 "ખેડાથી અત્યારના સૌથી મોટા સમાચાર : મહીસાગર નદીમાં છોડાશે પાણી, આ ગામોને એલર્ટ કરાયા")
Kheda News : ખેડાથી અત્યારના સૌથી મોટા સમાચાર સામે આવ્યા છે. ઉપરવાસમાં ભારે વરસાદના કારણે ખેડા જિલ્લાના વણાકબોરી ડેમમાંથી પાણી છોડવામાં આવશે. પાનમ ડેમ અને કડાણા ડેમ વણાકબોરી વીયરમા પાણી છોડવામાં આવી રહ્યું છે. જેથી મહીસાગર નદીમાં પાણીની આવક વધતા નીચાણવાળા ગામો અને નદી કિનારે આવેલા ગામોને સાવચેત કરવામાં આવ્યા. તેમજ ખેડા જિલ્લા કલેકટર દ્વારા ઈમરજન્સી નંબરો આપવામાં આવ્યા છે .
ગળતેશ્વર-ઠાસરામાં એલર્ટ
ખેડા જિલ્લા કલેક્ટપ અમિત પ્રકાશ યાદવે ટ્વિટ કરીને આ જાણકારી આપી છે કે, આજે રાત્રે 11:30 કલાકે વણાકબોરી ડેમમાંથી ત્રણ લાખ 50 હજાર ક્યુસેક પાણી મહીસાગર નદી છોડવામાં આવશે. તેથી ગળતેશ્વર અને ઠાસરા તાલુકાના ગામોને સાવચેત કરવામાં આવ્યા છે. ગળતેશ્વર અને ઠાસરા તાલુકાના નાગરિકોને નદી કિનારેથી દૂર અને સુરક્ષિત સ્થાનો પર ખસી જવા જણાવ્યું છે.
ભારે વરસાદને કારણે, મહી નદીના કડાણા અને પાનમ ડેમમાંથી અંદાજે 3.5 લાખ ક્યુસેક જેટલું પાણી છોડવામાં આવનાર છે, જે અંદાજે 11:30 કલાકે વણાકબોરી વિયર પાસે પહોંચશે. ઠાસરા અને ગલતેશ્વર તાલુકાના નાગરિકોને નદી કિનારેથી દૂર રહેવા અને તથા સુરક્ષિત સ્થાનો પર ખસી જવા વિનંતી છે. (૧/૨)
— Collector Kheda (@collectorkheda) September 4, 2025
અધિકારીઓને હેડક્વાર્ટર ન છોડવા અપીલ
ખેડા જિલ્લાના કલેકટરે અપીલ કરી કે, કોઈપણ વ્યક્તિએ ગળતેશ્વર અને ઠાસરા તાલુકામાં આવતા નદી કિનારે આવેલ ખેતરો અને નીચાણવાળા વિસ્તારોમાં ન જવું. ખેડા જિલ્લાના તમામ તાલુકાના મામલતદાર અને તલાટી અધિકારીઓને હેડક્વોટર ન છોડવા સૂચના આપવામાં આવી છે. મહીસાગર નદીમાં પાણીની આવક વધતા નીચાણવાળા ગામો અને નદી કિનારે આવેલા ગામોને સાવચેત કરવામાં આવ્યા છે.
આપાતકાલીન પરિસ્થિતિમાં નીચે આપેલા જીલ્લા કંટ્રોલ રૂમનો સંપર્ક કરવા વિનંતી.
૧૦૭૭
૦૨૬૮- ૨૫૫૩૩૫૬/૫૭. (૨/૨) @CMOGuj @SEOC_Gujarat @InfoGujarat @infokhedagog— Collector Kheda (@collectorkheda) September 4, 2025
જરૂરિયાતમાં ઈમરજન્સી નંબર જાહેર
સાથે જ આપાતકાલીન પરિસ્થિતિ માટે ખેડા જિલ્લા ઈમરજન્સી કંટ્રોલરૂમ શરૂ કરવામાં આવ્યો છે. ખેડા જિલ્લા કલેકટર દ્વારા ઈમરજન્સી નંબરો આપવામાં આવ્યા છે. પૂરગ્રસ્ત વિસ્તારોના લોકો 0268 2553356/57 નંબર પર સંપર્ક કરીને સહાય માંગી શકે છે.
ઉપરવાસમાંથી થયેલ આવકના પગલે કડાણા ડેમમાંથી ક્રમશ પાણી વધારી 292899 ક્યુસેક પાણી છોડવામાં આવ્યું છે. કડાણા ડેમના કુલ 13 ગેટ ખોલવામાં આવ્યા છે.
નીચાણવાળા વિસ્તારોને એલર્ટ કરવામાં આવ્યા
26 ગામોને એલર્ટ કરાયા
આ વિશે માહિતી આપતા આણંદ કલેક્ટર પ્રવીણ ચૌધરીએ જણાવ્યું કે, આજે કડાણા ડેમમાંથી 3 લાખ કયુસેક પાણી છોડવામાં આવશે. આવતીકાલે સવારથી મહિસાગર નદીની જળસપાટી વધવાની સંભાવના છે. પાનમ ડેમમાંથી 67162 કયુસેક પાણી આવી રહ્યું છે. મહિસાગર નદીમાં 3,67,162 કયુસેક પાણી છોડવામાં આવશે. સીઝનમાં પ્રથમ વાર મહીસાગર નદીમાં 3.67 લાખ કયુસેક પાણી છોડાશે. રાત્રે 12 કલાકે વણાકબોરી વિયરની સપાટી 237 ફુટ વ્હાઈટ સિગ્નલે જવાની સંભાવના છે. જેથી આણંદ જિલ્લાનાં મહિસાગર નદી કાંઠાનાં 26 ગામોને એલર્ટ કરાયા છે. બોરસદનાં ગાજણા, સારોલ, કંકાપુરા, નાની શેરડી, કોઠીયાખાડ, દહેવાણ, બદલપુર, વાલવોડ ગામોને એલર્ટ કરાયા છે. તો આણંદનાં ખાનપુર, ખેરડા, આંકલાવડી, રાજુપુરા ગામોને સાવચેત કરાયા છે.
ઉમરેઠનાં પ્રતાપપુરા, ખોરવાડ ગામોને એલર્ટ કરાયા છે. આંકલાવનાં ચમારા, બામણગામ, ઉમેટા, ખડોલ (ઉમેટા), સંખ્યાડ,ગામોને સાવચેત કરાયા. કહાનવાડી, આમરોલ, ભાણપુર, આસરમા, નવાખલ, ભેટાસી વાંટો અને ગંભીરા ગામોને સાવચેત કરાયા છે. પશુપાલકોને પશુઓ લઈ ભાઠામાં નહી જવા સાવચેત કરાયા. તો ખેડુતોને ભાઠામાં આવેલા ખેતરોમાં નહી જવા સુચનાઓ અપાઈ છે.
)