 "ચેતી જજો! ગુજરાતના આ શહેરમાં જીવલેણ રોગચાળો બેકાબુ! 7 વર્ષીય સ્વસ્થ બાળકીનું બે દિવસમાં મોત")
Surat News: સુરત શહેરમાં રોગચાળાનો કહેર યથાવત છે અને વધુ એક નિર્દોષ બાળકી તેનો ભોગ બની છે. રાંદેર વિસ્તારમાં રહેતી એક 7 વર્ષીય બાળકીનું માત્ર બે દિવસના તાવ બાદ અચાનક અવસાન થતાં તેના પરિવારમાં શોક છવાઈ ગયો છે. આ ઘટનાએ શહેરમાં આરોગ્ય વ્યવસ્થા અને રોગચાળાના ફેલાવા અંગે ફરી એકવાર ચિંતા ઊભી કરી છે.
આ ઘટનાની મળતી માહિતી પ્રમાણે, રામ નગરમાં રહેતી 7 વર્ષીય ક્રિષ્ના સોલંકીને બે દિવસથી સતત ઉલટી અને તાવ આવી રહ્યો હતો. બાળકીની તબિયત બગડતાં તેના પરિવારે તેને તાત્કાલિક ઘર નજીકના દવાખાને સારવાર માટે દાખલ કરી હતી. જોકે દવા કરાવ્યા છતાં તબિયતમાં કોઈ સુધારો ન થતાં પરિસ્થિતિ વધુ ગંભીર બનતાં તેને વધુ સારવાર માટે સુરતની સિવિલ હોસ્પિટલમાં ખસેડવામાં આવી હતી.
7 વર્ષીય ક્રિષ્નાને દુર્ભાગ્યવશ સિવિલ હોસ્પિટલ ખસેડવામાં આવી ત્યાં સુધીમાં ઘણું મોડું થઈ ગયું હતું. તબીબોએ બાળકીને તપાસતા તેને મૃત જાહેર કરી હતી. બાળકીના પરિવારજનોના જણાવ્યા મુજબ, ક્રિષ્નાને કોઈ પણ પ્રકારની ગંભીર બીમારી નહોતી અને તેનું આરોગ્ય એકદમ સારું હતું. અચાનક બે દિવસના તાવ બાદ આ રીતે મોત થતાં પરિવારજનો ગમગીન થઈ ગયા છે.
આ ઘટના અંગે રાંદેર પોલીસે અકસ્માત મૃત્યુનો ગુનો નોંધી વધુ તપાસ હાથ ધરી છે. રોગચાળાના આ સમયગાળામાં આવા બનાવો ચિંતાજનક છે. સ્થાનિક આરોગ્ય વિભાગ અને વહીવટી તંત્ર માટે આ એક ચેતવણી સમાન છે કે રોગચાળાને કાબૂમાં લેવા માટે વધુ અસરકારક પગલાં લેવામાં આવે. શહેરના નાગરિકોને પણ આ સમય દરમિયાન સ્વચ્છતા જાળવવા અને તબિયત બગડે તો તાત્કાલિક ડોક્ટરનો સંપર્ક કરવા અપીલ કરવામાં આવે છે.
)