વૈષ્ણોદેવી માર્ગ પર ભૂસ્ખલનને કારણે મોટો અકસ્માત, 31 લોકોના મોત, ગઈકાલે પણ 9 લોકોના થયા હતા મોત

Vaishno Devi Landslide: જમ્મુ અને કાશ્મીરમાં સતત ભારે વરસાદે ભારે વિનાશ વેર્યો છે. કટરા ખાતે માતા વૈષ્ણો દેવી યાત્રા માર્ગ પર થયેલા મોટા ભૂસ્ખલમાં ઓછામાં ઓછા 31 લોકો મૃત્યુ થયા છે અને 23 લોકો ઘાયલ થયા છે. બુધવારે બનેલી ઘટનાએ ત્રિકુટ ટેકરી પર સ્થિત મંદિર તરફ જવાનો માર્ગ સંપૂર્ણપણે બરબાદ કરી દીધો છે. અધિકારીઓને ડર છે કે હજુ પણ વધુ લોકો કાટમાળમાં ફસાયેલા હોઈ શકે છે અને બચાવ કામગીરી ચાલુ છે.

મૃત્યુઆંક વધી શકે છે

અગાઉ, મંગળવારે, આ જ રૂટ પર ભૂસ્ખલન થયું હતું, જેમાં નવ લોકોએ જીવ ગુમાવ્યા હતા અને 21 અન્ય ઘાયલ થયા હતા. પર્વતો તૂટી પડવાથી યાત્રા માર્ગને ઘણું નુકસાન થયું છે. અધિકારીઓએ ચેતવણી આપી છે કે મૃત્યુઆંક વધી શકે છે.

અત્યાર સુધીનો સૌથી વધુ વરસાદ નોંધાયો

જમ્મુ અને કાશ્મીરમાં ભારે વરસાદ અને ભૂસ્ખલનને કારણે જનજીવન ખરાબ રીતે પ્રભાવિત થયું છે. જમ્મુમાં અનેક મહત્વપૂર્ણ માળખાગત સુવિધાઓને ભારે નુકસાન થયું છે, જેમાં પુલ તૂટી પડવા અને વીજળીના થાંભલા અને મોબાઇલ ટાવર તૂટી પડવાનો સમાવેશ થાય છે. મંગળવારે, જમ્મુમાં સવારે 11.30થી સાંજે 5.30 વાગ્યા સુધી 6 કલાકમાં 22 સેમી વરસાદ નોંધાયો હતો, જે અત્યાર સુધીનો સૌથી વધુ વરસાદ છે. જોકે, મધ્યરાત્રિ પછી વરસાદ ઓછો થયો, જેના કારણે જમ્મુ જિલ્લામાં થોડી રાહત મળી.

બચાવ અને રાહત કામગીરી હાથ ધરવામાં આવી

અત્યાર સુધીમાં, અવિરત વરસાદ અને અચાનક પૂરને કારણે 3500થી વધુ રહેવાસીઓને સુરક્ષિત સ્થળોએ ખસેડવામાં આવ્યા છે. જિલ્લા વહીવટીતંત્ર, જમ્મુ અને કાશ્મીર પોલીસ, NDRF, SDRF, ભારતીય સેના અને સ્થાનિક સ્વયંસેવકોની સંયુક્ત ટીમો બચાવ અને રાહત કામગીરીમાં રોકાયેલી છે. લોકોને સંવેદનશીલ વિસ્તારોમાંથી બહાર કાઢીને કામચલાઉ આશ્રયસ્થાનોમાં મોકલવામાં આવી રહ્યા છે. તેમને ત્યાં ખોરાક, સ્વચ્છ પાણી અને તબીબી સહાય પૂરી પાડવામાં આવી રહી છે. અધિકારીઓના જણાવ્યા અનુસાર, કેન્દ્રશાસિત પ્રદેશના મોટા ભાગોમાં સંદેશાવ્યવહાર સેવાઓ ખોરવાઈ ગઈ છે, જેના કારણે કટોકટી વધુ ઘેરી બની છે.

ટ્રેન સેવાઓ પણ બંધ કરી દેવામાં આવી

ભારે વરસાદને કારણે ઉત્તર રેલવેએ બુધવારે 22 ટ્રેનો રદ કરી છે અને 27 ટ્રેનો મોડી પડી છે. કટરા, જમ્મુ અને ઉધમપુરથી ચાલતી ટ્રેન સેવાઓ પ્રભાવિત થઈ છે, જેમાં વૈષ્ણોદેવી બેઝ કેમ્પથી ચાલતી નવ ટ્રેનોનો સમાવેશ થાય છે. આ ઉપરાંત, ચક્કી નદીમાં અચાનક આવેલા પૂરને કારણે એક પુલને નુકસાન થતાં હિમાચલ પ્રદેશના પઠાણકોટ અને કાંદ્રેરી વચ્ચેની ટ્રેન સેવાઓ પણ બંધ કરી દેવામાં આવી છે. જોકે, કટરા-શ્રીનગર રૂટ પર ટ્રેન સેવાઓ પર કોઈ અસર પડી નથી.