 "ઓફિસ જોબથી લઈને એશિયા કપ સુધી...સંઘર્ષથી ભરેલી છે આ ક્રિકેટરોની કહાની")
ઓમાનના ક્રિકેટરોની કહાની સંઘર્ષ અને જુસ્સાનું ઉદાહરણ છે. તેઓ લાંબા સમય સુધી ઓફિસ જોબની સાથે પોતાના ફ્રી સમયમાં ક્રિકેટ રમતા હતા. આજે તેમની મહેનત તેમને એશિયા કપ 2025 સુધી લઈ ગઈ છે. કેપ્ટન જતિન્દર સિંહ અને ઓલરાઉન્ડર સુફિયાન મહમૂદ માત્ર ટીમની આશાઓ સાથે રમતા નથી, પરંતુ સમગ્ર ઓમાન ક્રિકેટની કહાની પણ દુનિયા સમક્ષ રજૂ કરી રહ્યા છે.
શરૂઆતમાં ખેલાડીઓનો મુખ્ય ઉદ્દેશ્ય નોકરી મેળવવાનો હતો. ત્યારબાદ ક્રિકેટ આવ્યું. મોટાભાગના ખેલાડીઓ ઓફિસમાં કામ કરતા હતા અને સાંજે ક્રિકેટ પ્રેક્ટિસ કરતા હતા. જતિન્દરના મતે એશિયા કપમાં ઓમાનનું પ્રતિનિધિત્વ કરવું તેમના માટે સ્વપ્ન સાકાર થવા જેવું છે.
ક્રિકેટની સફર સરળ રહી નથી
ઓમાની ખેલાડીઓની ક્રિકેટ સફર સરળ નહોતી. પહેલા તેઓ સિમેન્ટની પીચ પર રમતા હતા. 2088માં એસ્ટ્રો ટર્ફ મળી ગયું અને 2011માં પહેલું અસલી ટર્ફ ગ્રાઉન્ડ મળ્યું. મુશ્કેલીઓ છતાં તેમનો જુસ્સો તેમને આગળ ધપાવતો રહ્યો.
ઘણા પ્રતિભાશાળી ખેલાડીઓ હાર માની ગયા અને ચાલ્યા ગયા, પરંતુ જતિન્દર અને સુફિયાન જેવા ખેલાડીઓ રહ્યા. સુફિયાનને શરૂઆતમાં ઘરેથી વિરોધનો સામનો કરવો પડ્યો. તેના માતાપિતા ઇચ્છતા હતા કે તે અભ્યાસ અને નોકરી પર ધ્યાન કેન્દ્રિત કરે. પરંતુ સુફિયાને હાર ન માની. 2016ના T20 વર્લ્ડ કપમાં તેમની મહેનત રંગ લાવી, જ્યારે ટીમે આયર્લેન્ડને હરાવ્યું.
આયર્લેન્ડને હરાવીને છવાયું ઓમાન
2015માં ઓમાનને T20 આંતરરાષ્ટ્રીય દરજ્જો મળ્યો. 2016ના T20 વર્લ્ડ કપમાં તેણે આયર્લેન્ડને હરાવીને વિશ્વને આશ્ચર્યચકિત કર્યું. જોકે પાછળથી વરસાદ અને હારથી ટીમની સફર અટકી ગઈ, આ ટુર્નામેન્ટ ટીમ માટે એક વળાંક સાબિત થઈ. 2016 પછી ટીમની તૈયારી અને અભિગમ સંપૂર્ણપણે બદલાઈ ગયો. હવે ટીમ શિસ્ત, વ્યાવસાયિક કોચિંગ અને તાલીમ પર વધુ ધ્યાન કેન્દ્રિત કરે છે. ખેલાડીઓ રમતનો આનંદ માણવા લાગ્યા અને હવે 2025માં ટીમ વધુ મજબૂત છે.
એશિયા કપ 205: ગ્રુપ Aમાં ઓમાન
એશિયા કપ 2025માં ઓમાન ગ્રુપ Aમાં ભારત, પાકિસ્તાન અને UAE સાથે સ્પર્ધા કરશે. જતિન્દર અને સુફિયાન આ ટુર્નામેન્ટને શીખવા અને પોતાને સાબિત કરવાની તક માને છે. જતિન્દર ભારતીય ખેલાડીઓમાં શુભમન ગિલ, સૂર્યકુમાર યાદવ, અભિષેક શર્મા, અર્શદીપ સિંહ અને તિલક વર્માનું નામ લીધું. સુફિયાને હાર્દિક પંડ્યાની પ્રશંસા કરી અને કહ્યું કે તે રમત માટે તૈયારી કરવાની અને ભારતીય ટીમના દબાણને સંભાળવાની કળા શીખવા માંગે છે.
ભવિષ્યની તૈયારીમાં, ઓમાન ક્રિકેટ યુવા ખેલાડીઓ વિકસાવવા પર ધ્યાન કેન્દ્રિત કરી રહ્યું છે. ડેપ્યુટી હેડ કોચ સુલક્ષણ કુલકર્ણી શાળાઓમાં ક્રિકેટ કાર્યક્રમો ચલાવી રહ્યા છે. એકેડેમીના કોચ બાળકોને ક્રિકેટની મૂળભૂત તકનીકો શીખવે છે અને તેમની પ્રતિભાને નિખારે છે. ઉદ્દેશ્ય લાંબા સમય સુધી ઓમાન માટે મજબૂત અને કુશળ ખેલાડીઓ તૈયાર કરવાનો છે.
ઓમાનમાં ફૂટબોલ વધુ લોકપ્રિય છે
ઓમાનમાં ફૂટબોલ વધુ લોકપ્રિય છે, પરંતુ ક્રિકેટને લોકપ્રિય બનાવવા માટે સતત પ્રયાસો કરવામાં આવી રહ્યા છે. જતિન્દર અને સુફિયાનની કહાની દર્શાવે છે કે જુસ્સા, સખત મહેનત અને આત્મવિશ્વાસથી કોઈપણ ખેલાડી મુશ્કેલ પરિસ્થિતિઓને પાર કરી શકે છે અને આંતરરાષ્ટ્રીય મંચ પર પોતાની છાપ છોડી શકે છે.
)