 "રાજીનામા બાદ જગદીપ ધનખડે પેન્શન માટે કરી અરજી, જાણો કઈ-કઈ સુવિધા મળશે")
નવી દિલ્હીઃ ભારતના પૂર્વ ઉપ રાષ્ટ્રપતિ જગદીપ ધનખડે પોતાના પદ પરથી રાજીનામું આપ્યા બાદ હવે પેન્શન માટે અરજી કરી છે. તેમણે આ અરજી રાજસ્થાન વિધાનસભામાં આપી છે, જ્યાં તેઓ કિશનગઢ સીટથી 1993થી 1998 સુધી ધારાસભ્ય રહ્યાં હતા. સૂત્રો અને મીડિયા રિપોર્ટ્સથી મળી રહેલી જાણકારી પ્રમામે તેમણે પેન્શન માટે વિધાનસભા સચિવાયલમાં અરજી કરી, જેના પર મંજૂરીની પ્રક્રિયા શરૂ થઈ ગઈ છે. નિયમો અને જોગવાઈ પ્રમાણે તેમને મહત્તમ 42 હજાર રૂપિયાનું પેન્શન મળશે. આ સિવાય તેમને પૂર્વ ધારાસભ્યને પ્રાપ્ત થનારી સુવિધાઓ પણ મળશે.
તમને જણાવી દઈએ કે પશ્ચિમ બંગાળના રાજ્યપાલ બનતા પહેલા જગદીપ ધનખડ 1989થી 1991 સુધી રાજસ્થાનની ઝૂંઝનૂ સીટથી લોકસભાના સાંસદ રહી ચૂક્યા છે. તેમને ચંદ્રશેખરની સરકારમાં કેન્દ્રીય સંસદીય કાર્ય રાજ્યમંત્રીની જવાબદારી પણ મળી હતી. ધનખડ 2019થી 2022 સુધી પશ્ચિમ બંગાળના રાજ્યપાલ રહ્યાં હતા. આ દરમિયાન તેમનો કાર્યકાળ ચર્ચામાં રહ્યો હતો. હંમેશા મમતા બેનર્જીની સરકાર સાથે રાજભવનના ટકરાવના સમાચારો સામે આવતા હતા. ત્યારબાદ ધનખડ ઉપરાષ્ટ્રપતિ બન્યા હતા. તેઓ 2022થી 2025 સુધી આ પદ પર રહ્યાં હતા.
જગદીપ ધનખડે સ્વાસ્થ્ય કારણોનો હવાલો આપતા ઉપરાષ્ટ્રપતિ પદેથી રાજીનામું આપી દીધું હતું. ત્યારબાદ ધનખડ કોઈ જાહેર કાર્યક્રમમાં જોવા મળ્યા નથી. પ્રાપ્ત વિગત અનુસાર પાછલા મહિને ઉપરાષ્ટ્રપતિ પદેથી રાજીનામું આપનાર ધનખડ પોતાના પરિવારની સાથે સમય પસાર કરવાની સાથે નિયમિત રૂપથી યોગાભ્યાસ કરી રહ્યા છે અને ટેબલ ટેનિસ રમી રહ્યાં છે.
)