પહાડી રાજ્યમાં હિમવર્ષાથી ગુજરાતમાં ઠંડી વધી, બીજીતરફ અંબાલાલે વાવાઝોડા અંગે કરી આગાહી

શું છે આગાહી

ઉત્તરભારતમાં હિમવર્ષા થઈ રહી છે જેની અસર ગુજરાતમાં પણ જોવા મળી છે. રાજ્યમાં છેલ્લા બે દિવસથી ઠંડીમાં વધારો જોવા મળ્યો છે. રાત્રે અને વહેલી સવારે ઠંડીનો ચમકારો જોવા મળી રહ્યો છે તો દિવસભર ઠંડા પવનો ફૂંકાઈ રહ્યાં છે. આગામી દિવસોમાં હજુ પણ તાપમાન ઘટવાને કારણે રાજ્યમાં ઠંડી વધશે.

વાવાઝોડાનો પણ ખતરો

રાજ્યમાં ઠંડીની સાથે વાવાઝોડાનું સંકટ પણ જોવા મળી શકે છે. અંબાલાલ પટેલે કહ્યું કે 23 ડિસેમ્બરથી રાજ્યમાં ભારે ઠંડી પડશે. તો 16થી 22 ડિસેમ્બર દરમિયાન વાદળછાયુ વાતાવરણ બનવાથી અરબ સાગરમાં લો પ્રેશરની સંભાવના છે. અંબાલાલે કહ્યું કે આગામી 72 કલાકમાં મહેસાણા, બનાસકાંઠા, સાબરકાંઠા અને પંચમહાલ જેવા જિલ્લાઓમાં ઠંડી વધી શકે છે.  

અંબાલાલે આગળ જણાવ્યું કે બંગાળના ઉપસાગરમાં લો પ્રેશર બની શકે છે. જેથી દક્ષિણ ગુજરાતમાં વાદળછાયુ વાતાવરણ જોવા મળે અને કેટલીક જગ્યાએ છાંટા પણ પડી શકે છે. અંબાલાલે કહ્યું કે 16થી 22 ડિસેમ્બર એક સપ્તાહ સુધી વાદળછાયુ વાતારવણ આવતા મહત્તમ તાપમાન ઘટશે અને ઠંડીમાં પણ ઘટાડો જોવા મળી શકે છે. તો 23 ડિસેમ્બર બાદ હાડ થીજવતી ઠંડી પડશે.

ભારતીય હવામાન વિભાગ (IMD) એ શનિવારે આગાહી કરી છે કે દેશના ઘણા રાજ્યોમાં આગામી સાત દિવસ સુધી શીત લહેર ચાલુ રહેશે. બંગાળની ખાડીમાં લો પ્રેશર સિસ્ટમના કારણે દક્ષિણ ભારતમાં ભારે વરસાદની શક્યતા છે. વેસ્ટર્ન ડિસ્ટર્બન્સના કારણે ઉત્તરીય વિસ્તારોમાં શીત લહેર, ગાઢ ધુમ્મસ અને હિમવર્ષા થવાની સંભાવના છે. દક્ષિણ-પૂર્વ બંગાળની ખાડીમાં નીયા દબાણનો વિસ્તાર રચાયો છે, જે અપર એરના ચક્રવાતી પરિભ્રમણથી પ્રભાવિત છે. સિસ્ટમ આગામી 24 કલાકમાં વધુ તીવ્ર બની શકે છે અને પશ્ચિમ-ઉત્તરપશ્ચિમ તરફ આગળ વધી શકે છે અને છેવટે 11 ડિસેમ્બર સુધીમાં તમિલનાડુ અને શ્રીલંકા નજીક દક્ષિણ-પશ્ચિમ બંગાળની ખાડીમાં પહોંચી શકે છે.  

સૌરાષ્ટ્રમાં કાતિલ ઠંડીનો ચમકારો

સૌરાષ્ટ્રમાં પણ ઠંડી વધી રહી છે. વિવિધ શહેરોના તાપમાનમાં ઘટાડો થઈ રહ્યો છે. રાજકોટમાં તાપમાન 13.6 ડિગ્રી પહોંચ્યું છે. તો અમરેલીમાં 15.1 ડિગ્રી તાપમાન નોંધાયું છે. મહેસાણામાં તો તાપમાન 11.2 ડિગ્રી પહોંચી જતા લોકો ઠંડીથી ઠુંઠવાયા છે. પંચમહાલમાં પણ તાપમાન 12.2 ડિગ્રી પહોંચ્યું છે. જ્યારે વેરાવળમાં તાપમાન 16.2 ડિગ્રી નોંધાયું છે.