સાચવજો! હું વીમા કંપનીમાંથી બોલી રહ્યો છું, તમને ઓછા પ્રીમિયમમાં વધુ ફાયદો કરાવીશ...

Surat News: જો તમને વીમા કંપનીમાંથી કોણ અજાણ્યા વ્યક્તિનો કોલ આવે. તો સતર્ક રહેજો. કારણ કે સુરતમાં બની એક એવી ઘટના  જે તમારા હોંશ ઉડાવી દેશે. વીમા કંપનીમાંથી બોલતા હોવાની ખોટી ઓળખ આપીને એક જ પરિવાર પાસેથી લાખો રૂપિયા ખંખેરી લીધા. કોણ છે આ આરોપી શું છે તેમની મોડસ ઓપરેન્ડી અને કેવી રીતે કરતા હતા છેતરપિંડી. તમને થતા તમામ સવાલોના જવાબ મેળવીશું આપણે અહીં.

પોલીસ જાપ્તામાં ઉભેલા આ બંને ઠાકોરબંધુએ ભેગા મળીને એક સિનીયર સિટીઝનને એવા ચકરાવળે ચઢાવ્યા. કે તેઓ ઠાકોર બંધુઓની જાળમાં ફસાઈ ગયા. અને સિનીયર સિટીઝન સાથે લાખો રૂપિયાની ઠગાઈ થઈ. લાલચમાં આવેલા સિનીયર સિટીઝનને જ્યારે ઠગાઈની ખબર પડી ત્યારે પોલીસ સ્ટેશનના દરવાજા ખખડાવ્યા.. અને પોલીસે ભારે જહેમત બાદ બંને આરોપીની ધરપકડ કરી.

પોલીસે પકડેલા બંને ભાઈનું નામ અમિતકુમાર ઠાકોર અને સુમિતકુમાર ઠાકોર છે. બંને દિલ્લીના રહેવાસી છે. જ્યાંથી પોતાની ઠગાઈની દુકાન પણ ચલાવે છે. સુરતમાં રહેતા એક સિનીયર સિટીઝનને આ બંને ભાઈઓએ લાલચ આપી બોટલમાં ઉતારી લીધા. આ બંને ભાઈઓમાં સમગ્ર ષડયંત્રનો માસ્ટરમાઈન્ડ અમિતકુમાર ઠાકોર છે. જેણે વીમા કંપનીની ખોટી ઓળખ આપીને સુરતના સિનીયર સિટીઝન સાથે વાતચીત કરી સિનીયર સિટીઝનને વિશ્વાસમાં લીધા અને પછી ઠગાઈ આચરી.

માસ્ટરમાઈન્ડ અમિતકુમાર ઠાકોરે સિનીયર સિટીઝનને જૂદી-જૂદી વીમા પોલિસીમાં રોકાણ કરવાની લાલચ આપી. લાલચમાં આંધળા બનેલા સિનીયર સિટીઝને અમિતની વાત માની અને પોતાના પરિવારના સભ્યો માટે 10 પોલિસીની ખરીદી કરી. પોલિસી જ્યારે પાકવા આવી ત્યારે પણ ગઠીયાઓએ સિનીયર સિટીઝન પાસેથી ચાર્જની વસુલાત કરી અને 98.85 લાખની છેતરપિંડી આચરી. રૂપિયા પરત ન મળતા સિનીયર સિટીઝને સાયબર સેલમાં ફરિયાદ નોંધાવી. જેના આધારે બંને આરોપીની ધરપકડ કરવામાં આવી.

વીમા પોલિસીના નામે થયેલા સાયબર ફ્રોડમાં માસ્ટર માઈન્ડ અમિત કુમાર ઠાકોર છે. જેણે પોતાના ભાઈ સુમિતાના બેંક એકાઉન્ટમાં 36.81 લાખ રૂપિયા અને બહેનના એકાઉન્ટમાં 2.65 લાખ રૂપિયા ટ્રાન્ફર કર્યા હતા. પોલીસની ટીમોએ સિનીયર સિટીઝનની બેંક માહિતીના આધારે ટેક્નિકલ વર્કઆઉટ કરીને બંને આરોપીને દબોચી લીધા. હાલ બંને આરોપીના રિમાન્ડની કાર્યવાહી હાથ ધરાઈ છે.