 "કેશોદના યુવક આપઘાત કેસમાં રાજકીય મોટા માથાનું નામ ખૂલ્યું! તેણે કહ્યું, મને મરવા મજબૂર કર્યો")
)
Junagadh News : જુનાગઢના કેશોદ તાલુકાના પંચાળા ગામમા એક યુવકે ગળેફાંસો ખાઈ આપઘાત કરી લીધો હતો. ત્યારે હવે પંચાળા ગામના યુવકના આપઘાત મામલે રાજકીય ખળભળાટ મચી ગયો છે. પોલીસ તપાસમાં વધુ એક રાજકિય આગેવાનની સંડોવણી ખુલી છે.
કેશોદના પંચાળા ગામના નાગજીભાઈ મકનભાઈ ચુડાસમાએ ગળાફાંસો ખાઈ આપઘાત કર્યો હતો. ત્યારે પોલીસ તપાસમાં વધુ એક રાજકીય આગેવાનની સંડોવણી ખુલી છે. મુખ્ય આરોપી તરીકે ભાજપના તાલુકા પંચાયત પ્રમુખ પતિ ભનુ ઓડેદરા હોવાનું ખૂલ્યું છે. પોલીસે અગાઉ 2 વિરૂદ્ધ ફરિયાદ નોંધી હતી. પોલીસ તપાસમાં વધુ એક આરોપી તરીકે રાજકીય મોટા માથાનું નામ ખૂલ્યું છે.
આપઘાત કરનારે આત્મ હત્યાનું કરવાનું કારણ બતાવતો વીડિયો બનાવ્યો હતો. પોલીસને હાથ લાગેલ વીડિયોમાં વધુ એક આરોપીનું નામ સામે આવ્યું છે. આરોપી તાલુકા પંચાયત પ્રમુખના પતિ ભરતભાઈ ઉર્ફે ભનુભાઈ ઓડેદરા મુખ્ય આરોપી હોવાનું સામે આવતાં તેમના વિરૂદ્ધ પોલીસે ફરિયાદ નોંધી છે.
ગત તારીખ 7 ના રોજ પંચાળા ગામના નાગજીભાઈ ચુડાસમાએ ગળાફાંસો ખાઈ આત્મહત્યા કરી હતી. નાગજીભાઇના પત્ની રેખાબેને ભરત ઉર્ફ ભુરો કાન્તભાઈ ચાંચિયા અને કરસનભાઈ સોલંકી વિરૂદ્ધ ફરિયાદ નોંધાવી હતી. જેમાં આરોપી ભરત ઉર્ફે ભુરાએ તેમના પતિની બાઈક સળગાવી હતી. જયારે મૃતકે આરોપી કરસન સોલંકી પાસે વેચવા આપેલ ટ્રેકટરના 2 લાખ 60 હજાર માંગતો હોય જે આરોપીએ ન આપતાં આર્થિક તંગીથી માનસિક પીડાતો હોઈ આપઘાતનું પગલું ભર્યાનું જણાવ્યું હતું. મૃતક યુવકે વીડિયો મારફત ‘પૈસા નથી મજૂરી કરૂ છું ન્યાય મળે...’ તેવી માંગ કરી હતી.
યુવકે વીડિયોમાં શું કહ્યું...
નાગજી ચુડાસમાની આત્મહહત્યા બાદ પોલીસને તેના મોબાઈલમાંથી વીડિયો મળી આવ્યા હતા. જેમાં પોતે ભાનુ ઓડેદરા સહિત ત્રણ લોકોના ત્રાસના કારણે આ પગલું ભરી રહ્યો હોવાનું જણાવી રહ્યો છે. આ વીડિયોમાં મૃતકે સ્પષ્ટ શબ્દોમાં જણાવ્યું હતું કે, પોતાની આત્મહત્યાનું મુખ્ય કારણ તાલુકા પંચાયત પ્રમુખના પતિ ભરત ઉર્ફે ભાનુભાઈ ઓડેદરા છે. વીડિયોમાં મૃતકે ભાનુ ઓડેદરા અને ભૂરો ચાંચિયા પર ગંભીર આક્ષેપો કરતાં જણાવ્યું હતું કે, “ભૂરો મને મારવાની કોશિશ કરે છે અને ભાનુ ઓડેદરા તો આ કૃત્યના મુખ્ય જવાબદાર છે. પરિવારનો કોઈ દોષ નથી, પરંતુ આ આરોપીઓના કૃત્યોને લીધે તે જીવનનો અંત લાવી રહ્યો છે.
પોલીસ તંત્રએ જણાવ્યું છે કે મૃતકે બનાવેલા વીડિયો અને ફરિયાદીના નિવેદનના આધારે આગળની કાયદેસરની કાર્યવાહી હાથ ધરવામાં આવી રહી છે અને કોઈપણ દબાણ વિના તપાસ પૂર્ણ કરવામાં આવશે.
