PM મોદી 25-26 ઓગસ્ટે ગુજરાતની મુલાકાતે, રૂપિયા 5,400 કરોડના વિકાસ કાર્યોની આપશે ભેટ

PM Modi Gujarat Visit : પ્રધાનમંત્રી નરેન્દ્ર મોદી આવતીકાલથી બે દિવસ ગુજરાતની મુલાકાતે છે, ત્યારે આ દરમિયાન વિવિધ વિકાસ કાર્યોની ભેટ આપશે. 25 ઓગસ્ટે સાંજે 6 વાગ્યે તેઓ અમદાવાદના નિકોલમા આવેલા ખોડલધામ મેદાન ખાતે રૂપિયા 5,400 કરોડથી વધુના વિકાસ પ્રોજેક્ટોનું ઉદ્ઘાટન, ભૂમિપૂજન અને લોકાર્પણ કરશે તથા જાહેર સભાને સંબોધિત કરશે.

અમદાવાદમાં પ્રધાનમંત્રી રૂપિયા 5,400 કરોડથી વધુના વિકાસ પ્રોજેક્ટોનું ઉદ્ઘાટન અને લોકાર્પણ કરશે. આ પ્રોજેક્ટોમાં શહેરી વિકાસ, ઉર્જા, માર્ગ અને રેલવે સહિતના ક્ષેત્રોનો સમાવેશ થાય છે.

રેલવે પ્રોજેક્ટો 

રૂપિયા 1,400 કરોડથી વધુ  રેલવે પ્રોજેક્ટોમાં મહેસાણા–પાલનપુર રેલ લાઈન (65 કિ.મી.) ડબલિંગ,  કલોલ–કડી–કટોસણ રોડ (37 કિ.મી.) અને બેચરાજી–રણુજ (40 કિ.મી.) રેલ લાઈનનું ગેજ કન્વર્ઝન, કટોસણ રોડ–સાબરમતી પેસેન્જર ટ્રેનની શરૂઆત અને બેચરાજીથી કાર-લોડેડ ફ્રેઇટ ટ્રેન સેવા શરૂ કરવાના કામોનો સમાવેશ થાય છે.

માર્ગ અને પરિવહન વિકાસ 

વિરમગામ–ખુદાદ–રામપુરા રોડનું વિસ્તરણ,  અમદાવાદ–મહેસાણા–પાલનપુર રોડ પર 6-લેન અંડરપાસ, અમદાવાદ–વિરમગામ રોડ પર રેલવે ઓવરબ્રિજ. આ પ્રોજેક્ટો ઉદ્યોગિક વિકાસ, પરિવહન કાર્યક્ષમતા અને આર્થિક તકોમાં વધારો કરશે.

ઉર્જા ક્ષેત્ર 

અમદાવાદ, મહેસાણા અને ગાંધીનગરમાં ઉત્તર ગુજરાત વિજ કંપની લિમિટેડ (UGVCL) હેઠળ વિજ વિતરણ પ્રોજેક્ટોનું ઉદ્ઘાટન કરવામાં આવશે. વિજ પુરવઠાની વિશ્વસનીયતા વધારાશે, આફત દરમિયાન બ્રેકડાઉન અને આઉટેજિસ ઘટાડાશે, નેટવર્કનું આધુનિકીકરણ થશે.

શહેરી વિકાસ

અમદાવાદના રામાપીરનો ટેકરો, સેક્ટર-3 ખાતે PMAY(U) હેઠળ ઇન-સીટુ સ્લમ રિહેબિલિટેશનનો પ્રારંભ. સરદાર પટેલ રિંગ રોડ પર રોડ વાઈડનિંગ. પાણી અને ગટર વ્યવસ્થા મજબૂત કરવા મુખ્ય શહેરી પ્રોજેક્ટોનું ભૂમિપૂજન કરાશે. અમદાવાદ પશ્ચિમમાં નવા સ્ટેમ્પ્સ અને રજિસ્ટ્રેશન ભવનનું ભૂમિપૂજન અને ગાંધીનગરમાં સ્ટેટ લેવલ ડેટા સ્ટોરેજ સેન્ટરની સ્થાપના કરાશે.

26 ઓગસ્ટનો કાર્યક્રમ

26 ઓગસ્ટે સવારે 10:30 વાગ્યે પ્રધાનમંત્રી હંસલપુર ખાતે હાઈબ્રિડ બેટરી ઇલેક્ટ્રોડ્સનું સ્થાનિક ઉત્પાદન શરૂ કરશે અને બેટરી ઇલેક્ટ્રિક વાહન નિકાસને 100 દેશોમાં ફ્લેગ ઑફ કરશે. મેક ઇન ઇન્ડિયાના મહત્વપૂર્ણ સફળતાના ઉદાહરણરૂપે, પ્રધાનમંત્રી હંસલપુર ખાતે સુઝુકીની પહેલી વૈશ્વિક બેટરી ઇલેક્ટ્રિક કાર “e VITARA” ને 100થી વધુ દેશોમાં નિકાસ માટે ફ્લેગ ઑફ કરશે. ભારત સુઝુકી માટે ઇલેક્ટ્રિક વાહનોનું વૈશ્વિક મેન્યુફેક્ચરિંગ હબ બનશે. 80%થી વધુ બેટરી મૂલ્ય હવે ભારતમાં જ નિર્મિત થશે.