મહેમદાવાદની મેશ્વો નદીમાં ડૂબી જવાથી છ લોકોના મોત, નાહવા ગયા ત્યારે બની દુર્ઘટના

મહેમદાવાદઃ અમદાવાદની નજીક આવેલા મહેમદાવાદમાં આજે મોટી દુર્ઘટના સર્જાય છે. અહીંના કનીજ ગામ પાસે મેશ્વો નદીમાં ડૂબી જવાને કારણે છ લોકોના મોત થયા છે. અમદાવાદમાં રહેતા મામા-ફોઈના સંતાનો નદીમાં સ્નાન કરવા ગયા હતા, આ દરમિયાન ઊંડા પાણીમાં ડૂબી જવાને કારણે બધાના મોત થયા છે. ઘટનાની જાણ થતાં મહેમદાબાદ પોલીસ અને ફાયરની ટીમ બચાવ કામગીરી માટે પહોંચી હતી.

મામા-ફોઈના સંતાનો ડૂબ્યા
પ્રાપ્ત વિગત અનુસાર મહેમદાવાદ નજીક કનીજ ગામે આવેલી મેશ્વો નદીમાં કિશોર, કિશોરી અને યુવતી સહિત છ લોકો ન્હાવા ગયા અને ડૂબી ગયા હતા. પાણીમાં ડૂબી જવાને કારણે આ છ લોકોના મોત થયા છે. સ્થાનિક તરવૈયાની મદદથી મૃતદેહ બહાર કાઢવામાં આવ્યા હતા. સામે આવેલી વિગત અનુસાર મૃતકો અમદાવાદના રહેવાસી હતા. મ-તકોમાં જીનલ, દિવ્યા સોલંકી અને ફાલ્ગુની, યુવક ધ્રુવ અને મયુર આ બધા અમદાવાદના નરોડા વિસ્તારમાં રહેતા હતા. જ્યારે ભૂમિકા નામની એક યુવતી કનીજમાં રહેતી હતી.

આ બનાવની જાણ થતાં મહેમદાવાદના ધારાસભ્ય અર્જૂનસિંહ પણ ઘટનાસ્થળે પહોંચ્યા હતા. આસપાસના લોકોને પણ આ ઘટનાની જાઁ થતાં લોકો નદી કિનારે પહોંચ્યા હતા. આ ઘટનાને કારણે કનીજ ગામમાં ચિંતાનો માહોલ જોવા મળી રહ્યો છે. આ અંગે વાત કરતા ધારાસભ્ય અર્જૂનસિંહે જણાવ્યુ કે ડૂબી ગયેલા છ લોકોમાં કેટલાક અમદાવાદના નરોડા વિસ્તારના છે. ઘટનાની ગંભીરતા જોતા જિલ્લા પોલીસ વડા, જિલ્લા કલેક્ટર સહિતના અધિકારીઓ પહોંચ્યા હતા.