પાળતૂ શ્વાન બન્યો રિયલ હીરો, હુમલાખોરોથી માલિકને બચાવવા શ્વાને ખેલ્યો ખરાખરીનો જંગ

Morbi News હિમાંશુ ભટ્ટ/મોરબી : શ્વાન... એક એવો જીવ, જેની વફાદારીની કહાનીઓ આપણે સદીઓથી સાંભળતા આવ્યા છીએ. ક્યારેક તેમનું બચકું ભરવું જીવલેણ બની જાય છે, તો ક્યારેક તેમની હાજરી જીવનનો આધાર બની જાય છે. આજે અમે તમને એવી જ એક ઘટનાની વાત કહીશું, જે મોરબી જિલ્લાના મીતાણા ગામમાં બની. જ્યાં એક પાલતુ શ્વાને પોતાના માલિકનો જીવ બચાવી, વફાદારીનું એક અનોખું ઉદાહરણ પૂરું પાડ્યું. આ ઘટના ન માત્ર હૃદયસ્પર્શી છે, પરંતુ એક એવો સંદેશ પણ આપે છે કે શ્વાન માત્ર પાળેલું નથી હોતું, એ પરિવારનો હિસ્સો બની જાય છે. ચાલો, જાણીએ આ ઘટનાને Zee 24 કલાકના આ ખાસ અહેવાલમાં..."

"મોરબી જિલ્લાના ટંકારા તાલુકાનું મીતાણા ગામ. ડેમની નજીક આવેલો એક શાંત વાડી વિસ્તાર, જ્યાં રાતની નિરવ શાંતિમાં એક ચોંકાવનારી ઘટના બની. અમિતભાઈ રહીમભાઈ ઠેબા, એક સામાન્ય ખેડૂત, જે પોતાની વાડીના ઘરની બહાર સૂતા હતા. તેમની સાથે તેમની પત્ની અને નવ વર્ષનો દીકરો પણ હતા. પણ રાતના ત્રણ વાગ્યાના અંધારામાં, અજાણ્યા ત્રણ શખ્સોએ અમિતભાઈ પર હુમલો કર્યો. લોખંડની વસ્તુઓથી તેમના માથા અને શરીર પર આડેધડ પ્રહારો થયા. જીવ બચાવવા માટે અમિતભાઈએ ઘણા પ્રયાસો કર્યા, પણ હુમલાખોરોનો હુમલો ચાલુ જ રહ્યો. આ નિર્દય હુમલાની વચ્ચે, એક નાનકડો હીરો આગળ આવ્યો – અમિતભાઈનો પાલતુ શ્વાન ‘જોની’. જોનીએ ન માત્ર પોતાના માલિકને બચાવ્યો, પણ હુમલાખોરોને નાસી જવા મજબૂર કર્યા."

"આ ઘટના યાદ કરાવે છે વર્ષો પહેલાં આવેલી હિન્દી ફિલ્મ ‘તેરી મહેરબાનીયા’ની, જેમાં શ્વાનની વફાદારીની કહાની બતાવવામાં આવી હતી. આજે, મીતાણા ગામમાં જોનીએ આ કહાનીને વાસ્તવિકતામાં બદલી દીધી. રાતના ત્રણ વાગ્યે, જ્યારે હુમલાખોરોએ અમિતભાઈ પર હુમલો કર્યો, ત્યારે તેમની પત્ની અને દીકરાની ચીસો ગુંજી ઉઠી. ઘરની અંદર બાંધેલો જોની ભસવા લાગ્યો. અમિતભાઈ, પોતાનો જીવ બચાવવા માટે, જોનીને બાંધેલી જગ્યા સુધી પહોંચ્યા અને તેને છૂટો કર્યો. બસ, પછી જોનીએ હુમલાખોરો પર એવી દોટ મૂકી કે તેઓ દિવાલ કૂદીને નાસી છૂટ્યા. આ સમગ્ર ઘટના સીસીટીવીમાં કેદ થઈ, જે હવે પોલીસ તપાસનો હિસ્સો બની છે."

હુમલાખોરોના ટોળાનો ભોગ બનનાર અમિતભાઈ ઠેબા કહે છે કે, "એ રાતનો અંધારો અને હુમલાખોરોનો હુમલો... હું ભૂલી નહીં શકું. મેં જીવ બચાવવા ઘણા પ્રયાસો કર્યા, પણ તેઓ મને મારતા જ રહ્યા. મારી પત્ની અને દીકરો બૂમો પાડતા હતા. પણ જોની... એ મારો દેવદૂત બનીને આવ્યો. જોનીએ હુમલાખોરો પર તૂટી પડતાં તેઓ નાસી ગયા. જો એ ન હોત, તો આજે હું અહીં ન હોત."

"આ ઘટના 12 એપ્રિલ, 2025ની રાતની છે. અમિતભાઈએ ટંકારા પોલીસ સ્ટેશનમાં ફરિયાદ નોંધાવી, જેમાં તેમણે જણાવ્યું કે હુમલાખોરોએ લોખંડની વસ્તુઓથી તેમના માથા, મોઢા અને શરીર પર પ્રહારો કર્યા. પરિવારની ચીસો અને જોનીના ભસવાનો અવાજ હુમલાખોરોને ડરાવવા માટે પૂરતો ન હતો. પણ જ્યારે જોની છૂટો થયો, ત્યારે તેણે હુમલાખોરોની હિંમત તોડી નાખી. સીસીટીવી ફૂટેજમાં આ સમગ્ર ઘટના કેદ થઈ, જે હવે પોલીસ તપાસનો મહત્વનો પુરાવો બન્યો છે. પોલીસે આરોપીઓને પકડવા માટે તપાસ શરૂ કરી છે."

ઘટના વિશે વાંકાનેરના ડીવાયએસપી સમીર સારડાએ કહ્યું કે, આ ઘટનાની ફરિયાદ અમારી પાસે નોંધાઈ છે. સીસીટીવી ફૂટેજના આધારે અમે આરોપીઓની ઓળખ કરવાનો પ્રયાસ કરી રહ્યા છીએ. અમે જુદી-જુદી દિશામાં તપાસ હાથ ધરી છે અને ટૂંક સમયમાં આરોપીઓને પકડી લઈશું.

"અમિતભાઈ એક ખેડૂત છે, જે પોતાની વાડીમાં ખેતીની સાથે બે ઘોડીઓ પણ રાખે છે. આ ઘોડીઓને ભાડે આપીને તેઓ પોતાનું ગુજરાન ચલાવે છે. ઘોડીઓની સુરક્ષા માટે તેમણે ઘરમાં સીસીટીવી કેમેરા લગાવ્યા હતા, પણ કોણ જાણતું હતું કે આ કેમેરા એક દિવસ તેમના જીવનની સૌથી મોટી ઘટનાને કેદ કરશે? જોની, જે અમિતભાઈના પરિવારનો અભિન્ન હિસ્સો છે, તેણે પોતાની હિંમત અને વફાદારીથી બધાના દિલ જીતી લીધા. આજે ગામમાં દરેક વ્યક્તિ જોનીની બહાદુરીની વાત કરે છે. પણ સવાલ એ છે કે આ હુમલાખોરો કોણ હતા, અને તેઓ ક્યારે પકડાશે? એનો જવાબ હવે સમય જ આપશે."

જોનીની આ વફાદારીની કહાની આપણને બતાવે છે કે શ્વાન માત્ર એક પાલતુ પ્રાણી નથી, એ પરિવારનો એક એવો સભ્ય છે, જે જરૂર પડે ત્યારે પોતાના માલિક માટે જીવનું જોખમ પણ ઉઠાવી શકે છે. અમિતભાઈ અને તેમના પરિવાર માટે જોની એક હીરો છે, અને આ ઘટના દરેકના હૃદયમાં એક ખાસ જગ્યા બનાવી ગઈ છે.