 "DUSU અધ્યક્ષથી પહેલીવાર ધારાસભ્ય, હવે CM... જાણો કોણ છે દિલ્હીના નવા મુખ્યમંત્રી રેખા ગુપ્તા")
)
Rekha Gupta Delhi New CM: દિલ્હીમાં ભાજપે હવે મુખ્યમંત્રીના નામ પર પડદો ઊઠાવી લીધો છે અને રેખા ગુપ્તાના નામને ધારાસભ્ય દળની બેઠકમાં મંજૂરી આપવામાં આવી છે. દિલ્હીની શાલીમાર બાગ બેઠક પરથી પહેલીવાર ધારાસભ્ય બનેલી રેખા ગુપ્તા આગામી મુખ્યમંત્રી બનશે. તમામ અટકળોને પાછળ છોડીને ભાજપે મહિલા ચહેરા પર દાવ લગાવ્યો છે અને વૈશ્ય સમુદાયમાંથી આવતી રેખા ગુપ્તાને મુખ્યમંત્રી બનાવવાનો નિર્ણય કર્યો છે. હવે ગુરુવારે તેઓ રામલીલા મેદાનમાં દિલ્હીની ચોથી મહિલા મુખ્યમંત્રી તરીકે શપથ લેશે.
DU વિદ્યાર્થી સંઘના અધ્યક્ષથી શરૂઆત
રેખા ગુપ્તાએ દિલ્હી યુનિવર્સિટીમાંથી અભ્યાસ કર્યો છે અને કોલેજકાળથી જ અખિલ ભારતીય વિદ્યાર્થી પરિષદ (ABVP) સાથે જોડાયેલી છે. તેમણે દિલ્હી યુનિવર્સિટી સ્ટુડન્ટ્સ યુનિયનમાં અધ્યક્ષ અને સચિવ પદ માટેની ચૂંટણી પણ જીતી હતી. આ સિવાય તે ત્રણ વખત દિલ્હી મ્યુનિસિપલ કોર્પોરેશનમાં કાઉન્સિલર રહી ચૂકી છે. તેમણે શાલીમાર બાગ બેઠક પરથી AAP ઉમેદવાર બંદના કુમારીને 30 હજાર મતોથી હરાવ્યા છે.
હરિયાણાની જીંદની મુળ રેખા ગુપ્તાનો જન્મ વર્ષ 1974માં જુલાનામાં થયો હતો. પિતાને SBI બેન્કમાં નોકરી મળ્યા બાદ તેમનો પરિવાર દિલ્હી શિફ્ટ થઈ ગયો હતો. જો કે, તેનો પરિવાર હજુ પણ જુલાનામાં બિઝનેસ કરે છે. દિલ્હીને અડીને આવેલા હરિયાણાની હોવાને કારણે રેખા ગુપ્તા પોતાના ગૃહ રાજ્યમાં આવતી રહે છે.
મહિલા મોરચાના રાષ્ટ્રીય ઉપાધ્યક્ષ
ધારાસભ્ય બનતા પહેલા રેખા ગુપ્તાએ ભાજપમાં સંગઠન સ્તરે મહત્વની જવાબદારીઓ પણ નિભાવી હતી. તે ભાજપ મહિલા મોરચાની રાષ્ટ્રીય ઉપાધ્યક્ષ છે અને દિલ્હી ભાજપમાં મહાસચિવનું પદ સંભાળી રહી છે. DUની દૌલતરામ કોલેજમાંથી અભ્યાસ કરનાર રેખા ગુપ્તા M.A અને M.B.A ડિગ્રી ધરાવે છે. ખાસ વાત એ છે કે, તે લાંબા સમયથી RSSના સક્રિય સભ્ય છે અને સંઘના કાર્યક્રમોમાં સક્રિયપણે ભાગ લે છે.
1994-95માં દોલતરામ કોલેજના સેક્રેટરી હતા
1995-96માં દિલ્હી યુનિવર્સિટીમાં સેક્રેટરી તરીકે કામ કર્યું
1996-97માં દિલ્હી યુનિવર્સિટી વિદ્યાર્થી સંઘના અધ્યક્ષ હતા
2003-04માં દિલ્હી પ્રદેશ મહિલા મોરચાની સેક્રેટરી હતા
2004-06માં ભાજપ યુવા મોરચાના રાષ્ટ્રીય સચિવ હતા.
2007માં પીતમપુરા ઉત્તરમાંથી કાઉન્સિલર તરીકે ચૂંટાયા
2009માં દિલ્હી પ્રદેશ મહિલા મોરચાના મહાસચિવ બન્યા
2010માં ભાજપની રાષ્ટ્રીય કાર્યકારિણીના સભ્ય તરીકે ચૂંટાયા
પ્રવેશ વર્માએ મુક્યો નામનો પ્રસ્તાવ
અગાઉ ભાજપે સાંસદ રવિશંકર પ્રસાદ અને ઓપી ધનખરને નિરીક્ષક તરીકે નિયુક્ત કર્યા હતા. બન્ને નેતાઓએ દિલ્હીમાં ભાજપના ધારાસભ્યો સાથે બેઠક કરી અને રેખા ગુપ્તાને ધારાસભ્ય દળના નેતા તરીકે પસંદ કર્યા છે. તેમના નામનો પ્રસ્તાવ પ્રવેશ વર્મા અને વિજેન્દ્ર ગુપ્તાએ રાખ્યો હતો. હવે ભાજપનું પ્રતિનિધિમંડળ લેફ્ટનન્ટ ગવર્નર વીકે સક્સેનાને મળી શકે છે અને સરકાર બનાવવાનો દાવો રજૂ કરી શકે છે. આ પછી ગુરુવારે રેખા ગુપ્તા રામલીલા મેદાનમાં દિલ્હીના મુખ્યમંત્રી તરીકે શપથ લેશે.
27 વર્ષ બાદ દિલ્હીમાં ભાજપનું રાજ
આ વખતે ભાજપે 27 વર્ષ બાદ દિલ્હીમાં વિધાનસભા ચૂંટણી જીતી છે. રાજધાનીમાં છેલ્લા એક દાયકાથી આમ આદમી પાર્ટી સત્તામાં હતી, જેને આ વખતે માત્ર 22 બેઠકો મળી છે. જ્યારે ભાજપે 70માંથી 48 બેઠકો જીતીને ઈતિહાસ રચ્યો છે. ભાજપના બમ્પર વેવમાં પૂર્વ સીએમ અરવિંદ કેજરીવાલ, પૂર્વ ડેપ્યુટી સીએમ મનીષ સિસોદિયા અને AAPના ઘણા વરિષ્ઠ નેતાઓએ પણ પોતાની સીટ ગુમાવી છે.
