 "ગમે ત્યારે નર્મદા નદીમાં પૂર આવશે, ચાંદોદ ખાતે ભયજનક સપાટીએ પહોંચી, 3 જિલ્લાઓને એલર્ટ અપાયું")
Narmada River Flood ચિરાગ જોશી/ડભોઈ : વડોદરાના ચાંદોદમાં નર્મદા નદી ભયજનક સપાટીએ પહોંચી ગઈ છે. નર્મદામાંથી પાણી છોડાતા કાંઠાના ગામોમાં પૂર જેવી સ્થિતિ સર્જાઈ છે. મહાલરાવ ઘાટના 108 પૈકી 81 પગથિયા પાણીમાં ગરકાવ થઈ ગયા છે. નાવિકો દ્વારા નદીમાં નાવડીઓ સ્ટેન્ડ બાય રાખવામાં આવી છે. લોકોએ પૂરની સ્થિતિને પહોંચી વળવા તૈયારીઓ કરી છે. તો શ્રાદ્ધ પક્ષને લઈને બ્રાહ્મણોએ તંત્રને રજૂઆત કરી છે.
સરદાર સરોવર નર્મદા ડેમની સ્થિતિના લેટેસ્ટ અપડેટ
3 જિલ્લાઓને એલર્ટ અપાયું
આજે રાત્રે 8 કલાકથી ગેટ મારફતે 4,00,000 કયુસેક અને પાવરહાઉસ મારફતે 45,000 ક્યુસેક મળી કુલ 4,45,000 કયુસેક પાણી નદીમાં છોડવાનો નિર્ણય કરાયો છે. જેથી નર્મદા, વડોદરા અને ભરૂચ જિલ્લાના કાંઠા વિસ્તારોને સાવધ રહેવા એલર્ટ અપાયું છે. ત્રણેય જિલ્લા કલેક્ટરને સરદાર સરોવર નર્મદા નિગમ દ્વારા જાણ કરાઈ છે.
શ્રાદ્ધ પક્ષ પહેલા પાણી છોડવા બ્રાહ્મણોની અપીલ
યાત્રાધામ ચાંદોદ ખાતે પસાર થતી નર્મદા નદી ભયજનક સપાટીએ પહોંચી ગઈ છે. નર્મદા ડેમમાંથી પાણી છોડતા કાંઠાના ગામોમાં પૂર જેવી સ્થિતિ સર્જાઈ છે. ચાંદોદના ઐતિહાસિક મહાલરાવ ઘાટના 108 પૈકી 81 પગથિયા પાણીમાં ગરકાવ થયા છે. નાવિકો દ્વારા નર્મદા નદીમાં નાવડીઓ સ્ટેન્ડ બાય રાખી દેવાઈ છે. તો ચાંદોદના ગ્રામજનો દ્વારા પાણીને લઈને તૈયારીઓ શરૂ કરાઈ છે. નર્મદા ડેમમાંથી રાત્રીથી અત્યાર સુધી 7 લાખ કયુસેક પાણી છોડાયું છે. જેથી ચાંદોદના બ્રાહ્મણો દ્વારા મીડિયાના મારફતે તંત્રને રજૂઆત કરાઈ છે. શ્રાદ્ધ પક્ષને લઈને પાણી વહેલી તકે છોડવા રજૂઆત કરાઈ છે. શ્રાદ્ધ પક્ષ દરમિયાન લાખોની સંખ્યામાં ભક્તો માતૃ પિતૃ તર્પણ કરે છે.
બીજી બાજુ ઈન્દિરા ડેમમાંથી પણ પાણી છોડાયું
ઉપરવાસમાં વરસાદને લઈને નર્મદા ડેમમાંથી ગઈકાલે રાત્રિથી અત્યાર સુધી સાત લાખ ક્યુસેક પાણી નર્મદા નદીમાં છોડવામાં આવ્યું છે. જેને લઈને નર્મદા નદી પોતાના રૌદ્ર સ્વરૂપમાં આવી ગઈ છે. ત્યારે નર્મદાના કાંઠાના 27 જેટલા ગામોને એલર્ટ પર મૂકવામાં આવ્યા છે. સાથે સાથે તમામ ગામોની અંદર તલાટી કમ મંત્રીને ગામમાં રહેવાની સૂચના આપી દેવામાં આવી છે. આવામાં યાત્રાધામ ચાંદોદ ખાતે ઐતિહાસિક મલ્હરાવ રાવ ઘાટના 108 પગથિયાં પૈકી 81 પગથિયાં પાણીમાં ગરકાવ થઈ ગયા છે અને હવે માત્ર 27 પગથિયાં જ બાકી રહ્યા છે. ત્યારે ગ્રામજનોએ તળાવમાં તૈયારીઓ શરૂ કરી દીધી છે. કારણ કે બીજી બાજુ ઇન્દિરા ડેમમાંથી પણ 2.21 લાખ ક્યુસેક પાણી છોડવામાં આવ્યું છે. જેના કારણે ગામમાં પાણી આવી જાય તેવી સ્થિતિનું નિર્માણ થવા પામ્યું છે.
આ કારણે ગ્રામજનો દ્વારા ઘાટ પર આવેલી દુકાનોનો સામાન ધીમે ધીમે હટાવી રહ્યા છે. સાથે સાથે ગ્રામજનો દ્વારા પૂરની સ્થિતિમાં કોઈ અનિચ્છનીય બનાવ ના બને તે દિશામાં હાલ તૈયારીઓ શરૂ કરી છે. નાવિક મંડળ દ્વારા પણ નાવડીયો નર્મદા નદીમાં ન ચલાવવામાં આવી સાથે સાથે યાત્રિકોને બેસાડવામાં નથી આવતા. કારણ કે કોઈ અનઇચ્છનીય બનાવ ન બને તે માટેની તકેદારીના પગલાં લેવામાં આવ્યા છે.
એટલું જ નહીં ચાંદોદના બ્રાહ્મણો દ્વારા મીડિયાના માધ્યમથી સરકારને રજૂઆત કરવામાં આવી છે કે આગામી સમયમાં શ્રાદ્ધ પક્ષની શરૂઆત થવાની છે તેવામાં પાણી જેટલું બને એટલું અત્યારે છોડી દેવામાં આવે. કારણ કે શ્રાદ્ધ પક્ષ દરમિયાન લાખોની સંખ્યામાં ભક્તો યાત્રાધામ ચાંદોદ ખાતે આવે છે અને માતૃ અને પિતૃ તર્પણ કરી ધન્યતા અનુભવે છે. જેથી તંત્ર દ્વારા તકેદારીના પગલાં લેવામાં આવે તેવી માંગ કરવામાં આવી છે. પરંતુ હાલ હવામાન વિભાગ દ્વારા પણ વરસાદની આગાહી કરવામાં આવી છે. જેના પગલે કેવા પ્રકારની પરિસ્થિતિ આગામી સમયની અંદર સર્જાશે તે જોવાનું રહ્યું.
સરદાર સરોવર ડેમ અપડેટ, આજે રાતે પાણી છોડાશે
સરદરા સરોવાર ડેમના પાણીની આવકમાં વધારો નોંધાતા આજે રાત્રે 8 કલાકથી ગેટ મારફતે 4,00,000 કયુસેક અને પાવરહાઉસ મારફતે 45,000 ક્યુસેક મળી કુલ 4,45,000 કયુસેક પાણી નદીમાં છોડવાનો નિર્ણય કરાય છે. હાલ પાણીની આવક 4.59 લાખ ક્યુસેક છે.
સરદાર સરોવર ડેમમાંથી પાણી છોડાશે. જેથી નર્મદા, વડોદરા અને ભરૂચ જિલ્લાના કાંઠા વિસ્તારોને સાવધ રહેવા એલર્ટ અપાયું છે. ત્રણેય જિલ્લા કલેક્ટરને સરદાર સરોવર નર્મદા નિગમ દ્વારા જાણ કરાઈ છે.
)