માર્ચમાં કમોસમી વરસાદનો વધુ એક રાઉન્ડ આવશે, ભર ઉનાળે ભીંજાશે ગુજરાત, આ છે તારીખ

ગુજરાતમાં તાપમાનનો પારો વધવાની હવામાન વિભાગની આગાહી છે. હવામાન વિભાગે કહ્યું કે, રાજ્યમાં હજુ 2થી 3 ડિગ્રી સુધી તાપમાનનો પારો ઉંચકાશે. વેસ્ટર્ન ડિસ્ટર્બન્સની અસરના કારણે ગરમી વધશે. રાજકોટ, સુરેન્દ્રનગર, પાટણ, ગાંધીનગરમાં આકરી ગરમી પડશે. તો તાપમાનનો પારો 40 ડિગ્રીની આસપાસ રહેવાની સંભાવના છે. ગઈકાલે રાજકોટમાં 40.1, ભુજમાં 40 ડિગ્રી તાપમાન નોંધાયું હતુ. 

વેસ્ટર્ન ડિસ્ટર્બન્સને લીધે રાજ્યમાં ફરી તાપમાનનો પારો ઉંચકાયો છે. ભૂજ, કંડલા, ડીસા અને રાજકોટમાં નોંધાયું 38 ડીગ્રી તાપમાન તો અમદાવાદ, ગાંધીનગર અમરેલી, સુરેન્દ્રનગર, કેશોદમાં 37 ડીગ્રી તાપમાન નોંધાયું. હવામાન વિભાગ અનુસાર બે દિવસ બાદ હજુ ગરમીનો પારો વધી શકે છે. દક્ષિણ ગુજરાત પ્રદેશ અને સૌરાષ્ટ્ર-કચ્છના દરિયાકાંઠા વિસ્તારમાં ગરમ અને ભેજવાળા પવનોના કારણે ગરમીમાં વધારો થવાની સંભાવના છે. એપ્રિલ અને મે મહિનામાં કાળઝાળ ગરમી પડશે તેવી હવામાન વિભાગે આગાહી કરી છે. તાપમાનાનો પારો 42 ડીગ્રીને પાર જાય તેવી સંભાવના છે. 

આવતીકાલે 24 માર્ચે પશ્ચિમ હિમાલય પ્રદેશમાં વધુ એક વેસ્ટર્ન ડિસ્ટર્બન્સ પહોંચશે. આ વેસ્ટર્ન ડિસ્ટર્બન્સની 26 માર્ચથી રાજ્યમાં અસર જોવા મળશે. પશ્ચિમી ભેજવાળા પવનના કારણે આગામી 1 એપ્રિલ સુધી રાજ્યનું વાતાવરણ પલટાઈને વાદળછાયું બની શકે છે. આ દરમિયાન 29થી 1 એપ્રિલ સુધી રાજ્યમાં ગાજવીજ સાથે 10 મીમી સુધી એટલે કે અડધા ઇંચથી ઓછો કમોસમી વરસાદ વરસવાની શક્યતા છે.