 "સરેન્ડરમાં સ્વાગત! સિંઘમ સ્ટાઈલમાં પોલીસ સ્ટેશનમાં હાજર થયેલા દેવાયત ખવડનું પોલીસ સાથે ‘સ્નેહમિલન’")
Gir Somnath News ગીર સોમનાથ : જામીન રદ થયા બાદ ગુરુવારે અડધી રાતે ડાયરાના કલાકાર તલાલા પોલીસ સ્ટેશનમાં હાજર થાય છે. પરંતું અહીં એવું કંઈક થાય છે જેનાથી ખાખી વર્દી પર સવાલો ઉભા થયા છે. તલાલા પોલીસ સ્ટેશન જાણે દેવાયત ખવડના સ્વાગત માટે હાજર હોય તેવા દ્રશ્યો જોવા મળ્યા.
બબાલ મામલે લોક કલાકાર દેવાયત ખવડે તાલાલા પોલીસ સમક્ષ સરેન્ડર કર્યુ. ખવડના સાગરિતો રાત્રે 9 વાગ્યે સરેન્ડર થયા હતા. જ્યારે દેવાયત ખવડે રાત્રે દોઢ વાગ્યે તલાલા પોલીસ સ્ટેશનમાં સરેન્ડર કર્યું હતું. પરંતું સરેન્ડર સમયે આરોપી અને પોલીસ વચ્ચે સાંઠગાંઠના દ્રષ્યો જોવા મળ્યા. ગાયક કલાકાર દેવાયત ખવડનો પોલીસકર્મીને ગળે મળતો વીડિયો સામે આવ્યો છે. તાલાલા પોલીસ સ્ટેશનમાં ખવડના આત્મસમર્પણ સમયના વીડિયોથી અનેક સવાલો ઉઠ્યા છે.
દેવાયત ખવડ જ્યારે પોલીસ સ્ટેશનમાં હાજર થયા ત્યારે કથિત રીતે એક પોલીસ કર્મી ઊભા ઊભા જ ગળે મળ્યા હતા. પોલીસ અને આરોપી વચ્ચે ગમે તેટલી મિત્રતા હોય, તો પણ પોલીસ સ્ટેશનની મર્યાદા ધ્યાનમાં રાખવી પડે. કેટલાક પોલીસ કર્મીઓ દેવાયત ખવડને જાણે વર્ષો પછી મળેલા મિત્ર તરીકે ગળે મળતા નજરે પડ્યા. બીજી તરફ, દેવાયત ખવડ પણ બિન્દાસ્ત રીતે જાણે સિંઘમના રોલ હોય તે રીતે સરેન્ડર કરતા જોવા મળ્યો. સરેન્ડર સમયે આરોપી ન હોય તેવું દેખાયું હતું.
આખરે કેમ દેવાયતનું સ્વાગત પોલીસ સ્ટેશનમાં કોઈ મોટા માણસની જેમ કરાયું, એક આરોપી સાથે આવો સ્નેહભર્યો મિલાપ કેમ તે વિશે અનેક સવાલો પેદા થયા છે.
દેવાયતના જામીન રદ કરાયા હતા
ગઈકાલે દેવાયત ખવડના જામીન રદ કરવામાં આવ્યા છે. આ મામલે કોર્ટમાં ચાલી રહેલી સુનાવણી દરમિયાન મહત્વના વળાંક આવ્યા છે. તાલાલા પોલીસ દ્વારા દેવાયત ખવડના જામીન સામે વાંધો ઉઠાવવામાં આવ્યો હતો. પોલીસે કોર્ટમાં રજૂઆત કરી કે આરોપી જામીન પર મુક્ત રહેશે તો કેસની તપાસમાં વિક્ષેપ આવી શકે છે અને કાયદો-વ્યવસ્થાની પરિસ્થિતિ પણ પ્રભાવિત થવાની શક્યતા છે. પોલીસના આ વાંધાને ધ્યાનમાં લઈ કોર્ટએ દેવાયત ખવડના જામીન રદ કરવાનો નિર્ણય લીધો.
વિશેષ વાત એ રહી કે દેવાયત ખવડના વકીલે પણ જામીન રદ કરવાની પોલીસની માંગ સામે કોઈ વિરોધ નોંધાવ્યો નહોતો. પરિણામે કોર્ટએ જામીન રદ કરવા માટેનો નિર્ણય વધુ મજબૂત બની ગયો. આગળની કાર્યવાહી તરીકે દેવાયત ખવડે તાલાલા પોલીસ સામે "સરેન્ડર" કર્યું. એટલે કે કાયદાકીય પ્રક્રિયા હેઠળ પોતાને પોલીસ સમક્ષ હાજર કર્યું.
)