 "ચેતતા નર સદા સુખી! સુરત બાદ વડોદરા ડૂબવાનો લાગ્યો ડર, શહેરને પૂરથી બચાવવા આ સરોવરને કરાશે 3 ફૂટ ખાલી")
રવિ અગ્રવાલ/વડોદરા: વડોદરા શહેરમાં ચોમાસા દરમિયાન પૂરના સંભવિત ખતરાને ટાળવા માટે વડોદરા મહાનગરપાલિકા (VMC) દ્વારા એક અભૂતપૂર્વ નિર્ણય લેવામાં આવ્યો છે. શહેરના ઇતિહાસમાં પ્રથમવાર, કોર્પોરેશન દ્વારા આજવા સરોવરનું પાણી પંપ દ્વારા ખાલી કરવાની પ્રક્રિયાનો પ્રારંભ કરવામાં આવ્યો છે. ગયા ચોમાસામાં વડોદરામાં સર્જાયેલી ભયાનક પૂરની સ્થિતિનું પુનરાવર્તન ન થાય તે માટે આ પ્રોએક્ટિવ આયોજન હાથ ધરવામાં આવ્યું છે.
14 પંપ દ્વારા પાણી સૂર્યા નદીમાં ઠાલવવામાં આવશે
પૂરની સંભવિત પરિસ્થિતિને ટાળવા માટે, વડોદરા કોર્પોરેશને આજવા સરોવર ખાતે કુલ 14 પંપ સ્થાપિત કર્યા છે. જેમાંથી 6 પંપ આજથી કાર્યરત કરી દેવામાં આવ્યા છે. આ શક્તિશાળી પંપ દ્વારા આજવા સરોવરનું પાણી સૂર્યા નદીમાં છોડવામાં આવી રહ્યું છે.
હાલમાં આજવા સરોવરની સપાટી 211 ફૂટ છે, જેને ઘટાડીને 208 ફૂટ સુધી લાવવાનો લક્ષ્યાંક રાખવામાં આવ્યો છે. આ પ્રક્રિયા સતત 3 દિવસ સુધી ચાલુ રહેશે, જેનાથી સરોવરનું પાણીનું સ્તર 3 ફૂટ જેટલું ઘટશે. ઉલ્લેખનીય છે કે, આજવા સરોવરની ભયજનક સપાટી 214 ફૂટ છે.
ગયા વર્ષના પૂરથી બોધપાઠ અને આ વર્ષે આગોતરું આયોજન
ગત ચોમાસામાં ભારે વરસાદને કારણે આજવા સરોવર અને વિશ્વામિત્રી નદી બન્ને છલોછલ ભરાઈ જતાં શહેરમાં ભયાનક પૂર આવ્યું હતું. આ પૂરના કારણે જનજીવન ભારે પ્રભાવિત થયું હતું અને વ્યાપક નુકસાન થયું હતું. આ દુષ્કર પરિસ્થિતિમાંથી બોધપાઠ લઈને પાલિકાના હોદ્દેદારો અને અધિકારીઓએ ચાલુ વર્ષે વરસાદ પહેલા જ પ્રોએક્ટિવ પગલાં લેવાનો નિર્ણય કર્યો છે. આજવા સરોવર ખાતે આજે પાલિકાના હોદ્દેદારો અને અધિકારીઓએ ઉપસ્થિત રહી, વિધિવત રીતે પૂજા કરી પંપ શરૂ કરી આજવા સરોવરમાંથી પાણી છોડ્યું હતું.
દર કલાકે 16,800 ક્યુબિક મીટર પાણી કરાશે ખાલી
આજથી શરૂ કરાયેલી આ પ્રક્રિયા હેઠળ દર કલાકે 16,800 ક્યુબિક મીટર પાણી સૂર્યા નદીમાં ઠાલવવામાં આવી રહ્યું છે. આ મોટાપાયે પાણી ખાલી કરવાની કામગીરી દ્વારા આગામી ભારે વરસાદની પરિસ્થિતિમાં આજવા સરોવર અને વિશ્વામિત્રી નદીમાં પાણીનું સ્તર નિયંત્રિત રાખી શકાય તેવી આશા રાખવામાં આવી રહી છે.
આ પગલાંથી શહેરને પૂરના પ્રકોપથી બચાવી શકાય તેવી પ્રબળ સંભાવના છે. વડોદરા મહાનગરપાલિકાનો આ નિર્ણય ખરેખર પ્રશંસનીય છે, જે શહેરના નાગરિકોની સલામતી અને સુરક્ષા સુનિશ્ચિત કરવા માટેની તેમની પ્રતિબદ્ધતા દર્શાવે છે.
)