Amreli News: ગુજરાતમાં હવામાન વિભાગની આગાહી અનુસાર અમરેલી જિલ્લામાં ભારે પવન સાથે વરસાદ દરિયો તોફાની બન્યો છે. ભારે પવન અને વરસાદના કારણે જાફરાબાદ નજીક બે બોટ ડૂબી છે. જેમાંથી 10 માછીમારોનું રેસ્ક્યૂ કરવામાં આવ્યું છે. જ્યારે અન્ય માછીમારોની શોધખોળ હાથ ધરવામાં આવી છે.
)
Amreli News: ગુજરાતમાં હવામાન વિભાગ દ્વારા ભારેથી અતિભારે વરસાદની આગાહી કરવામાં આવી છે. અનેક જિલ્લામાં ભારેથી અતિભારે વરસાદનું એલર્ટ આપવામાં આવ્યું છે. સાથે જ માછીમારોને દરિયામાં ન જવા કહેવામાં આવ્યું છે.
અમરેલીનો દરિયો ભારે પવન અને વરસાદને પગલે તોફાની બન્યો છે. દરિયા તોફાની બનતા જાફરાબાદથી 18 નોટિકલ માઇલ દૂર જાફરાબાદ અને રાજપરાની બે બોટ ડૂબી ગઈ છે. જેમાં 18 માછીમારો સવાર હતા. જેમાંથી 10 માછીમારોને બચાવી લેવામાં આવ્યાં છે. જ્યારે 8 માછીમારોની શોધખોળ હાથ ધરવામાં આવી છે.
બે બોટે લીધી દરિયામાં જળસમાધી
મળતી માહિતી મુજબ જાફરાબાદની જયશ્રી તાત્કાલિક બોટ અને ગીર સોમનાથ જિલ્લાના રાજપરાની મુરલીધર બોટ દરિયામાં ડૂબી જવા પામી છે. આ બન્ને બોટમાં 9-9 માછીમારો સવાર હતા. જેમાંથી 10ને અન્ય બોટ ધારકોએ રેસ્ક્યૂ કરી બચાવી લીધા છે. તેમજ અન્ય માછીમારોની શોધખોળ હાથ ધરવામાં આવી છે. જો કે, મધ દરિયામાં ભારે પવન સાથે વરસાદ અને ખરાબ વાતાવરણના પગલે હેલિકોપ્ટર આવવું મુશ્કેલ બન્યું છે. બીજી તરફ જાફરાબાદની બોટમાંથી બચાવવામાં આવેલા 5 માછીમારોમાંથી બે માછીમારોને ઈજાગ્રસ્ત થયા છે.
જાફરાબાદ માછીમારો દ્વારા ફિશરીજ વિભાગ અને વહીવટી તંત્રને જાણ કરવામાં આવી હતી. જેથી તંત્રએ પીપાવાવ કોસ્ટગાર્ડને માહિતી આપી હતી. હાલમાં વાયરલેસ મારફતે માહિતી મંગાવવામાં આવી રહી છે. આ ઉપરાંત અન્ય માછીમારો દ્વારા પણ ડૂબેલા માછીમારોની શોધખોળ શરૂ કરવામાં આવી છે.
માછીમારોની શોધખોળ હાથ ધરી
જાફરાબાદ કોળી સમાજ બોટ એસોસિએશનના પ્રમુખ હમીર સોલંકીએ જણાવ્યું કે, બે બોટ ડૂબી છે. જેમાંથી 10 માછીમારોને બચાવી લેવામાં આવ્યા છે. જ્યારે અન્ય માછીમારોને બોટ ધારકો દ્વારા શોધખોળ કરવામાં આવી રહી છે.
વરસાદ અને ભારે પવનના કારણે સ્થિતિ ખરાબ
જાફરાબાદ ખારવા સમાજ બોટ એસોસિએશનના પ્રમુખ કનૈયાલાલ સોલંકીએ જણાવ્યું કે, હાલ વાતાવરણ ખરાબ છે. તમામ બોટ પરત આવી રહી છે. વરસાદ અને ભારે પવનના કારણે સ્થિતિ વધુ ખરાબ બની ગઈ છે. રાજુલા પ્રાંત અધિકારી મેહુલ બરાસરાએ જણાવ્યું કે, હાલમાં ખરાબ વાતાવરણના કારણે કોસ્ટગાર્ડનું હેલિકોપ્ટર જઈ શકે તેમ નથી. જેથી બોટ દ્વારા રેસ્ક્યૂ કામગીરી કરવામાં આવશે.
