 "8th Pay Commission: આઠમાં પગાર પંચ વિશે મોટું અપડેટ, પેનલની રચના, ફાઈનલ રિપોર્ટ, ક્યારથી આવશે વધેલો પગાર...જાણો")
)
Government Employees: આઠમાં પગાર પંચની રાહ જોતા સરકારી કર્મચારીઓ માટે સારા સમાચાર છે. આઠમાં પગાર પંચ અંગે સરકાર આગામી કેટલાક અઠવાડિયામાં મોટા નિર્ણય લઈ શકે છે. ફાઈનાન્શિયલ એક્સપ્રેસે અધિકૃત સૂત્રોના હવાલે લખ્યું છે કે સરકાર 2થી 3 અઠવાડિયાની અંદર આયોગનું Terms of Reference (ToR) નક્કી કરી શકે છે.
રિપોર્ટ મુજબ જો બધુ ઠીક રહેશે તો આ કમિટી 2026 મધ્ય સુધીમાં પોતાનો રિપોર્ટ નક્કી કરશે. આ રિપોર્ટના આધારે સરકારી કર્મચારીઓના પગારમાં વધારો થશે. જો કે રિપોર્ટ ભલે 2026 મધ્યમાં આવે પરંતુ એવી પ્રબળ શક્યતા છે કે જાન્યુઆરી 2026થી જ તે લાગૂ થઈ જાય. એટલે કે કર્મચારીઓને એરિયર તરીકે બાકી રકમ ચૂકવવામાં આવશે.
સામાન્ય રીતે સરકાર દર 10 વર્ષમાં પોતાના કર્મચારીઓના પગારને રિવાઈઝ કરે છે. આ માટે એક પગાર પંચની રચના થાય છે જે વિસ્તૃત અભ્યાસ, ચર્ચાઓ અને આંકડાના આધારે રિપોર્ટ તૈયાર કરે છે. સંપૂર્ણ રિપોર્ટ તૈયાર કરવામાં સામાન્ય રીતે લગભગ એક વર્ષનો સમય લાગે છે. તેમાં કેન્દ્ર સરકાર, રાજ્ય સરકારો, જાહેર ક્ષેત્રની કંપનીઓ અને અન્ય સંબંધિત સંસ્થાઓ સામેલ હોય છે.
2026થી લાગૂ થવાની આશા
મીડિયા રિપોર્ટ મુજબ રિપોર્ટ સબમિટ થયા બાદ તેને કેન્દ્રીય કેબિનેટ સમક્ષ રજૂ કરવામાં આવે છે. કેબિનેટની મંજૂરી મળતા જ જાન્યુઆરી 2026થી આઠમું પગાર પંચ લાગૂ થઈ શકે છે. સરકાર ત્યારબાદ તમામ કર્મચારીઓ અને પેન્શનર્સને એરિયર તરીકે ચૂકવણી પણ કરશે.
કર્મચારીઓના પગાર વધારા માટે ફિટમેન્ટ ફેક્ટરનો ઉપયોગ કરાય છે. ફિટમેન્ટ ફેક્ટર બેઝિક પગારને નવા સ્ટ્રક્ચરમાં બદલવાનો ફોર્મ્યૂલા છે. તેને આ રીતે પણ સમજી શકાય- નવો બેઝિક પગાર = જૂનો બેઝિક પગાર × ફિટમેન્ટ ફેક્ટર
પગારમાં કેટલો વધારો?
સાતમાં પગાર પંચમાં ફિટમેન્ટ ફેક્ટર 2.57 રાખવામાં આવ્યું હતું. એટલે કે જો કોઈ કર્મચારીનો 6ઠ્ઠા પગાર પંચમાં બેઝિક પગાર ₹10,000 હતો તો સાતમાં પગાર પંચ મુજબ તે 25,700 (10,000 × 2.57) રૂપિયા થઈ ગયો હતો.
જો કે હજુ સુધી એ સ્પષ્ટ નથી કે આઠમાં પગાર પંચમાં ફિટમેન્ટ ફેક્ટર કેટલું હશે. પરંતુ અનેક મીડિયા રિપોર્ટ્સમાં દાવો કરાયો છે કે આઠમાં પગાર પંચમાં ફિટમેન્ટ ફેક્ટર 1.92 થી 2.86 વચ્ચે હોઈ શકે છે. જો 2.86નું ફિટમેન્ટ ફેક્ટર માનવામાં આવે તો કોઈ કર્મચારીનો હાલ બેઝિક પગાર 20,000 રૂપિયા હોય તો નવો પગાર 57200 (20,000 × 2.86) રૂપિયા થાય.
