 "Kidney Damage Symptoms: કિડની સડવાની શરુઆત થાય ત્યારે સૌથી પહેલા પગ પર દેખાય છે આવા લક્ષણો")
)
Kidney Damage Symptoms: આપણા શરીરમાં અનેક અંગો છે જે યોગ્ય રીતે કામ કરતા હોય છે એટલા માટે જ આપણું શરીર સારી રીતે કામ કરી શકે છે. પરંતુ જે અંગો આપણને દેખાતા નથી એટલે કે શરીરની અંદર છે તેના પર વધારે ધ્યાન આપવામાં આવતું નથી. જ્યારે આ અંગો ધીરે ધીરે સડવા લાગે છે ત્યારે તેના લક્ષણો શરીરની બહાર દેખાવા લાગે છે. અને આવું થાય ત્યારે લોકો ડોક્ટર પાસે દોડે છે.
આપણા શરીરના મહત્વના અંગોમાંથી એક કિડની છે. કિડની આપણા શરીરનું ફિલ્ટર છે. કિડની શરીરના રક્તને સાફ કરે છે અને ઝેરી તત્વોને બહાર કાઢે છે. પરંતુ જ્યારે કિડની નબળી પડી જાય છે તો તેની અસર ફક્ત પેશાબ પર થાય છે એવું નથી. પેશાબ સિવાય પગ પર પણ કિડની ડેમેજ થયાના લક્ષણો દેખાય છે.
વૈજ્ઞાનિકો કિડનીની બીમારીને સાઈલન્ટ કિલર કહે છે. કારણ કે કિડનીની બીમારીના લક્ષણો એટલા સામાન્ય હોય છે કે લોકો તેના પર ધ્યાન આપતા નથી જેના કારણે કિડની સડવા લાગે છે અને ઘણીવાર સ્થિતિ હાથમાંથી નીકળી જાય છે. જેમકે સતત લાગતા થાકને લોકો ઉંમરની અસર સમજી લેતા હોય છે. પરંતુ આ લક્ષણ કિડની ડેમેજ થતી હોય ત્યારે પણ જોવા મળે છે. ફક્ત આ લક્ષણ નહીં કિડની ડેમેજ થતી હોય ત્યારે પગમાં પણ કેટલાક નરી આંખે દેખાય એવા લક્ષણો જોવા મળે છે. આ લક્ષણો કયા છે ચાલો તમને જણાવીએ.
અકારણ પગમાં સોજો
જો પગમાં અચાનક સોજો આવી જાય ખાસ કરીને પગની ઘુંટી કે પંજામાં સોજો હોય અને તેનું કોઈ સ્પષ્ટ કારણ ન હોય તો તે કિડનીમાં ગડબડ હોવાનું લક્ષણ હોય શકે છે. સ્વસ્થ કિડની શરીરમાંથી વધારાના પાણી અને સોડિયમને બહાર કાઢે છે પરંતુ જ્યારે કિડની બરાબર કામ ન કરતી હોય ત્યારે તરલ પદાર્થ શરીરમાં જામી જાય છે અને તેની અસર પગમાં સોજા તરીકે દેખાય છે.
પગની આંગળીઓનો રંગ બદલવો
રીસર્ચ અનુસાર ઘણા કેસમા જોવા મળે છે કે કિડની બરાબર કામ ન કરતી હોય તો પગની આંગળીઓના રંગમાં ફેરફાર થવા લાગે છે. ત્વચા પીળી પડી શકે છે અને પગ પર ઘેરા રંગના ધાબા દેખાય છે. આવું ત્યારે થાય છે જ્યારે વિષૈલા તત્વો શરીરમાંથી નીકળી શકતા નથી અને રક્તમાં જામે છે. તેના કારણે શરીરમાં અલગ અલગ જગ્યાએ ત્વચા પર ધેરા રંગના ધબ્બા દેખાય છે.
પગ સુન્ન થઈ જવા
જો પગ વારંવાર સુન્ન થઈ જાય તો તે પણ કિડની ડેમેજનું લક્ષણ હોય શકે છે. ઘણા લોકો તેને નસની સમસ્યા કે પગની નબળાઈ સમજી ઈગ્નોર કરે છે. પરંતુ આ સમસ્યા કિડની સંબંધિત હોય શકે છે. કિડનીની બીમારી હોય તો પણ નસો પર અસર પડે છે. આ સ્થિતિમાં પગની નસો સોજેલી કે સુન્ન દેખાય છે.
રાત્રે પગમાં મરોડ
કિડનીની ખરાબીનું અન્ય એક લક્ષણ છે રાતના સમયે પગમાં મરોડ આવવી. તમે આરામથી ઊંઘતા હોય અને અચાનક પિંડીમાં તીવ્ર દુખાવો કે ખેંચાણ અનુભવાય તો તે કિડની ડેમેજનું લક્ષણ હોય શકે છે. જ્યારે શરીરમાં ઈલેક્ટ્રોલાઈટ્સનું સંતુલન ખરાબ થાય છે તો સ્નાયૂ ખેંચાય છે.
પગની ત્વચામાં ખંજવાળ
કારણ વિના પગની ત્વચામાં વારંવાર ખંજવાળ આવતી હોય તો તે પણ કિડની ડેમેજનું લક્ષણ છે. જ્યારે કિડની ખરાબ તત્વોને શરીરમાંથી કાઢી શકતી નથી ત્યારે તે ત્વચાની નીચે જામી જાય છે અને તેના કારણે તીવ્ર ખંજવાળ આવે છે. આ ખંજવાળ લોશન લગાડ્યા પછી પણ મટતી નથી. કિડની સંબંધિત સમસ્યાના કારણે ખંજવાળ આવતી હોય તો તે દિવસ કરતાં વધારે રાત્રે આવે છે.
(Disclaimer: અહીં આપેલી માહિતી અને ઘરગથ્થુ ઉપચાર સામાન્ય માહિતી પર આધારિત છે. તેને અપનાવતા પહેલા તબીબી સલાહ લેવી જોઈએ. ZEE24kalak તેની પુષ્ટિ કરતું નથી.)
