 "ગુજરાતના દરિયાકાંઠે કોસ્ટગાર્ડનું મોટું એલર્ટ, શક્તિશાળી લો પ્રેશર આગળ વધી રહ્યું છે, વાવાઝોડા જેવું ફૂંકાશે")
Gujarat Weather Forecast ; સવારે 6 વાગ્યાથી લઈને રાજ્યના 216 તાલુકામાં સાર્વત્રિક વરસાદ થયો છે. બનાસકાંઠાના સુઈગામમાં સૌથી વધુ સાડા 10 ઈંચ વરસાદ નોંધાયો. તો વાલોડમાં સવા 4 અને કપરાડામાં 4 ઈંચ વરસ્યો. વ્યારામાં 4 અને વાવમાં પોણા 4 ઈંચ વરસ્યો. 90 તાલુકામાં 1 ઈંચ કરતાં વધુ વરસાદ રહ્યો. હજુ 2 દિવસ ભારે વરસાદની આગાહી છે. પરંતું આ વચ્ચે ભારતીય કોસ્ટગાર્ડે ચેતવણી જાહેર કરી છે, તો હવામાન વિભાગે પણ નાવકાસ્ટ જાહેર કર્યું છે.
માછીમારો માટે ચેતવણી જાહેર કરતું ભારતીય કોસ્ટ ગાર્ડ
ભારતીય હવામાન વિભાગ (IMD) એ બહુવિધ જોખમી ચેતવણી જાહેર કરી છે, જેમાં રહેવાસીઓને અનેક પ્રદેશોમાં ભારે વરસાદ, વાવાઝોડા, વીજળી અને તીવ્ર સપાટ પવનોની ચેતવણી આપવામાં આવી છે. જેને લઈને કોસ્ટ ગાર્ડ પણ એલર્ટ બન્યું છે. ભારતીય કોસ્ટ દ્વારા આગાહીના કેન્દ્રમાં દક્ષિણ રાજસ્થાનના મધ્ય ભાગો પર એક સ્પષ્ટ નીચા દબાણનો વિસ્તાર છે, જે 7 સપ્ટેમ્બરની સવાર સુધીમાં દક્ષિણ રાજસ્થાન અને નજીકના ઉત્તર ગુજરાત પર ડિપ્રેશનમાં કેન્દ્રિત થવાથી ચેતવણી જાહેર કરવામાં આવી છે. ચેતવણી ધ્યાનમાં દરિયામાં ફરતા તમામ વેપારી જહાજો, માછીમારી જહાજો અને અન્ય જહાજોને જાહેર કરવામાં આવી છે. બધા વેપારી જહાજોને સાવચેતી રાખવા અને વિકસિત હવામાન પરિસ્થિતિઓ પર નજર રાખવાની સલાહ આપવામાં આવી છે. વધુમાં, માછીમારોને નજીકના બંદર પર પાછા ફરવા માટે સતત ચેતવણી જારી કરવામાં આવી રહી છે.
ઓખા ખાતે કોસ્ટ ગાર્ડ જિલ્લાના ડીઆઈજી મનજીત સિંહ ગિલે તમામ માછીમારી જહાજોને વિલંબ કર્યા વિના નજીકના બંદર પર પાછા ફરવા વિનંતી કરી છે. તેમજ દરિયાકાંઠાના રહેવાસીઓ અને માછીમાર સમુદાયોને સતર્ક રહેવા અને ભારતીય કોસ્ટ ગાર્ડ અને સ્થાનિક અધિકારીઓ દ્વારા જારી કરાયેલી સલાહનું પાલન કરવા પણ વિનંતી કરી છે.
કોસ્ટ ગાર્ડ અને સ્થાનિક અધિકારીઓએ માછીમારોને તાત્કાલિક દરિયાકિનારે પરત ફરવા અને સલામત રહેવા સૂચના અપાઈ છે. ભારતીય હવામાન વિભાગ (IMD) એ અત્યંત ગંભીર હવામાન ચેતવણી જાહેર કરી છે. શક્તિશાળી લો પ્રેશર એરિયા તરફ વધી રહ્યું છે. આગામી 24 કલાકમાં ડિપ્રેશનમાં ફેરવાઈને આગળ વધવાની શક્યતા છે. આવતીકાલે ભારે વરસાદ, વીજળી અને તેજ પવન ફૂંકાવાની આગાહી કરવામાં આવી છે. દરિયાકાંઠાના રહેવાસીઓને પણ સતર્ક રહેવાની અપીલ કરવામાં આવી છે.
હવામાન વિભાગે જાહેર કર્યું નાવકાસ્ટ
હવામાન વિભાગે નાવકાસ્ટ જાહેર કરી આગામી 3 કલાક માટે ગુજરાતભરમાં વરસાદની આગાહી કરી છે. ક્યાંક રેડ, તો ક્યાંક ઓરેન્જ એલર્ટ આપવામાં આવ્યું છે. બનાસકાંઠા, દેવભૂમિ દ્વારકા, કચ્છ, મોરબી, જામનગર, પાટણ, સુરેન્દ્રનગર, રાજકોટમાં છૂટાછવાયા સ્થળોએ ગાજવીજ અને ભારે વરસાદ સાથે રેડ એલર્ટ આપવામાં આવ્યું છે.
જ્યારે કે, પોરબંદર, જુનાગઢ, ગીર સોમનાથ, દિવ, અમરેલી, ભાવનગર, બોટાદ, અમદાવાદ, મહેસાણા, ગાંધીનગર, સાબર કાંઠા, અરવલ્લી, ખેડા, આણંદ, મહિસાગર, પંચમહાલ, દાહોદ, છોટા ઉદેપુર, વડોદરા, ભરૂચ, નર્મદા, સુરત, તાપી, ડાંગ, નવસારી, વલસાડ, દમણ, દાદર અને નગર હવેલીમાં મધ્યમ વરસાદ સાથે ઓરેન્જ એલર્ટ અપાયું.
)