 "Dream11 જેવી ગેમિંગ એપ થશે બેન? ઓનલાઈન સટ્ટાબાજીની ગેમ્સ પર પ્રતિબંધ મૂકવાની તૈયારીમાં સરકાર, આવતીકાલે સંસદમાં રજૂ થશે બીલ")
Online Gaming Ban: કેન્દ્રની મોદી સરકારે રૂપિયા સાથે સંબંધિત ઓનલાઈન ગેમિંગના ક્ષેત્રમાં આજે (મંગળવારે) મોટો નિર્ણય લીધો છે. પ્રધાનમંત્રી નરેન્દ્ર મોદીની અધ્યક્ષતામાં મળેલી કેન્દ્રીય કેબિનેટની બેઠકમાં ઓનલાઈન ગેમિંગ બિલને મંજૂરી આપવામાં આવી છે. આ બિલ હેઠળ ઓનલાઈન સટ્ટાબાજી એક સજાપાત્ર ગુનો હશે અને રૂપિયા સાથે સંબંધિત ગેમિંગ ટ્રાન્ઝેક્શન પર સંપૂર્ણપણે પ્રતિબંધ મૂકવામાં આવશે. આ માહિતી સૂત્રો પાસેથી મળી છે.
મોદી સરકાર બુધવારે લોકસભામાં આ બિલ રજૂ કરશે. સૂત્રોના જણાવ્યા અનુસાર આ બિલ હેઠળ કોઈપણ બેન્ક કે નાણાકીય સંસ્થાને ઓનલાઈન મની ગેમ્સમાં રૂપિયા ટ્રાન્સફર કરવાની મંજૂરી આપવામાં આવશે નહીં. આ ઉપરાંત રિયલ મની ગેમિંગની જાહેરાતો પર પ્રતિબંધ મૂકવામાં આવશે. આ સાથે જ સરકાર ઈ-સ્પોર્ટ્સ અને સ્કિલ-બેસ્ડ નોન-મોનેટરી ગેમ્સને પ્રોત્સાહન આપશે.
ઉદ્દેશ્ય શું છે?
ઓનલાઈન ગેમિંગ પર પહેલાથી જ ટેક્સના દાયરામાં છે. મોદી સરકારે તેના છેલ્લા કાર્યકાળ ઓક્ટોબર 2023થી ઓનલાઈન ગેમિંગ પ્લેટફોર્મ પર 28 ટકા GST લાગુ કર્યો છે. આ નાણાકીય વર્ષથી તેમાં 2 ટકાનો વધારો કરવામાં આવ્યો છે. એટલે કે, નાણાકીય વર્ષ 2025થી ઓનલાઈન ગેમ જીત પર 30 ટકા ટેક્સ લાદવામાં આવ્યો છે.
આ બિલમાં વિદેશી ગેમિંગ ઓપરેટરોને પણ ટેક્સ નેટવર્કમાં સામેલ કરવામાં આવ્યા છે. ડિસેમ્બર 2023માં ભારતીય દંડ સંહિતા હેઠળ અનધિકૃત સટ્ટાબાજી માટે 7 વર્ષ સુધીની જેલ અને ભારે દંડની જોગવાઈ અમલમાં આવી.
કેન્દ્ર સરકાર ઓનલાઈન સટ્ટાબાજી અને સંબંધિત સાઇટ્સ સામે સતત કડક કાર્યવાહી કરી રહી છે. 2022થી ફેબ્રુઆરી 2025 દરમિયાન 1,400થી વધુ સટ્ટાબાજી અને જુગાર સાઇટ્સ અને એપ્લિકેશન્સને બ્લોક કરવામાં આવી છે. માહિતી અને પ્રસારણ મંત્રાલયે ગેમિંગ સંબંધિત જાહેરાતોમાં નાણાકીય જોખમો અને સંભવિત વ્યસન અંગે ડિસ્ક્લેમર મૂકવાનો નિર્દેશ આપ્યો છે.
)