લો પ્રેશર, અરબી સમુદ્રમાં ડિપ્રેશન... આ ત્રણ દિવસ સમગ્ર રાજ્યમાં અતિ ભારે વરસાદનો ખતરો, જાણી લો નવી આગાહી

અમદાવાદ હવામાન વિભાગના ડાયરેક્ટર ડો. એ. કે. દાસએ જણાવ્યુ કે રાજ્યમાં આગામી 7 દિવસ વરસાદી માહોલ જોવા મળશે. 21 અને 22 મેએ ભારે વરસાદની સંભાવના છે. આ દરમિયાન વીજળીના કડાકા-ભડાકા સાથે 40થી 60 કિમીની ઝડપે પવન ફૂંકાઈ શકે છે.

22 મેની આગાહીની વાત કરવામાં આવે તો દક્ષિણ ગુજરાતમાં છુટાછવાયા સાથે ભારે વરસાદ પડી શકે છે. આ સિવાય 23, 24 અને 25 મેએ સમગ્ર રાજ્યમાં સાર્વત્રિક વરસાદ જોવા મળી શકે છે. જ્યારે 26 અને 27 મેએ છૂટાછવાયા વરસાદની સંભાવના છે.

અરબી સમુદ્રમાં અપર એર સાયક્લોનિક સર્ક્યુલેશનને કારણે ગુજરાતમાં વરસાદની સંભાવના બની છે. આગામી 12 કલાક બાદ લો પ્રેશર અને 36 કલાક બાદ અરબી સમુદ્રમાં ડિપ્રેશનની સ્થિતિ જોવા મળી શકે છે. જેના કારણે રાજ્યમાં ભારે વરસાદની સ્થિતિ આવી શકે છે. 

ગુજરાતમાં વરસાદની સંભાવના જોતાં હવામાન વિભાગે આગામી પાંચ દિવસ માછીમારોને દરિયો ન ખેડવાની સૂચના પણ આપી છે. 

હવામાન વિભાગે જણાવ્યું હતું કે 21 મે પછી રાજ્યમાં વરસાદની તીવ્રતા વધશે. સૌરાષ્ટ્ર અને કચ્છમાં મધ્યમથી ભારે વરસાદની આગાહી છે. 22 થી 24 મે દરમિયાન ગુજરાતમાં ભારે વરસાદ અને વાવાઝોડાની આગાહી છે. 24 મેના રોજ રાજ્યમાં મધ્યમ વરસાદ અને ગાજવીજ સાથે વરસાદની આગાહી છે. તેથી, અમદાવાદમાં તાપમાન 40 ડિગ્રીની આસપાસ નોંધાશે. હવામાન વિભાગના ચાર્ટ મુજબ અમરેલી, ભાવનગર, વલસાડ, નવસારી, તાપી, ડાંગ, દમણ, દાદરા અને નગર હવેલીમાં ભારે વરસાદની સંભાવના છે.

અગાઉ હવામાન વિભાગે આગાહી કરી હતી કે ચોમાસું 27 મે સુધીમાં કેરળ પહોંચશે. IMD એ મંગળવારે જણાવ્યું હતું કે આગામી 4-5 દિવસમાં ચોમાસું કેરળ પહોંચી શકે છે. ચોમાસાના આગમન માટે પરિસ્થિતિઓ અનુકૂળ બનવાની શક્યતા છે. આગામી 3 દિવસ દરમિયાન ઉત્તરપૂર્વ ભારત, ઉપ-હિમાલયી પશ્ચિમ બંગાળ અને સિક્કિમમાં વાવાઝોડા અને વીજળી સાથે ભારે વરસાદની સંભાવના છે.