ભારતની PAK પર વધુ એક એક્શન, પાકિસ્તાન હાઈ કમિશનના અધિકારીને 24 કલાકમાં દેશ છોડવા આદેશ; જાણો કારણ

India-Pakistan Conflict: નવી દિલ્હીમાં પાકિસ્તાન હાઈ કમિશનમાં કામ કરતા એક પાકિસ્તાની અધિકારી સામે મોટી કાર્યવાહી કરવામાં આવી છે. ભારત સરકારે તેમને 'પર્સોના નોન ગ્રેટા' (અનિચ્છનીય વ્યક્તિ) જાહેર કર્યા છે. તે એવી પ્રવૃત્તિઓમાં સંડોવાયેલો જોવા મળ્યો જે તેના સત્તાવાર પદની વિરુદ્ધ હતી. આ અધિકારીને 24 કલાકની અંદર ભારત છોડવાનો આદેશ આપવામાં આવ્યો છે. આ સંદર્ભમાં, મંગળવારે પાકિસ્તાન હાઈ કમિશનના ચાર્જ ડી'અફેર્સને એક રાજદ્વારી પત્ર જારી કરવામાં આવ્યો હતો. ભારત દ્વારા પાકિસ્તાની અધિકારી સામે આ કાર્યવાહી એવા સમયે કરવામાં આવી છે જ્યારે બન્ને દેશો વચ્ચે તણાવ ચરમસીમાએ છે.

પર્સોના નોન ગ્રેટા એ એક રાજદ્વારી શબ્દ છે જેનો અર્થ થાય છે કે કોઈ વિદેશી રાજદ્વારીને યજમાન દેશમાં અનિચ્છનીય ગણવામાં આવે છે. આ નિર્ણય સામાન્ય રીતે ત્યારે લેવામાં આવે છે જ્યારે કોઈ રાજદ્વારી એવી પ્રવૃત્તિઓમાં સામેલ હોય છે જે યજમાન દેશની સુરક્ષા, સાર્વભૌમત્વ અથવા હિતોની વિરુદ્ધ હોય. જેમ કે જાસૂસી, ગેરકાયદેસર પ્રવૃત્તિઓ અથવા રાજદ્વારી નિયમોનું ઉલ્લંઘન. 

ભારત સરકારની આ કાર્યવાહી દર્શાવે છે કે ઉક્ત પાકિસ્તાની અધિકારીએ એવી પ્રવૃત્તિઓ કરી હતી જે ભારતના હિતોની વિરુદ્ધ હતી. આ એક ઔપચારિક રાજદ્વારી સંદેશ છે જેના દ્વારા ભારતે પાકિસ્તાનને તેના વાંધા અને કાર્યવાહી વિશે જાણ કરી હતી. આવું પગલું બન્ને દેશો વચ્ચેના તણાવને ઉજાગર કરે છે.

ભારતે ઓપરેશન સિંદૂરથી આપ્યો જવાબ
22 એપ્રિલના રોજ પાકિસ્તાન સમર્થિત આતંકવાદીઓએ જમ્મુ-કાશ્મીરના પહેલગામમાં પ્રવાસીઓ અને નાગરિકો પર હુમલો કર્યો હતો, જેમાં 26 લોકો માર્યા ગયા હતા. 26/11ના મુંબઈ હુમલા પછી તેને સૌથી ઘાતક આતંકવાદી હુમલો માનવામાં આવતો હતો. આ આતંકવાદી હુમલાના જવાબમાં ભારતે 6-7 મેની રાત્રે ઓપરેશન સિંદૂર શરૂ કર્યું, જેનો હેતુ પાકિસ્તાન અને PoKમાં આતંકવાદી ઠેકાણાઓનો નાશ કરવાનો હતો. ભારતીય વાયુસેનાએ 9 આતંકવાદી છાવણીઓ પર હવાઈ હુમલા કર્યા, જેમાં લગભગ 100 આતંકવાદીઓ માર્યા ગયા. 

પાકિસ્તાને સ્વીકાર્યું કે આ કાર્યવાહીમાં તેના 11 સૈનિકો માર્યા ગયા હતા અને 78 ઘાયલ થયા હતા. પાકિસ્તાને 8, 9 અને 10 મેના રોજ ભારતીય લશ્કરી ચોકીઓ પર બદલો લેવા માટે હુમલા કર્યા, જેના કારણે બન્ને દેશો વચ્ચે તણાવ વધ્યો. નિયંત્રણ રેખા (LoC) પર ગોળીબાર અને યુદ્ધવિરામ ઉલ્લંઘનની ઘટનાઓમાં વધારો થયો. ભારતે આતંકવાદીઓનો ખાત્મો ન થાય ત્યાં સુધી ઓપરેશન ચાલુ રાખવાની જાહેરાત કરી છે.