 "જુનાગઢની હોસ્ટેલમાં સગીર વિદ્યાર્થી સાથે છુટ્ટા હાથની મારામારી, આહીર સમાજ લાલઘુમ થયો")
Junagadh News અશોક બારોટ/જૂનાગઢ : જૂનાગઢની એક ખાનગી શાળાની હોસ્ટેલમાં વિદ્યાર્થીને અન્ય વિદ્યાર્થીઓ દ્વારા માર મારતા હોવાની ઘટના સામે આવતા ખળભળાટ મચ્યો છે. સમગ્ર ઘટના પોલીસ સ્ટેશન પહોંચી છે. જ્યારે પોલીસ અને શિક્ષણ વિભાગે તપાસના આદેશ આપ્યા છે.
જૂનાગઢના મધુરમ ચોકડી નજીક આવેલ આલ્ફા ઇન્ટરનેશનલ સ્કૂલની હોસ્ટેલમાં પાંચથી છ જેટલા વિદ્યાર્થીઓ દ્વારા એક વિદ્યાર્થીને માર મારતા હોવાનો વીડિયો વાયરલ થતા ચકચાર મચી છે. વીડિયોમાં ભોગ બનનાર વિદ્યાર્થીના વાલીના ધ્યાન પર આવતા તે શાળાએ દોડી આવ્યા હતા. તેમજ શાળા સંચાલક અને હોસ્ટેલ સંચાલકો સામે બેદરકારીના આક્ષેપો કર્યા છે. દોઢ મહિના પહેલા ઘટના બની હોવા છતાં ભોગ બનનાર વિદ્યાર્થીના પરિવારને ઘટનાની જાણ જ કરવામાં નહોતી આવી અને ઘટના રફે દફે કરવાનો પ્રયાસ હોસ્ટેલ સંચાલકો દ્વારા કર્યો હતો. આ સમગ્ર ઘટનાના પગલે પરિવારજનો દ્વારા હોસ્ટેલ ખાતે પહોંચ્યા હતા અને જ્યાં આ ઘટનાને લઈને રોષ ઠાલવ્યો હતો. હોસ્ટેલ અને સ્કૂલ સામે કાર્યવાહી કરવામાં આવે તેવી માંગ પરિવારજનો દ્વારા કરવામાં આવી છે તેમ જ પોલીસ ફરિયાદ નોંધવાની તજવીજ શરૂ કરાય છે.
વીડિયોમાં જોઈ શકાય છે કે, એક વિદ્યાર્થીને ચાર જેટલા વિદ્યાર્થીઓ દ્વારા માર મારવામાં આવ્યો હતો. આ ઘટના પ્રકાશમાં આવતા પોલીસ પણ એક્શનમાં આવી છે. પોલીસ દ્વારા વાલી ભોગ બનનાર વિદ્યાર્થીઓના નિવેદન લેવાની કામગીરી શરૂ કરવામાં આવી છે. ગત 26 જુલાઈના રોજ ઘટના બની હતી. જેમાં ધોરણ 11 અને 12 ના વિદ્યાર્થીઓ વચ્ચે રમતગમત બાબતે બબાલ થઈ હતી અને બાદમાં રૂમમાં રહેતા અન્ય વિદ્યાર્થીઓ દ્વારા એક વિદ્યાર્થીને ઢોર મારવામાં આવ્યો છે. ઘટનાના પગલે વિદ્યાર્થીના વાલીઓ દ્વારા પાંચ જેટલા વિદ્યાર્થીઓ સામે કાર્યવાહી કરવા સી ડિવિઝન પોલીસ સ્ટેશન ખાતે રિપોર્ટ આપવામાં આવ્યો છે. આ વિદ્યાર્થીઓ સગીર હોવાથી જુવેનાઇલ જસ્ટિસ એક તો મુજબ કાર્યવાહી શરૂ કરાઇ છે..
આલ્ફા ઇન્ટરનેશનલ સ્કૂલની હોસ્ટેલમાં થયેલ ઘટના મામલે શાળા સંચાલક દ્વારા ખુલાસો કરવામાં આવ્યો હતો આ ઘટના સ્કૂલમાં નહીં પરંતુ હોસ્ટેલમાં બની છે અને હોસ્ટેલ આલ્ફા ઇન્ટરનેશનલ સ્કૂલ દ્વારા ભાડે આપવામાં આવી છે અને તમામ જવાબદારી હોસ્ટેલ સંચાલકોની રહે છે તેવું નિવેદન આલ્ફા ઇન્ટરનેશનલ સ્કૂલના સંચાલક જી.પી. કાઠીએ આપ્યું હતું. બીજી તરફ હોસ્ટેલ સંચાલક હાર્દિક બારડે નિવેદન આપ્યું કે ઘટનાની જાણ તમામ વાલીઓને કરી દેવામાં આવી છે અને જે વિદ્યાર્થીઓ દ્વારા મારવામાં આવ્યો હતો તે તમામ વિદ્યાર્થીઓને હોસ્ટેલમાંથી છુટા કરી દેવામાં આવ્યા છે.
આખી ઘટનાને લઈને શિક્ષણ વિભાગ દ્વારા પણ તપાસ શરૂ કરવામાં આવી છે. પરંતુ ઘટના સ્કૂલમાં નહીં હોસ્ટેલમાં બની છે, જો આગામી સમયમાં તપાસમાં શાળાની બેદરકારી જણાશે તો વિદ્યાર્થીઓની સુરક્ષા ન રાખવા બદલ શાળા સામે પણ કાયદેસરની કાર્યવાહી કરવાની ખાતરી જિલ્લા શિક્ષણ અધિકારી લતા ઉપાધ્યાય દ્વારા આપવામાં આવી હતી.
મારામારીના વધુ વીડિયો સામે આવ્યા
આલ્ફા ઇન્ટરનેશનલ હોસ્ટેલમાં વિદ્યાર્થીને માર મારવાના વધુ વીડિયો સામે આવ્યા છે. મહત્વનું છે કે, જૂનાગઢની આલ્ફા ઈન્ટરનેશનલ સ્કૂલમાં થોડા દિવસ અગાઉ મારામારીની ઘટના બની હતી. જેમાં હોસ્ટેલમાં રહેતા એક વિદ્યાર્થીને અન્ય 4 જેવા વિદ્યાર્થીઓએ ઢોર માર માર્યો. જેનો વીડિયો વાયરલ સામે આવતા પોલીસ એક્શનમાં આવી છે. જિલ્લા કલેક્ટરના આદેશ બાદ તપાસ સમિતિની રચના કરવામાં આવી. આ સમિતિ ઘટનાના તમામ પરિબળો અંગે તપાસ કરશે. સાથે જ સ્કૂલની હોસ્ટેલની મુલાકાત લઈને વહેલી તકે અહેવાલને રજૂ કરશે. સમિતિમાં DySP, જિલ્લા શિક્ષણ અધિકારી, ડેપ્યુટી કમિશનર, બાળ સુરક્ષા અધિકારીનો સમાવેશ થાય છે.
આહીર સમાજમાં આક્રોશ
ઉપલેટાના આહીર સમાજના વિદ્યાર્થીને માર મારવાના બનાવને લઈ આહીર સમાજમાં ભારે રોષ જોવા મળ્યો છે. ઉપલેટા આહીર સમાજ આ બાબતને લઈ મોટી સંખ્યામાં એકઠો થયો હતો. ઉપલેટામાં આહીર સમાજની બેઠકમાં આહીર સમાજના વિદ્યાર્થીને હોસ્ટેલમાં અન્ય વિદ્યાર્થીઓ દ્વારા ઢોર માર મારતા બનાવને એકી સાથે સમાજે વખોડી છે. ઉપલેટા આહીર સમાજ દ્વારા સંસ્થા સામે, સંચાલકો સામે આકરા પગલાની માંગ કરાઈ છે. આ વિશે સમાજના યવા આગેવાન દિવ્યેશ ચંદ્રવાડિયાએ જણાવ્યું કે, આહીર સમાજ દ્વારા શનિવારે ઉપલેટા મામલતદારને સોમવારે અને જૂનાગઢ મામલતદારને આવેદન પત્ર આપશે. હોસ્ટેલમાં વિદ્યાર્થીઓ મોબાઈલ લઈ આવે અને અગાઉ પણ આ સંસ્થામાં અન્ય વિદ્યાર્થીઓ સાથે ખરાબ વર્તન થયું છે અને વિદ્યાર્થીઓનું માનસિક ટોર્ચર થાય છે છતાં સંસ્થાના સંચાલકો ચૂપ છે. આહીર સમાજની માંગ છે કે સંસ્થા અને હોસ્ટેલ સંચાલકો ઉપર કડક કાર્યવાહી થાય.
)