આવી ગઇ અંબાલાલની નવી આગાહી; ગુજરાતમાં ક્યાંક આવશે વંટોળ તો ક્યાંક પડશે કમોસમી વરસાદ

Gujarat Weather Forecast: અંબાલાલ પટેલે આ સીઝનની સૌથી ખતરનાક આગાહી કરી છે. તેમણે જણાવ્યું કે, 11 એપ્રિલ સુધી ગુજરાતના વાતાવરણમાં પલટો આવશે. ગુજરાતના કેટલાક ભાગોમાં કમોસમી વરસાદની શક્યતા છે. દક્ષિણ ગુજરાત અને દક્ષિણ સૌરાષ્ટ્ર, પૂર્વ ગુજરાતના કેટલાક ભાગોમાં ગાજવીજ સાથે વરસાદની આગાહી છે. તો 10 થી 13 એપ્રિલમાં ભારે પવન ફૂંકાવાની શક્યતા છે.   

દેશના ઉત્તર-પશ્ચિમ રાજ્યોમાં તીવ્ર ગરમી અને લૂએ તેની અસર દેખાવાનું શરૂ કર્યું છે. ભારતીય હવામાન વિભાગ (IMD) એ 10 એપ્રિલ સુધી રાજસ્થાન, મધ્ય પ્રદેશ, હરિયાણા, દિલ્હી, ઉત્તર પ્રદેશ, હિમાચલ પ્રદેશ, પંજાબ, ગુજરાત, કોંકણ, ગોવામાં આગામી 6 દિવસ સુધી ગંભીર હીટવેવ અને હીટવેવની આગાહી કરી છે. તેના કારણે ઉત્તર-પશ્ચિમ અને મધ્ય ભારતમાં તાપમાન 2 થી 4 ડિગ્રી સેલ્સિયસ વધી શકે છે.

અંબાલાલ પટેલે કહ્યું કે, એપ્રિલમાં ભારે પવનના તુફાનો અને આંધી વંટોળનું વાતાવરણ રહેશે. 14 એપ્રિલથી બંગાળાના ઉપસાગરમાં વાવાઝોડાની શરૂઆત થશે. 10 થી 18 મે સુધીમાં આરબ દેશોમાંથી આવતી આંધી તુફાનો થવાની શક્યતા છે. જેની અસરને પગલે કાચા મકાનના છાપરા ઉડી જાય તેવી શક્યતા છે. 4 જૂન સુધીમાં રોહિણી નક્ષત્રનો વરસાદ કેટલાક ભાગોમાં થવાની શક્યતા છે. અરબી સમુદ્રમાં પણ વરસાદની શક્યતા છે.   

તેમણે જણાવ્યું કે, બંગાળ સાગરમાં સીઝનનું પ્રથમ સાઇક્લોન હળવા પ્રકારનું બનશે. અરબ સાગરના ભેજના કારણે 10 એપ્રિલ સુધીમાં રાજ્યના વિવિધ ભાગોમાં હવામાનમાં પલટો આવશે. દક્ષિણ ગુજરાતના ભાગોમાં જેમ કે નવસારી,સુરત આસપાસના ભાગોમાં હવામાનમાં પલટો આવશે. દક્ષિણ સૌરાષ્ટ્ર, ઉત્તર-મધ્ય ગુજરાતના ભાગોમાં હવામાનમાં પલ્ટો આવશે. 

આ ઉપરાંત, ઓડિશા, મહારાષ્ટ્ર, કેરળ, તમિલનાડુ, કર્ણાટક, આંધ્ર પ્રદેશ, અરુણાચલ પ્રદેશ અને ઉત્તર-પૂર્વ ભારતના તમામ 8 રાજ્યોમાં વાવાઝોડા, ભારે વરસાદ અને કરા માટે ચેતવણી જાહેર કરવામાં આવી છે. 30 થી 50 કિલોમીટર પ્રતિ કલાકની ઝડપે પવન ફૂંકાઈ શકે છે. આવી સ્થિતિમાં લોકોને ગરમીથી રાહત મળી શકે છે, પરંતુ આ વખતે દિલ્હી-એનસીઆરમાં ભારે ગરમી પડવાની શક્યતાઓ છે.  

દિલ્હીમાં તીવ્ર ગરમીનો કહેર

દેશની રાજધાની દિલ્હીમાં એપ્રિલના પ્રથમ સપ્તાહમાં જ આકરી ગરમી પડી રહી છે. ગયા દિવસે શુક્રવારે દિલ્હીમાં મહત્તમ તાપમાન 38.4 ડિગ્રી હતું, જે સામાન્ય કરતાં 4.4 ડિગ્રી વધુ છે. લઘુત્તમ તાપમાન 18.8 ડિગ્રી સેલ્સિયસ નોંધાયું હતું. આજે 5 એપ્રિલની સવારે દિલ્હીમાં મહત્તમ તાપમાન 32 ડિગ્રી હતું.  

હવામાં ભેજનું પ્રમાણ 12 ટકા છે અને સૂર્ય સવારે 6.06 કલાકે ઉગ્યો હતો. તે સાંજે 6:40 વાગ્યે સેટ થશે. IMDએ આગામી 7 દિવસ સુધી દિલ્હીમાં હીટ વેવની ચેતવણી આપી છે. તાપમાન 40 થી 42 ડિગ્રી વચ્ચે રહેવાની સંભાવના છે. આ વખતે દિલ્હીમાં એપ્રિલથી જૂન દરમિયાન સામાન્ય કરતાં વધુ ગરમી રહેવાની આગાહી કરવામાં આવી છે.

દેશમાં હવામાન પરિસ્થિતિઓ

હવામાન વિભાગના જણાવ્યા અનુસાર, એક અપર એર સાયક્લોનિક સર્કલ દક્ષિણ-પશ્ચિમ રાજસ્થાન પર છે અને બીજું પશ્ચિમ મધ્ય પ્રદેશમાં નીચલા ઉષ્ણકટિબંધીય સ્તરે છે. એક અપર એર સાયક્લોનિક પરિભ્રમણ દક્ષિણ તમિલનાડુ અને તેની આસપાસના વિસ્તારો પર છે અને બીજું દક્ષિણ આંદામાન સમુદ્ર અને તેની આસપાસના વિસ્તારોમાં નીચલા ઉષ્ણકટિબંધીય સ્તરે છે. આ હવામાન પ્રણાલીની અસરને કારણે અરબી સમુદ્ર અને બંગાળની ખાડીમાંથી આવતા ભેજવાળા પવનોનું ચક્ર સર્જાયું છે, જેની અસર સમગ્ર ભારતમાં જોવા મળશે.

આ રાજ્યોમાં વાદળો વરસશે

હવામાન વિભાગના જણાવ્યા અનુસાર આગામી 5-6 દિવસમાં ઉત્તર-પશ્ચિમ ભારતના કેટલાક ભાગોમાં ગરમીનું મોજું આવવાની શક્યતા છે. આગામી 3 દિવસ સુધી દક્ષિણ દ્વીપકલ્પના ભારતના ભાગોમાં છૂટાછવાયા સ્થળોએ વાવાઝોડું, વીજળી અને ભારે વરસાદની સંભાવના છે. દક્ષિણ દ્વીપકલ્પ ભારત, આંદામાન અને નિકોબાર ટાપુઓ, ઓડિશા, ઉત્તરપૂર્વ ભારતમાં વાવાઝોડા, વીજળી અને તેજ પવન (40-50 કિમી પ્રતિ કલાકની ઝડપે) સાથે વરસાદની શક્યતા છે.

મહારાષ્ટ્ર, પશ્ચિમ બંગાળ, સિક્કિમ, ઝારખંડ અને મધ્ય ભારતમાં પણ વાદળો છવાયેલા રહેશે. ઝારખંડમાં છૂટાછવાયા કરા પડવાની સંભાવના છે. આસામ, મેઘાલય, નાગાલેન્ડ, મણિપુર, મિઝોરમ, ત્રિપુરામાં ભારે વરસાદની સંભાવના છે. કેરળ અને માહેમાં છૂટાછવાયા સ્થળોએ ભારે વરસાદની સંભાવના છે. તમિલનાડુ, દક્ષિણ આંતરિક કર્ણાટક, અરુણાચલ પ્રદેશમાં પણ વાદળો છવાયેલા રહેશે.  

આ રાજ્યોમાં પડશે ગરમી

હવામાન વિભાગના જણાવ્યા અનુસાર, 9 એપ્રિલ સુધી ગુજરાતના સૌરાષ્ટ્ર અને કચ્છમાં તીવ્ર ગરમીનું મોજું આવી શકે છે. દક્ષિણ હરિયાણા અને દિલ્હીના વિવિધ વિસ્તારોમાં હીટવેવની સ્થિતિ યથાવત રહેવાની શક્યતા છે. પશ્ચિમ ઉત્તર પ્રદેશ, હિમાચલ પ્રદેશ, પંજાબ, ગુજરાત, પશ્ચિમ રાજસ્થાન, પૂર્વ રાજસ્થાન, પશ્ચિમ મધ્ય પ્રદેશ, કોંકણ અને ગોવામાં ગરમ ​​અને ભેજવાળું હવામાન રહેવાની શક્યતા છે.

હવામાન વિભાગના લેટેસ્ટ અપડેટ અનુસાર, રાજ્યમાં તાપમાનનો પારો 44 ડિગ્રીને પાર પહોંચ્યો છે. ભૂજમાં સીઝનનું સૌથી વધુ 44.5 ડિગ્રી તાપમાન નોંધાયું છે. રાજ્યના 10 જિલ્લાઓમાં તાપમાન 40 ડિગ્રી પાર નોંધાયું છે. કચ્છમાં હીટવેવનું ઓરેન્જ અલર્ટ, જ્યારે રાજકોટમાં યેલો અલર્ટ છે. અમદાવાદ 41.3 ,ગાંધીનગર 41.0 ડિગ્રી તાપમાન નોંધાયું છે. ડીસા 42.1, વલ્લભ વિદ્યાનગર 38.9 ડિગ્રી તાપમાન નોંધાયું. વડોદરા 39.2, સુરેન્દ્રનગર 43.2 ડિગ્રી તાપમાન નોંધાયું. નલિયા 40.4, કંડલા 42.0 ડિગ્રી તાપમાન નોંધાયું. પોરબંદર 33.4 અને રાજકોટ 42.9 ડિગ્રી તાપમાન નોંધાયું. કેશોદ 40.7, મહુવા 34.2 ડિગ્રી તાપમાન નોંધાયું. 

અંબાલાલ પટેલની આગાહી, હજી ગરમી વધશે

અંબાલાલ પટેલે ગુજરાતમાં કાતિલ ગરમી વિશે કહ્યું કે, આજથી રાજ્યમાં ગરમીનો પારો વધશે. મધ્ય ગુજરાત ના ભાગોમાં મહત્તમ તાપમાન 44 ડિગ્રી ઉપર જઈ શકે છે. વડોદરા, આણંદ, નડિયાદના ભાગોમાં ગરમી વધશે. તો કચ્છ, બનાસકાંઠા, પાટણ, સિદ્ધપુર, મહેસાણા, સાબરકાંઠા, પંચમહાલ તાપમાન ૪૨ ડિગ્રીથી વધુ જશે. આગામી 12 એપ્રિલ સુધી રાજ્યમાં ગરમી વધારે રહેશે. પરંતું 10 એપ્રિલ પછી રાજ્યમાં ગરમીનું જોર ઘટશે.

એપ્રિલના મધ્યમાં આવશે વરસાદ

હવામાન નિષ્ણાતની આગાહી કહી છે કે, 12 થી 14 એપ્રિલ દરમિયાન ભારે પવન સાથે ધૂળની ડમરીઓ ઉઠશે. હવામાનમાં મોટો પલટો આવશે. 17 થી ૨૦ એપ્રિલ દરમિયાન કેટલાક ભાગોમાં પવન સાથે વરસાદી છાંટા પડી શકે છે. દેશ સહિત રાજ્યના કેટલાક ભાગોમાં ગાજવીજ થશે. 14 એપ્રિલ પહેલા દેશના ભાગોમાં પ્રિ મોનસુન એક્ટિવિટી થશે, જોકે, તેની ગુજરાતમાં અસર ઓછી થશે. 

આ તારીખ પછી ફરી ગરમી પડશે

26 એપ્રિલ બાદ આકરી ગરમી પડશે. ગુજરાતના કેટલાક ભાગોમાં તાપમાન 45 ડિગ્રી સુધી પહોંચી શકે છે. એપ્રિલ માસમાં હવામાનમાં વારંવાર પલટો આવશે. એપ્રિલ માસમાં પવનનું જોર રહેશે, જેની અસર બાગાયતી પાકોમાં થશે. જૂનાગઢ, અમરેલી સહિત સૌરાષ્ટ્રમાં તાપમાન 42 ડિગ્રી સેલ્સિયસ રહેશે. તો દક્ષિણ ગુજરાત માં તાપમાન ૪૦ ડિગ્રી તાપમાન જઈ શકે છે.