓમાં કોણ કોણ સામેલ છે?
હાર્દિક પટેલ ઉપરાંત ગીતા પટેલ, આશિષ પટેલ અને કિરણ પટેલ જેવા વ્યક્તિઓના નામ પણ ફરિયાદમાં સમાવિષ્ટ છે. આ તમામ સામે પાટીદાર આંદોલન દરમિયાન કાયદેસરના ધોરણે ગેરવર્તણૂક અને જાહેર વ્યવસ્થાને ભંગ કરવાનો આરોપ છે.