સિંધુ જળ સંધિ બાદ પાકિસ્તાનને વધુ એક મોટો ફટકો, પ્રતિબંધ લગાવવાની તૈયારીમાં ભારત

India Action on Pakistan: પાકિસ્તાન સામે ભારતની બદલાની કાર્યવાહી હજુ પૂરી થઈ નથી. મળતી માહિતી મુજબ ભારત સરકાર હવે પાકિસ્તાની વિમાનો માટે પોતાનું હવાઈ ક્ષેત્ર બંધ કરવાની તૈયારી કરી રહી છે. જોકે, આ અંગે સત્તાવાર રીતે કંઈ માહિતી મળી શકી નથી. રસપ્રદ વાત એ છે કે, પહેલગામ આતંકવાદી હુમલા પછી, NSCની બેઠકમાં, પાકિસ્તાને ભારતીય વિમાનો માટે હવાઈ ક્ષેત્ર પર પ્રતિબંધ મૂક્યો હતો.

ખાનગી પોર્ટલના અહેવાલમાં સૂત્રોના દ્વારા કહેવામાં આવ્યું છે કે ભારત સરકાર પાકિસ્તાની જહાજોને તેના બંદરોમાં પ્રવેશવા પર પણ પ્રતિબંધ મૂકી શકે છે. આ ઉપરાંત, પાકિસ્તાની વિમાનોના હવાઈ ક્ષેત્રમાં પ્રવેશ પર પણ પ્રતિબંધ લગાવી શકાય છે. આ ઘટના એવા સમયે બની રહી છે, જ્યારે વડા પ્રધાન નરેન્દ્ર મોદીએ આતંકવાદી હુમલાના આરોપીઓને કડક સજા આપવાની વાત કરી છે.

મીડિયા રિપોર્ટ્સ અનુસાર, જો ભારત સરકાર હવાઈ ક્ષેત્ર પર પ્રતિબંધ મૂકવાનો નિર્ણય લે છે, તો પાકિસ્તાની વિમાનોને દક્ષિણ-પૂર્વમાં કુઆલા લંપુર જેવા સ્થળોએ પહોંચવા માટે ચીન અથવા શ્રીલંકા જેવા દેશોના હવાઈ ક્ષેત્રનો ઉપયોગ કરવો પડશે. જોકે, એવા અહેવાલો પણ છે કે પાકિસ્તાની વિમાનો પહેલાથી જ ભારતીય હવાઈ ક્ષેત્રમાં પ્રવેશવાનું ટાળી રહ્યા છે.

બુધવારે કેન્દ્રીય મંત્રીમંડળની બેઠક

22 એપ્રિલે પહેલગામમાં થયેલા આતંકવાદી હુમલા પછી કેન્દ્રીય મંત્રીમંડળની પહેલી બેઠક બુધવારે અને 30 એપ્રિલના રોજ યોજાશે. પહેલગામ આતંકવાદી હુમલામાં 26 લોકો માર્યા ગયા હતા, જેમાં મોટાભાગના પ્રવાસીઓ હતા. બુધવારે સવારે 11 વાગ્યે વડા પ્રધાન નરેન્દ્ર મોદીની અધ્યક્ષતામાં એક બેઠક બોલાવવામાં આવી છે. ગયા અઠવાડિયે કેન્દ્રીય મંત્રીમંડળની કોઈ બેઠક નહોતી અને 23 એપ્રિલે ફક્ત સુરક્ષા પરની કેબિનેટ સમિતિ (CCS) ની બેઠક મળી હતી, જેમાં પહેલગામ આતંકવાદી હુમલાની નિંદા કરવામાં આવી હતી.