 "Eye Flu: આંખ આવે તો ઘરે કેવી રીતે ઈલાજ કરવો ? કઈ વસ્તુથી તુરંત મળે આરામ જાણો")
)
Eye Flu Remedies: ચોમાસામાં આઈ ફ્લુ થવો સામાન્ય સમસ્યા છે. બોલ ચાલની ભાષામાં તેને આંખ આવવી પણ કહે છે. આ એક વાયરલ ઇન્ફેક્શન છે જેના કારણે આંખ લાલ થઈ જાય છે આંખમાંથી સતત પાણી નીકળે છે બળતરા થાય છે અને ખંજવાળ પણ વધી જાય છે. આંખ આવે ત્યારે વ્યક્તિને આ પ્રકારની સમસ્યાઓનો સામનો કરવો પડે છે. જો કોઈપણ વ્યક્તિને આંખ આવે તો તેને ઘરે કઈ રીતે ધ્યાન રાખવું ચાલો તમને જણાવીએ.
હેલ્થ એક્સપર્ટ અનુસાર આંખ આવે ત્યારે કેટલીક સામાન્ય બાબતોનું ધ્યાન રાખવામાં આવે તો ઝડપથી આરામ મળી જાય છે. ડોક્ટરોના જણાવ્યા અનુસાર આઈ ફ્લુ એક વાયરલ ઇન્ફેક્શન છે એટલે કે તે વાઇરસથી ફેલાય છે. સામાન્ય રીતે આંખ આવી હોય તો સાતથી આઠ દિવસમાં જાતે ઠીક થઈ જાય છે તેથી આંખ આવે તો ગભરાવાનું નહીં અને ધીરજથી કામ લેવું
ઠંડા પાણીથી આંખ સાફ કરવી
આંખ આવે ત્યારે વ્યક્તિએ દિવસમાં ચારથી પાંચ વખત ઠંડા પાણીથી આંખો સાફ કરવી. તેનાથી આંખની બળતરા અને આંખની લાલાશ ઓછી થવા લાગશે. ઠંડા પાણીથી આંખ સાફ કરવાથી સોજો પણ ઓછો થાય છે અને વાયરસની અસર પણ ઓછી કરવામાં મદદ મળે છે.
ગુલાબજળનો ઉપયોગ
ગુલાબજળ આંખને ઠંડક આપે છે દિવસમાં બે થી ત્રણ વખત આંખમાં બે બે ટીપા શુદ્ધ ગુલાબજળના નાખી શકાય છે. જોકે આ પહેલા ડોક્ટર સાથે વાત કરી લેવી. આમ તો ગુલાબજળ આંખમાં નાખવાથી આંખને ઠંડક મળે છે અને ખંજવાળથી રાહત મળે છે. ગુલાબ જળ એન્ટિસેપ્ટિક ગુણથી ભરપૂર હોય છે પરંતુ જરૂરી છે કે ગુલાબજળ શુદ્ધ હોય.
આઈ ડ્રોપ
ઘરે આ રીતે ધ્યાન રાખવા પછી પણ આંખની તકલીફ ઓછી ન થતી હોય તો ડોક્ટરને સલાહ અનુસાર એન્ટિબાયોટિક આઈ ડ્રોપ લઈ શકાય છે. આઇ ડ્રોપ નાખવાથી ઇન્ફેક્શન વધારે વધતું નથી અને ઝડપથી મટી જાય છે.
કઈ વાતોનું રાખવું ધ્યાન?
આઈ ફ્લુ ચેપી હોય છે અને ઝડપથી ફેલાય છે. તેથી જે વ્યક્તિને આંખ આવી હોય તેણે પોતાનો રૂમાલ, તકિયો, ટુવાલ જેવી વસ્તુઓ અન્ય કોઈ સાથે શેર કરવી નહીં. એકવાર ઉપયોગ કર્યા પછી આ વસ્તુઓને ધોઈ લેવી. આ સિવાય આંખને વારંવાર હાથથી અડવાનું ટાળવું જોઈએ.જો આંખને હાથ અડાડો તો પછી હાથને બરાબર સાફ કરી લેવા. આંખ આવી હોય ત્યારે તડકામાં નીકળતા પહેલા ચશ્મા પહેરી લેવા જેથી આંખમાં વધારે તકલીફ ન થાય.
( Disclaimer: અહીં આપવામાં આવેલી માહિતી સામાન્ય માન્યતાઓ અને જાણકારી પર આધારિત છે. ZEE 24 કલાક તેની પુષ્ટિ કરતું નથી.)
