કોરોના વાયરસને હરાવનાર પ્રથમ રાજ્ય બન્યું ગોવા, તમામ દર્દીઓ થયા સ્વસ્થ

પણજીઃ કોરોના વાયરસથી એક તરફ જ્યાં દેશ થોભી ગયો છે, તો આ બધા વચ્ચે એક રાહતના સમાચાર આવ્યા છે. રવિવારના દિવસે ભારતનું તટીય રાજ્ય ગોવા નવી સિદ્ધિ લઈને આવ્યું છે. અહીં કોરોના વાયરસના તમામ દર્દીઓ સ્વસ્થ થઈ ગયા છે. રાજ્યમાં કોરોનાના કુલ સાત મામલા સામે આવ્યા હતા, જેમાં છ પહેલા જ સ્વસ્થ થઈ ગયા હતા. આખરી દર્દીનો કોરોના રિપોર્ટ રવિવારે નેગેટિવ આવ્યો ત્યારબાદ તેને પણ રજા આપી દેવામાં આવી છે. 

A moment of satisfaction and relief for Goa as the last active Covid-19 case tests negative. Team of Doctors and entire support staff deserves applause for their relentless effort. No new positive case in Goa after 3rd April 2020.#GoaFightsCOVID19 @narendramodi

— Dr. Pramod Sawant (@DrPramodPSawant) April 19, 2020

મુખ્યમંત્રી પ્રમોદ સાવંતે આ વાતની જાણકારી આપી છે. તેમણે ટ્વીટ કર્યું, સંતોષ અને રાહતની વાત છે કે ગોવાના છેલ્લા એક્ટિવ કોરોના દર્દીના ટેસ્ટનો રિપોર્ટ પણ નેગેટિવ આવ્યો છે. ડોક્ટર અને સપોર્ટ સ્ટાફ પ્રશંસાને પાત્ર છે. ગોવામાં હવે 3 એપ્રિલ બાદ કોઈ નવો કોરોનાનો કેસ સામે આવ્યો નથી. 

18 માર્ચે મળ્યો હતો પ્રથમ પોઝિટિવ કેસ
ગોવામાં કોરોના વાયરસની શરૂઆત 18 માર્ચે થઈ હતી. દુબઈથી પરત આવેલા એક નેતામાં સૌથી પહેલાં સંક્રમણ મળ્યું હતું. 3 એપ્રિલ સુધી અહીં કોરોનાના સાત કેસ સામે આવ્યા હતા. ત્યારબાદ રાજ્યમાં કોઈ નવો મામલો સામે આવ્યો નથી. 15 એપ્રિલ સુધી રાજ્યમાં છ કોરોના પોઝિટિવ સ્વસ્થ થઈ ગયા હતા. છેલ્લા દર્દીનો પણ કોરોના ટેસ્ટનો રિપોર્ટ નેગેટિવ આવ્યો છે. 

દેશના પ્રથમ ગ્રીન ઝોન રાજ્ય બનવાનો માર્ગ મોકળો
તેવામાં હવે ગોવાનું દેશનું પ્રથમ ગ્રીન ઝોન રાજ્ય બનવાનો માર્ગ મોકળો બની ગયો છે. આ પહેલા ભાજપના વરિષ્ઠ નેતા બીએલ સંતોષે પણ ટ્વીટ કર્યું હતું કે, જો બધુ સરકારની યોજના અનુસાર રહ્યું તો ગોવા 20 એપ્રિલ સુધી ગ્રીન ઝોનમાં સામેલ થનાર દેશનું પ્રથમ રાજ્ય બની શકે છે. કેન્દ્રીય સ્વાસ્થ્ય મંત્રાલયે રાજ્યના દક્ષિણ ગગોવા જિલ્લાને પહેલા જ ગ્રીન ઝોન જાહેર કરી દીધો છે. જે ક્ષેત્રમાં કોવિડ-19ના મામલા આવતા નથી તેને ગ્રીન ઝોન જાહેર કરવામાં આવે છે અને બંધમાં છૂટ આપી શકાય છે.