Asia Cup 2025 India: ગિલ, યશસ્વી રહેશે બહાર, અય્યરની થશે એન્ટ્રી, આ રિપોર્ટમાં મોટો દાવો

Team India: અજીત અગરકરની આગેવાનીમાં પસંદગી સમિતિ મંગળવાર, 19 ઓગસ્ટે એશિયા કપની ટીમ પસંદ કરવા બેઠક યોજશે. સારી વાત છે કે કેપ્ટન સૂર્યકુમાર યાદવ ફિટ થઈ ગયો છે. સૂર્યકુમાર યાદવે ઈજા બા ફિટનેસ ટેસ્ટ પાસ કરી લીધો છે. પસંદગીકારોની એશિયા કપની ટીમ પસંદ કરવા ઘણા મોટા નિર્ણયો લેવા પડશે. તેવામાં સૌથી મોટો સવાલ છે કે શું શુભમન ગિલ અને યશસ્વી જાયસવાલને ટીમમાં તક મળશે.

શુભમન ગિલની ગેરહાજરી અને રોહિત શર્માની નિવૃત્તિ બાદ ટી20મા સંજૂ સેમસન અને અભિષેક શર્માને ઓપનિંગ કરવાની તક મળી હતી, જેનો બંનેએ ખૂબ લાભ ઉઠાવ્યો છે. આ બંને ખેલાડી ફિટ છે અને એશિયા કપની ટીમમાં જગ્યા બનાવવામાં દાવેદાર છે. બીજીતરફ પસંદગીકારો શુભમન ગિલ અને યશસ્વી જાયસવાલ અંગે શું નિર્ણય લેશે તે પણ જોવાનું રહેશે.

આ વચ્ચે સ્પોર્ટસ્ટારના રિપોર્ટ અનુસાર પસંદગીકારો એક મોટો નિર્ણય લેતા શુભમન ગિલ અને યશસ્વી જાયસવાલને એશિયા કપની ટીમમાંથી બહાર રાખવા તૈયાર છે. અજીત અગરકર તે ટીમને યથાવત રાખવાની તૈયારીમાં છે, જેણે ગૌતમ ગંભીરના કોચિંગમાં તાજેતરમાં ટી20 સિરીઝમાં શાનદાર પ્રદર્શન કર્યું છે.

એશિયા કપ 2025ની ફાઇનલ મેચ 28 સપ્ટેમ્બરે રમાશે, ત્યારબાદ ભારત 2 ઓક્ટોબરથી વેસ્ટ ઈન્ડિઝ વિરુદ્ધ ટેસ્ટ સિરીઝ રમશે. તેથી કેપ્ટન ગિલ અને જાયસવાલને તે સિરીઝ માટે તૈયાર રહેવા માટે કહેવામાં આવી શકે છે.

શું શ્રેયસ અય્યરની થશે વાપસી?
આ રિપોર્ટમાં કહેવામાં આવ્યું છે કે પસંદગીકારો ટીમમાં શ્રેયસ અય્યર અને બીજા વિકેટકીપરના રૂપમાં જિતેશ શર્માને સામેલ કરી શકે છે. જિતેશે આઈપીએલમાં શાનદાર પ્રદર્શન કર્યું હતું. આ સિવાય આઈપીએલમાં શાનદાર પ્રદર્શન કરનાર શ્રેયસ અય્યરને ટી20 ટીમમાં વાપસી થઈ શકે છે.

આ પણ વાંચોઃ ગૌતમ ગંભીરની જગ્યાએ ધોની બનશે ટીમ ઈન્ડિયાનો કોચ ? અચાનક નામ સામે આવતા મચ્યો હોબાળો

કેમ અય્યરને મળશે તક?
રિપોર્ટ અનુસાર યુએઈની પરિસ્થિતિને જોતા પસંદગીકાર એક અનુભવી મિડલ ઓર્ડર બેટરને ટીમમાં સામેલ કરવા ઈચ્છે છે. આ કારણે અય્યરની પસંદગી કરવામાં આવી શકે છે. શ્રેયસે યુએઈમાં ચેમ્પિયન્સ ટ્રોફી 2025મા ભારતની જીતમાં મહત્વની ભૂમિકા ભજવી હતી. 

જો શ્રેયસ અય્યરને એશિયા કપની ટીમમાં સામેલ કરવામાં આવે તો રિંકૂ સિંહ અને શિવમ દુબેમાંથી કોઈ એકને બહાર કરવો પડી શકે છે. ટીમ પસંદગી સમિતિની બેઠકમાં કેપ્ટન સૂર્યકુમાર યાદવ પણ સામેલ થશે.

એશિયા કપમાં ભારતનો કાર્યક્રમ
10 સપ્ટેમ્બર- વિરુદ્ધ યુએઈ (દુબઈ)
14 સપ્ટેમ્બર- વિરુદ્ધ પાકિસ્તાન (દુબઈ)
19 સપ્ટેમ્બર- વિરુદ્ધ ઓમાન (અબુધાબી)

ભારત ગ્રુપ એમાં સામેલ છે, જેમાં તેની સાથે પાકિસ્તાન, યુએઈ અને ઓમાન છે. બધી ટીમ પોતાના ગ્રુપની અન્ય ટીમ સાથે 1-1 મેચ રમશે, ત્યારબાદ ટોપ 2 ટીમો સુપર 4મા જશે. બીજા ગ્રુપમાં અફઘાનિસ્તાન, બાંગ્લાદેશ, શ્રીલંકા અને હોંગકોંગ છે.