 "જગદીપ ધનખડને એક નહીં ત્રણ-ત્રણ જગ્યાએથી પેન્શન મળશે, જાણો દર મહિને ખાતામાં કેટલા પૈસા આવશે")
નવી દિલ્હીઃ પૂર્વ ઉપરાષ્ટ્રપતિ જગદીપ ધનખડે તાજેતરમાં રાજસ્થાન વિધાનસભામાં પૂર્વ ધારાસભ્યના રૂપમાં પેન્શન માટે અરજી કરી છે. આ સાથે તેઓ પૂર્વ સાંસદ અને પૂર્વ ઉપરાષ્ટ્રપતિના રૂપમાં પણ પેન્શનના હકદાર ચે. એટલે કે જગદીપ ધનખડને ત્રણ અલગ-અલગ પેન્શન મળશે. આવો જાણીએ તેમને દર મહિને કેટલા રૂપિયા મળશે.
ધનખડે ઉપરાષ્ટ્રપતિ પદ પરથી રાજીનામું આપ્યું હતું
જગદીપ ધનખડ 1989 થી 1991 સુધી ઝુંઝુનુથી જનતા દળના સાંસદ હતા. ત્યારબાદ તેઓ 1993 થી 1998 સુધી રાજસ્થાનના કિશનગઢથી કોંગ્રેસના ધારાસભ્ય હતા. તેઓ 2019 થી 2022 સુધી પશ્ચિમ બંગાળના રાજ્યપાલ હતા અને 2022 થી 2025 સુધી ભારતના ઉપરાષ્ટ્રપતિ તરીકે સેવા આપી હતી. 21 જુલાઈ 2025 ના રોજ, તેમણે સ્વાસ્થ્યના કારણોસર ઉપરાષ્ટ્રપતિ પદ પરથી રાજીનામું આપ્યું હતું. તમને જણાવી દઈએ કે રાજસ્થાનમાં ડબલ અને ટ્રિપલ પેન્શનની વ્યવસ્થા છે, એટલે કે, જો કોઈ નેતા સાંસદ અને ધારાસભ્ય બંને રહી ચૂક્યો હોય, તો તેને બંને પદો માટે પેન્શન મેળવવાનો અધિકાર છે.
ત્રણ પેન્શનનો હિસાબ
જગદીપ ધનખડને ત્રણ અલગ-અલગ પદો માટે પેન્શન મળશે. રાજસ્થાનમાં પૂર્વ ધારાસભ્યોને 35000 રૂપિયાનું માસિક પેન્શન મળે છે. પરંતુ 70 વર્ષથી વધુ ઉંમરના ધારાસભ્યોને 20 ટકા એક્સ્ટ્રા પેન્શન આપવામાં આવે છે. ધનખડની ઉંમર 74 વર્ષ છે, તેથી તેમને 35 હજારની જગ્યાએ 42000 રૂપિયા દર મહિને પેન્શન મળશે. પૂર્વ સાંસદ તરીકે તેમને દર મહિને 45000 રૂપિયા પેન્શન મળશે. તો ઉપરાષ્ટ્રપતિ પદેથી રાજીનામું આપ્યા બાદ ધનખડને આ પદ માટે લગભગ 2 લાખ રૂપિયાનું માસિક પેન્શન મળશે. આ પ્રકારે તેમને દર મહિને કુલ 2,87,000 રૂપિયા પેન્શનના રૂપમાં મળશે,. આ સિવાય અન્ય સુવિધાઓ પણ મળશે.
કેમ ચર્ચામાં છે ધનખડ?
ભૂતપૂર્વ ઉપરાષ્ટ્રપતિ જગદીપ ધનખડે 21 જુલાઈના રોજ સ્વાસ્થ્યના કારણોસર ઉપરાષ્ટ્રપતિ પદ પરથી રાજીનામું આપ્યું હતું. ઉપરાષ્ટ્રપતિ પદ છોડ્યા પછી, તેમણે કોઈ જાહેર નિવેદન આપ્યું ન હતું, જેના કારણે વિપક્ષે પ્રશ્નો ઉભા કર્યા હતા. પરંતુ પેન્શન માટે અરજી કર્યા પછી તેઓ ફરીથી ચર્ચામાં આવ્યા. રાજસ્થાન વિધાનસભા સચિવાલયે તેમની અરજી સ્વીકારી લીધી છે અને પેન્શન ટૂંક સમયમાં શરૂ થવાની અપેક્ષા છે.
)